Hagai1
1Persia pren kowi Darius chowm mang mih pre ning khe Juda pren kruitown mih dow Sealtiel kowh chapa Zerubabel chekhai, now uamow lang kri mih dow Jehozadak kowh chapa Josua chekhai. Nami ning taruk la kowi kowh lacher pani khe Zerubabel hai Josua iüah kowi nauang tek pe kownkow risi Hagai kowi CHAKRAMANG uang tek pe mih,2“Ang lang kri lang kraing mih CHAKRAMANG tek khowk, maiawngün maru-uüa tek mih, ‘CHAKRAMANG kim nathawp kown mih khin kawmat nadowi tak,’ pakhai,” pape khai.3Nakhowk khe maru-uüa tut-e risi Hagai kowi CHAKRAMANG chinah hanow maiawng kowpe tekah khai:4“Enni matia dow kim iungma mih kowi enni uowi. Tawkche ang kowh kim dow apiaknama enni towta hüah khai. Naiawng enni chang mih taka khai bow?5Ang lang kri lang kraing mih CHAKRAMANG tek khowk. Tawng iawng chow enni chowm uowi mih tuakah büah kaneu.6Ahuma enni sawt liu chepaw luprak ditchow taih enni ka reng. Enni cha chepaw katpaw enni duh dowi chekhai. Enni kham grep tui chepaw duh pat chi enni ka kham dowi. Enni khup tawnguat chepaw enni kowh kow den dowi chekhai. Enni kaah mih tangka pawisa dow apükma mih im kowi enni towah iawng katpaw takrüm dowi chekhai.7“Naiawng rakowi tawng iawng chow enni chowm uowi mih tuakah büah kaneu diah.8Kawmat dow hungma mawngma kowi cham krawi tu singh büah hanow thawp ang kim büah bowt. Naiawng enni chang hanow ang naawmrawm enni kown, now ang naka ringkawra kown.9Luprak ahuma ka kown mih enni sakowmta hüah chowdiah. Tawkche enni ka luprak mih dow ditchow taih. Kim kowi kowh enni uang kuala mih luprak maten ang rownta enni bowk khai. Naiawng ang chang enni mih dow ang kowh kim apiaknama enni towta hüah mih rakowi chekhai. Naiawng apiaknama ang kowh kim uowi khowk chepaw enni matia kim prakowi chowtaih enni lang towsak khai.10Naiawng rakowi mukuang hownia kowh nang tui hai laih kowi kowh luprak mih enni vüi ang taingta khai bowt.11Enni kowh pren kowi üa, laih, hungh, mawng hai enni kowh luprak, grep krum, kanrawn khang, maru, tawncher, krawng luk kowi kowh enni ienah mih chap maten kowi uang nauang dowi kownkow ang peta ana khowk,” pakhai.12Nakhowk khe CHAKRAMANG kowi kram rakowi Sealtiel kowh chapa Zerubabel, Jehozadak kowh chapa uamow lang kri mih Josua hai akeng mih maru maten amatni kowh CHAKRAMANG laiklow iawng hai risi Hagai tek iawng chang khai bowt.13Nakhowk khe Hagai hownia maru kawmuüa kowi CHAKRAMANG tek pe mih, “Ang CHAKRAMANG mih enni tut-e tawi uowi reng chekhai,” pakhai.14Nami kung kowi dow CHAKRAMANG mih Juda pren kruitown mih Zerubabel, uamow lang kri mih Josua hai akeng mih maru maten kowh saktuak uang thowr pe khai. Naiawng rakowi amatni dow lang kri lang kraing mih CHAKRAMANG Thurai chup kim nachang kownkow tarowng khai bowt.15Naiawng Thurai chup kim chang amatni tarowng mih dow Persia pren kowi Darius chowm mang mih pre ning kowi kowh taruk la kowi lacher 24 ni khe chekhai.
The Seed Company