Zekaria3
1Now ang plan khi mukmang lowk iawk. Nami mukmang kowi dow CHAKRAMANG kowh kramamu ria kowi uamow lang kri mih Josua iowng mih ang khi khai. Now Josua kowi napeah aprek kownkow hawmlawm prakowi Setan paw tawi iowng khai.2Now CHAKRAMANG kowh kramamu Setan kowi tek pe mih, “Setan, CHAKRAMANG pacham nang en lah! Jerusalem kowi kowh sakrau mih CHAKRAMANG pacham nang en lah. Maih hownia kowh khowngta mih sawp dung iawng dow mami maru kowi CHAKRAMANG lawngah mih lowmow,” pape khai.3Nami khin khe Josua dow asürlawima mih tawnguat khupma hown nami kramamu pur kowi tawi iowng khai.4Now aia ria kowi kowh iowng mih kramamu-uüa kowi nami kramamu tek pe mih, “Josua kowh tawnguat asürlawima mih klüpta pe diah,” pape khai. Now klüpta pe kung kowi nami kramamu tek pe Josua mih, “Josua, en kowh angak ang henta en khowk; kawmat dow uamow tawnguat klangiungma mih ang nakhup en kown,” pape khai.5Now Josua kowi nasui pe napawng kaw sar kownkow ang tawi tek pe khai. Naiawng rakowi kramamu-uüa mih Josua kowi sui pe napawng kaw sar hanow khup pe tawnguat sar khai. Nakhowk khe paw CHAKRAMANG kowh kramamu mih amatni re-e tawi iowng reng tak chekhai.6Nami kung kowi CHAKRAMANG kowh kramamu tek pe Josua mih,7“Lang kri lang kraing mih CHAKRAMANG tek en mih maiawng, ‘En che ang tiama kowi mang hai ang laiklow chün hanow ang kowh kim chimsaima mih hai viadawng kowi kowh lowra luk kowi namingkhet kown mih alow ang nape en kown. Now kawmat kowh ang ria kowi iowng mih kramamu-uüa iawng dow en paw ang pur kowi natawi ka iowng kown,’ pakhai.8CHAKRAMANG kutplan tek iawk mih, ‘Aw uamow lang kri mih Josua, sünta diah. En pur kowi kowh chowm mih akeng mih uamowuüa paw pacham sünta lah. Pur prakowi ang nauang pawla ang nar kown. Aia kowi dow Mia Prek padow narükah kown, now enni uamowuüa dow nami Mia Prek nauangla kown mih ni vüi amatra chekhai.9Josua, en pur kowi ranit dam mih huaklu ang towta lowk. Nami huaklu kowi ang narui pe laiklow lowk kown. Now mami pren maru-uüa kowh angak maten pani sang ang nahenta pe kown.10Nami ni khe dow thaulangma enni nauowi bowt kown; enni bowkbowk chowlowkkow grep mung krüa hai uidut singh tut kowi taiua chowm kownkow auiuauüa kowi enni nahaw kown. Ang, lang kri lang kraing mih CHAKRAMANG tek khowk,’ pape khai,” pakhai.
The Seed Company