1 John3
1Pielo Peibe anuide daikenzwa keku peu no, peuge anuide Tinggwang name lie qulu kera, nah anui au Tinggwang name da. Aipau kiede ziemne kideube anuide ci ma, kedanemene kideube pecu ci kemakne. 2Akumedung, anui cu au Tinggwang name dida, nah anui dai nzwa di ziebi kecu liagai mereu. Khrista kegwang dau, anuide pa nzwa di kera anui cibam, kedanemene pa kelade nzwa anui pecu ngau zielu.3Nah keheibede peda keregui aide kebamme au pekatei pecu teimci lula, Khrista mci kecu nzwa.4Keheibe kemau tei kelame hezai gikahla. Kedanemene kemau au hezai gikah kecu de delu.5Nah nnui pa mi miakngau tei kegwang au kemaudung keugidi beulu kerane kecu cibam, nah peda au kemau gede gah.6Keheibe de Khrista da la kedibe kemau tei lama. Keheibe de kemau tei kelabe pecu ngau ma, mede pecu ci ma.7Anamedung, peu migede de nnuide cwadi so. Petaube tei kelame au masang, Khrista au masang kecu nzwa.8Kemau tei kelabe au herakesiabe dade gwang, kedanemene herakesiabe raitu gade kemau tei kedine. Aipau kiede ziemne Tinggwang Nabe mi miakngau tei gwang, iciu eh pa herakesiabe batadung tei ngkapdi kerane.9Keheibede Tinggwang dade lungh kegwangme kemau tei lama, kedanemene Tinggwang tsibe peda kebamne. Pa kemau tei gailak ta, kedanemene pa Tinggwang dade lungh kegwangne.10Aikade Tinggwang name nah herakesiabe name de ci lula: Keheibede petaube teila kemakbe, nah pe sinabe de ku kemakbe Tinggwang dade gwang ma.11Nnui raitu gade siukelu samlia de au aide; anui hangge gede kereku lu maisia.12Anui Cain nzwadi kerabe ma, pa au herakesiabe dade gwang nah pe sinabe de teitsetdi. Dai ziemne pa pecu teitset dino? Kedanemene pe batadung au sia kecune nah pe sinabe batadung au masang kecune.13A sinamedung, kideube nnuide ngaurau de, nnui swa gahdi helo.14Anui ketsai gade kering ga kahmpet kedi anui cibam, kedanemene anui sinamedung de ku kelane. Mide kula kemakbe au ketsai ga la reu.15Keheibede pe sinabe de ngaurau kelame au dapketsetme, nah dapketsetme au kelungta kering peda bam la kemak nnui cibam.16Aide gade anui keku ci lula: Khrista anui ziemne pe teilung kaibeu. Nah anuide sinamedung ziemne anui teilung kaibeu maisia.17Dede keheibede kideube mabamdung bam eh pe sinabe teu maikesia ngau de pecu nghabeu mecai, dainzwa eh peda Tinggwang keku de bamlu laino?18Anamedung, anui au sam gade mede kerang gade mene, bata nah kesangbe gade kereku lugo.19Aikade anui kesangbe gade gwang kecu cilu zie, nah anui Tinggwang dwa gade anui lung sünne luzie,20kedanemene anui lung anuide mmau liede, Tinggwang au anui mlung swa diki, nah pa ma pelane cibam.21Akumedung, anui lung anuide mmau mecai, Tinggwang dwaga anui kekuu bam,22nah anui pe dade kie kegai leune anui ngau luzie, kedanemene anui pe ajadung de mzai nah pe suiyibe tei kelane.23Nah pe aja au aide da: anui pe Na Jisu Khrista zi nlum kera, nah anuide pe aja kaikebeu nzwa, hangge ge de kereku kera.24Tinggwang ajadung mzai kelame peda bamla, nah pa penuida bamla. Nah aikade pa anuide kepeu Rabe de gade pa anuida kebam anui ci lula.
Bridge Connectivity Solutions Pvt. Ltd.