Engungwel Tite3
Elaã li enyiɔɔn li akiool
1Yeel baal bueel akal ye lweel li ambiri y'amfam, alweel bɔ bvool akal y'ɔyɛɛl wu asa ãndɔɔ mbueel mã ngesɛ.2Liaal bɔ abee mbuul si ngɔmɔ̃ otoo, akal onse opi ye baal, akal baal b'abebvool baal, b'aluul m'efyɛ onse baal bueel.3Ke ngwel wɛ, bia-byɛ tsɔɔn éli ewool, baal b'aywɛn a lweel, baal b'ádziɔɔn, ankyal b'efua y'esɛ bvi emfa bwɛn a emfa. Bia-byɛ ékesa ãndɔɔ m'ãbi-ãbi, éli y'ɔ̃kwal-nsɔɔ, ékebyal baal bvool ékebyal bakyɛ onse bia-byam.4Kɛn a ŋ'esuo Nziã wu Ɔ̃mvuul a bia-byɛ obvɛ o ndɛ ye dzii e ndɛ me ndɔɔ a baal,5ndɛ obvuul bia-byɛ. K'eli me ndɔɔ yɛn bia-byɛ ési ɛ̃sal mi dzu wɛ, eli kɛn a me ndɔɔ yɛn ndɛ ásio bia-byɛ nyiĩ. Ndɛ ábvuul bia-byɛ ŋ'ésuɔɔl ndɛ bia-byɛ m'oburu bo mburu yuaal bvool me nkuul Ɔ̃fel wu Ɔ̃nsensal wu owi bia-byɛ elaã li enyiɔɔn.6Ɔ̃fel ondɛ, Nziã áyiri ndɛ ngamfɛn nkal a bia-byɛ me nkuul Ɔ̃mvuul a bia-byɛ Yeso-Mãsia.7Ndɛ ási obobɔ me ndɔɔ yɛn ndɛ ámaasuul bia-byɛ dzu me nyiĩ a ndɛ, kwɛn bia-byɛ èbɔɔ bvel li elaã li ɔ̃bu nkal ɔ̃bu li ebeta bia-byɛ kaã.8Oyɔ ndɔɔ yi ebvaan m'okiool, bvool mɛ̃ nzii kwɛn yɛ yiool yɔ y'ɔ̃tɛɛ̃ wueel, me ndɔɔ yɛn b'akiool Nziã awa ɔ̃tsiin a bɔ wueel m'osa b'ɛ̃sal mi ngesɛ. Oyɔ ndɔɔ yi ngesɛ bvool yi ɔ̃bvɛn me ndɔɔ a baal bueel.9Kɛn a yɔɔl esesam bvi owool-a-wool, otaal b'ɛ̃luo mi ãnkuun m'ankɔɔ, obel y'ɛ̃tsuun me ndɔɔ a Ngel. Ke ngwel wɛ, omɔ̃ mam mbueel ãndɔɔ mã ngwel-a-ngwel bvool mɛn otsɛn pyɛ.10Mbuul wu akab baal, sial ndɛ lala ye yɛ, ke mbee a ŋ'ewi yɛ ndɛ ãnkunkwa sa li ɛ̃kwel ye li yuaal.11Yɛɛ kwɛn mbuul wu obobɔ àmaadzɛɛn nkuul bvool abesa obi, ndɛ ŋ'abewa nzuru a ndyam etumbu.Luo y'ɔ̃bio wu a ntɔ
12Kieel ŋ'èyuɔɔl me Ahatemas wuo Tiswik ola yɛ, sa mpɛn kwɛn yɛ yebɔɔ mɛ̃ ke Nikopolis, ke ngwel wɛ mɛ̃ nkuru kwɛn ɔ̃bvu wa mfyɛ abwel mɛ̃ oŋɔ̃.13Yɛɛ k'awuaal a Dzenas wu ɔ̃yiool-ãngel y'Apolos, kwɛn bɔ abee eluɔ oywɛn me ndɔɔ a dzwɛ e bɔ.14Ebvaan kwɛn baal a bia-byɛ hɛ̃ ayio k'asa ɛ̃sal mi ngesɛ, me ndɔɔ yi awuaal a baal b'ali y'ãkɔɔ m'asoo tswa-a-tswa, kwɛn bɔ abee nsia oywɛn.15Bam bueel b'ali ye mɛ̃ abio yɛ. Bio andoo b'adzii bia-byɛ onse okiool.Yɔɔl kwɛn Nziã asio byɛ bueel nyiĩ!
Wycliffe Bible Translators, Inc.