Engungwel Tite2
Ãtee m'ãbvaan m'ɔ̃kiool bwɛn a ɔ̃kiool
1Me b'ota yɛ, yiool ãndɔɔ m'ãbvaan m'ãtee mã dzu.2Tee ekukwel wɛn akal baal bɛn k'asa ãndɔɔ y'enduul wɛ, akal baal a dzuun, akal baal ba y'ombuul, akal baal b'amaasɛn anã onse okiool, onse dzii bvool onse osɛ-mwiĩ.3Emfa kiki hɛ̃, tee akaal b'amaayal wɛn akal y'epfuũ bvi ebvaan me baal ba ngel. Bɔ abee baal obekwe, abee hɛ̃ ankyal a mbal okal, kɛn a bɔ ayiool baal ãndɔɔ mã ngesɛ.4M'emfa okyɛ bɔ ayiool ãnsam m'akaal k'adzii alam ye baan a bɔ.5Yiool bɔ hɛ̃ k'akal y'ombuul, k'akal tsɛtsɛ, k'asa ɛ̃sal ɛ̃ nzɔ, k'akal akaal ba ngesɛ, k'akal ye lweel li alam, kwɛn baal abee Endɔɔ e Nziã opfiɔɔl.6Emfa kiki hɛ̃, wa ãnsam m'abɔɔl luo k'akal y'ombuul.7M'ãndɔɔ mbueel, yam suo ɛ̃sal mi ngesɛ, kwɛn bɔ aluɛɛn kuul e yɛ. Yɔɔl kwɛn ãtee ã yɛ ãkal mã dzu bvool m'elweel baal.8Yɛɛn ãndɔɔ mã ngesɛ mɛn baal k'akoo k'ayɛɛn obi me mɔ̃ wɛ, me ndɔɔ yɛn b'ali onse otaal ye bia-byɛ ayoo opfuru, abee si ndɔɔ ngamɔ̃ yi mbi yi ayɛɛn me bia-byɛ obɔɔ.9Tee ankyal wɛn alweel amfam a bɔ m'ãndɔɔ mbueel, asa mpɛn yi asa bɔ esɛ, abee onse otaal ye bɔ okal.10Tee bɔ hɛ̃ wɛn abee eluɔ bvi amfa a bɔ oturu, kɛn a bɔ akal baal b'akuru ãnzuru mam mbueel m'amfam a bɔ, m'emfa okyɛ, bɔ b'ankyal akal baal b'alweel ãtee ã Nziã wu Ɔ̃mvuul a bia-byɛ m'ãndɔɔ mbueel.Nyiĩ a Nziã émeemɔɔn ola baal bueel
11Ke ngwel wɛ, nyiĩ a Nziã yi ebvuul baal, émeemɔɔn ola baal bueel.12Nyiĩ oyɔ yi eyiool bia-byɛ k'ebee ãndɔɔ ã Nziã opfiɔɔl, k'ebee esɛ bvi ɔ̃kiri wu, bvool k'ekal y'ombuul bueel me lio li, k'ekal dzu bvool k'ekuru nzuru me Nziã.13Okyɛ emfa ki ekiaal bia-byɛ obvɛ b'ebeta bia-byɛ kaã. Tsoo olɔ li ekieel emɔɔn lweel e Yeso-Mãsia wu Nziã a bia-byɛ wu Ɔ̃nɛn bvool wu Ɔ̃mvuul a bia-byɛ.14Ndɛ áwi elaã e ndɛ me ndyam me ndɔɔ a bia-byɛ, kwɛn oŋɔ̃ ndɛ asuun bia-byɛ m'obi bueel bvool asuul bia-byɛ tsɛtsɛ me ndɔɔ yi ekal baal a ndyam, baal b'adzii bam k'asa ãndɔɔ mã ngesɛ.15Omɔ̃ ãndɔɔ mɛn ebvaan yɛ atee y'okwɛn bueel, me ndɔɔ yi awɛɛl baal wuo me ndɔɔ yi awa bɔ hɛ̃ mbyel. Yɔɔl kwɛn mbuul si ɔ̃mɔ̃ abee yɛ opfiɔɔl!Wycliffe Bible Translators, Inc.