1 John2
1A namedung, Ih nnui dage ma aidungde rau gaila iciu eh nnui kemau tei melu kerane. Dede keheibe de kemau teicai, Peibe da anui keleu teibeu kera, Jisu Khrista kesamsangbe bam.2Pa anui mau ziemne ratak tei kebeube da, nah anui ziemne rünne ma, dede kideube pelane ziemne de.3Anui Tinggwang ajadung de mzai lacai, aide gade anui pecu ci lalie kecu ci lula.4Mige, “Ih Tinggwang de ci,” de eh rangla, dede pe ajadung de mzai la mecai, pa au kenretme ge, nah kesangbe peda lama.5Dede keheibede pe sam mzai lacai, aipaude da Tinggwang keku de yi cangsiak lula. Aide gade anui peda lalie kecu anui ci lula:6Tinggwang da lalie rang kelabe, Khrista tet kela nzwa, pa de tet kerabe.7Akumedung, Ih nnui dage aja keheci gede raugai ma, dede nnui da raitu gade bamkela aja kehegwa ge. Aja kehegwa de au nnui siukelu deda.8Iciude, Ih nnui dage aja keheci ge raugai la, cide pe dade nah nnui dade de kesangbe, kedanemene kemui de tetdi zeuda, nah kebaa kesangbe baa bamdi delu.9Mige pa kebaa ga lalie de rangde pe sinabe de ngaurau lacai, cu kecangde kemui ga lareu.10Pe sinabe de ku kelabe kebaa ga la nah peda mide teingkau kera gede gah.11Dede pe sinabe de ngaurau kelabe de au kemuibe ga la nah kemuibe ga tetla, nah pa daiga miela bi ci lama, kedanemene kemuibe ne pemiak tei ciep kedine.12Anamedung, Ih nnui dage rau gaila, kedanemene Khrista zi ziemne nnui maudung gibeudi delu.13Mipeimedung, Ih nnui dage rau gaila, kedanemene nnui raitu gade kelabe de ci bamlu. Rehangmedung, Ih nnui dage rau gaila, kedanemene nnui kesiabe de ngamlu delu. 14Henamedung, Ih nnui dage raugai da, kedanemene nnui Peibe Tinggwang de ci bamlu. Mipeimedung, Ih nnui dage raugai da, kedanemene nnui raitu gade kelabe de cibam lu. Rehangmedung, Ih nnui dage raugai da, kedanemene nnui au ngking, nah Tinggwang samde nnui da bam, nah nnui kesiabe de ngamlu delu.15Kideube de mede kideu ga kebamdung de hung so. Keheibe de kideube de hung cai, Peibe keku de peda bam meda.16Kedanemene kideu ga kebam pelane au—pumteih hengin, nah mimiak hengin, nah kehelia teilung de au—Peibe dade gwang ma, dede kideube dade gwang.17Kideube nah pe kehengin de gahdi zeu da, dede Tinggwang lungningbe tei kelabe kelungta lunghla zie.18Anamedung, bamdakkak kamtube dida, nah Khrista ngauraube gwangla di delie kecu nnui siukelu nzwa, cu Khrista ngauraume kekiee ge gwang bam dida, aide gade bamdakkak kamtube di delie kecu anui cibam dida.19Penui anui dade tet dida, dede penui au anui maame ma. Kedanemene penui anui maame liecai, penui anuide ngngwa bamlu zie nage, dede penui tet dida, iciu eh penui pelane de anui maame melie kecu ci mcilu kerane.20Dede nnuide au Kemci Rabe ne keniak luda, nah nnui pelane cibam. 21Nnui kesangbe ci kemak ziemne Ih nnui da raugai ma, dede nnui cide ci kebamne nah kenret kette kesangbe gade gwangla kemak ci kebamne.22Cau kenretbe no? Jisu au Khrista melie kecube de mecai? Aipaude au Khrista ngauraube da, Peibe nah Nabe de de mlai kelabe de.23Keheibe de Nabe de mlai kelabe Peibe peda lama. Nabe de nlum kelame Peibe de peda la.24Cine nnui au, nnui raitu gade siu kelude, peu nnui da bam lulo. Nnui raitu gade siu kelude nnui da bamlu liecai, nnui Peibe nah Nabe da bamlu zie.25Nah sampet aide pa anuide sampet kebeu deda—kelungta kering.26Ih nnui dage ma aidungde nnuide cwa kelame ha rau gaila.27Nnui ziemne au, pe dade keniakkelu nnui ngau kelude nnuida la, nah nnuide peu mikeheide ledeu mede yi da. Dede pa keniak kelude ne nnuide ma pelane ledeu beula, nah cide au kesang nah kenret ma, nah nnuide ledeu kebeu nzwa, peda bamlu.28Cu, anamedung, peda bamlu, iciude pa mi miakngau tei kegwang dau, anui kuulu kerane nah pa caili kegwangdau pe dwade hengam teidi melu kerane.29Nnui pa masang kecu ci liecai, keheibe de petau tei kelabe pe dade lungh gwang lie kecu nnui ci luzie.
Bridge Connectivity Solutions Pvt. Ltd.