Meng Lai94
1Aw CHAKRAMANG, en dow maru ngakuüa kowi pe ripra reng mih Thurai chekhai,amatni kowi dow en kowh kunmarau uang tüng pe diah.2Aw lusa kowi kowh tara chet miia, awr rü diah,chang bawri miuüa kowi dow amatni kowh angak sung peah diah.3Aw CHAKRAMANG, mün ni tak chow?Mün ni tak chow maru ngakuüa nahow sawmlawm kown?4Mün ni tak chow amatni nachang owrow kown?Mün ni tak chow amatni nachang bawri kown?5Aw CHAKRAMANG, amatni dow en kowh maru-uüa kowi kowpiakta nak khai,en changla dawngthawnguan mih en kowh maru-uüa kowi amatni changah nowng khai.6Mamaimow hai prenlang maru-uüa kowi amatni kowngta khai,now saratchowuüa kowi paw amatni saita khai.7Amatni tek mih, “CHAKRAMANG khi a-i dowi;tawng chow a-i chang mih paw Israeluüa kowh Thurai tuk dowi,” pabüah khai.8Abualama mih maru-uüa low, mün khowt tak chow enni nabua kown?aiung angak tukra uowi dowi miuüa low, tawng khe tak chow enni natawi ka prengia iung kown?9A-i kowh param thawp miia Thurai ta dowi pabow?A-i kowh mik thawp miia Thurai khi dowi pabow?10Aia dow chenchap maten kowi kruitown reng,aia dow rip enni dowi tham pabow?Aia dow maru-uüa kowi peah chanlaira reng,tawng chow enni chang mih aia tuk dowi tham pabow?11CHAKRAMANG dow maru kowh saktuak tuk chekhai;aia dow nami saktuak asung uowi dowi pami tuk chekhai.12Aw CHAKRAMANG, en pring hawiah mih maru dow prasira uowima,en kowh rirow en sangah mih maru dow prasira uowima chekhai.13Aia kowi dow phih hownia en lawngah reng chekhai,maru ngakuüa vüi ki thai kuam dowi mowr en lawngah reng chekhai.14CHAKRAMANG dow aia maru-uüa kowi katpaw nanuata kown nadowi,aia changla dawngthawnguan mih aia kowh maru-uüa kowi aia nakuakta kown nadowi.15Tara chetra kowi tara nowm naplan uowi iawk kown.Nami dow achinawmma miuüa nachün kown.16Maru ngakuüa uang kingküa ang mih khin khe mia chow uang khowng ang?Amatni uang kingküa ang mih khin khe mia chow uang tangila ang?17CHAKRAMANG khowng ang dowi e dow ang nakowng prang bowt,now ririm raramma mih makownguüa uowi rah kowi ang cham ki uowi prang bowt.18Ang tatheu khai pahai ang tek mih khin khe,aw CHAKRAMANG, en kowh achur uowi dowi mih sakraura hown en uang dowk ang khai.19Ang tuak kawm tuak krat lai bowt khe,en uang pe ang sakkhawtra hanow en pe awmrawm ang khai.20Angakma mih kruitown miuüa hown dow tawngpaw en kowh tatukra uowi dowi chekhai,amatni dow nachangla ngak kownkow thawp rirow reng chekhai.21Amatni dow anowmma miuüa kowi nakrawi kingküa kownkow takrüp büah khai,achinawmma miuüa kowi nakowngta kownkow amatni dow krawi bek angak khai.22Nachenganchepaw ang kowh akhawtma mih kim dow CHAKRAMANG chowtaih,ang kowh tatung tanimra Singku Huamang dow ang kowh Thurai chowtaih.23CHAKRAMANG dow maru ngakuüa kowh angak sung amatni luk kowi nauang pawla pe kown,amatni kowh lup ngak rakowi amatni kowi aia napiakah kown.CHAKRAMANG a-i kowh Thurai dow amatni kowi asaima napiakah kown.
The Seed Company