Zekaria9
1Mami dow CHAKRAMANG laiklow chekhai:CHAKRAMANG mik dow bowkbowk prakowi tang mü reng,amülüngma hown Israel chenchap prakowi tang mü reng chekhai.Naiawng rakowi Hadrak hai Damaska marow kowi kingküaah kown CHAKRAMANG tekta mih laiklow dow nauang tachi kown.2Hadrak rihi kowi kowh Hamat marow kowi kingküa kown CHAKRAMANG tekta mih paw nauang tachi kown;Sur hown Sidawn marow kowi kowh maru-uüa dow nowm nowm chanlai khai.Nachenganchepaw amatni kowi kingküaah kown mih laiklow dow nauang tachi kown.3Sur maru-uüa dow tap akroma mih thawpah lowk khai.Nami dow amatni tahen müa thawpah mih chekhai.Amatni kowh tai tangka dow dinchow iawng ahuma uowi khai,amatni kowh kuh paw tiama kowi kowh mawngchawng khowt hu khai.4Nachenganchepaw amatni kowh dawngthawnguan maten dow CHAKRAMANG narupta pe bowk kown;amatni kowh tasen müa chawnlawng dow sata kowi aia nakuakta pe bowk kown,now amatni kowh marow dow maih hown aia natowkta pe kown.5Naiawngün khi hanow Askelawn maru-uüa dow nakram kown.Gaza maru-uüa dow arau hown nachür kown.Naiawng phaw mih khi hanow Ekrawn maru-uüa kowh dow sakowmra nachur kown.Naiawng rakowi amatni paw Gaza maru-uüa hown arau hown nachür kown.Gaza kowi kowh mang kowi dow nasatta kown,now Askelawn marow kowi dow amiapaw uowi kown nadowi bowt.6Asdawd marow kowi dow prenlang maru chuprek chaprekuüa nauowi kown.CHAKRAMANG tek mih,“Filistinuüa kowh bawrira dow ang napiakta pe kown.7Vi hailawm chaknga ang pe chaah kown nadowi bowt,nat ngar hai iung chaah dowi mih chakkham paw cha büah kown nadowi bowt.Amatni pungmadawng kowi ta sing uowi ne kown;nami maru-uüa kowi dow ang maru ang nachangah kown.Amatni dow Juda chenchap iawng natawi own büah kown.Ekrawn maru-uüa paw Jebusuüa iawng ang maru nauang chowng kown.8Krawi sen mih prenlang siphaiuüa rut howniaang kim dow ang nahenah reng kown.Kawmat hownia ang maru-uüa ria kowi ang natawi uowila reng kown,Chang nowng mih maru-uüa dow ang maru-uüa tut-e nauang ia ting kown nadowi bowt,” pakhai.9CHAKRAMANG tek mih,“Aw Jerusalem marow, atünma how diah.Aw ang kowh chama Zaiawn marow, ahuma awmrawm diah.Mü diah, en kowh mang dow en tut-e uang tarü khowk;Aia dow achinawmma mih mang chekhai,aia dow lawng miia chekhai.Aia dow khamsum khamdawma mih maru chekhai.Aia dow kawrngaramchük luk kowi chowm khai,kawrngaramchük chah luk kowi chowm se uang tarü khowk.10Israel kowh tasen müa kawrnga kari ang napiakta pe kown,Jerusalem kowh tasen müa kawrnga ang nahenta pe kown,tasen müa leba maten ang napiakta pe bowk kown.Uang tarü khowk mih mang dow chenchapuüa tut-etaking tasangra lai naphuang bowt kown.Aia naming nakhetah kown mih pren dow mami sata hownia akeng mih sata mowr chekhai,Iufratis aw hownia prenchur nammowt mowr naown kown.11“Aw Jerusalem, vi hown achi tatow sangbowk laitawm khai bowt.Naiawng rakowi akang khawngma mih kuam kowi takhang mih iawng,akeng pren kowi cham takhang mih en maru-uüa kowi ang nakrawi lawngah kown.12Ang khowngra ka kown sakowmma hown uowi mih,akeng pren kowi kowh cham takhang miuüa low,enni kowh akhawtma mih kangchawngra kim kowi plan büa diah;Ang takham khowk, maru pawta enni mih maten ang naplan pe enni iawk kown,auown khe kowh lak-e pre phow chi ang nape enni kown.13Juda maru-uüa kowi dow ang kowh leba iawng ang natawngah kown,Israel kowi dow ang kowh leba sek iawng ang natawngah kown.Aw Zaiawn, en maru-uüa kowi ang natawngah kown,Gris maru-uüa kowi nasenla kownkow en maru-uüa kowi ang natawngah kown,amatni kowi dow saidawng iawng ang natawngah kown,” pakhai.14Nami kung kowi dow aia maru-uüa tut-e CHAKRAMANG nauang tatüng kown,aia kowh leba sek dow pla nowi iawng nakhi-ah kown.CHAKRAMANG dow natum baw kown,aia dow liku iawng mrawkphak prakowi namang kown.15Lang kri lang kraing mih CHAKRAMANG dow aia maru-uüa kowi nalawngah kown,aia kowh siphaiuüa dow huaklu hown ransu-uüa kowi nasenah kown,aia kowh maru-uüa dow ransu-uüa kowi nanowngta kown.Amatni dow awng pawi kowi nakham grep tui kown,pua miuüa iawng dow nahow sawmlawm büah kown.Phuchuara ria kowi puh hown kowh khükta mih vi iawng,amatni ransu-uüa kowh vi dow ahuma nalawt kown.16Nami ni khe dow ruapur hawmh kowi ruapur thing mih lawngah iawngCHAKRAMANG Thurai mih aia maru-uüa kowi nalawngah kown.Amatni dow amatni pren kowi kuh iawng natawk büah kown,mang kowh kuh lukruk iawng dow natawk büah kown.17Amatni dow lainowmma naiung bowt kown,apowm paw lainowmma naklangiung kown.Pren kowi mih uih-ien pantawn lainowmma naiung kown.Naiawng rakowi malauüa klanguüa hawmh paw lainowmma kow iung hown nakür kown.
The Seed Company