Meng Lai83
Asaf kowh meng.
1Aw Thurai, ririmma hang uowi diah;aw Thurai, nawr kowpma hang uowi diah.2Mü madiah, sui en mih ransu-uüa chang ran mih,amatni dow downg rawngrawng se chang bawri khai.3Amatni dow en maru-uüa kowi kingküaah kownkow thawp prengia khai;en takhula miuüa kowi kingküaah kownkow thawp sangkrangra ngak büah khai.4Amatni tatek mih, “Chu, Israel chenchap kowi a-i chumta bowt lah,amatni kowh ming khowm miapaw hang pacham tuk tham bowt lah,” pakhai.5Amatni dow takrüpah hanow thawp sangkrangra ngak khai,kingküa en kownkow takham miuüa dow maiawngün chekhai:6Edawmuüa, Ismaeluüa, Moabuüa hai Hagaruüa,Gebaluüa, Amawnuüa, Amalekuüa, Filistinuüa hai Turauüa chekhai.8Nami klen kowi Asuriauüa paw amatni hown tawi tabawng khai,amatni dow Lawt krungchak Moabuüa hai Amawnuüa kowh kür pek mih chekhai. [Sela]9Aw Thurai, amatni kowi dow Midianuüa kowi en changah iawng changah diah,Kisawn aw pang kowi Sisera hai Jabin iüah kowi en changah iawng changah diah.10Sisera hai Jabin iüah kowi dow Endawr marow kowi en piakah khai,amatchi kowh uak dow krawng kowi su kowh chowng bawr khai bowt.11Ransu-uüa kowh maru iukuüa kowi dow Oreb hai Zeb iüah kowi en changah iawng changah diah,amatni kowh pren kruitown miuüa kowi dow Zeba hai Zalmuna iüah kowi iawng changah diah.12Amatni dow tek mih, “Israeluüa kowh pren a-i khünta pe lah,Israeluüa kowi Thurai peah mih pren a-i powngta pe lah,” pakhai.13Aw ang kowh Thurai, amatni kowi dow li rownla dinchow iawng changah diah,amatni kowi dow li cham rownla chapli iawng changah diah.14Kaurawng kowi dow maih kak now singh kau kam reng,hungh kowi dow maih cham tachan now hungma mawngma kam reng chekhai.15Nami iawng dow en kowh liku uangchak hown amatni kowi krawiah diah;en kowh liku kramra uowima mih hown amatni kowi pe kramah diah.16Aw CHAKRAMANG, en krüa kowi uang khamsum pat,amatni kowi dow pe chamang peah rukrai diah.17Amatni dow chowngchowng saksakma pacham ka rukrai hai pacham kram lah,amatni dow tawmpa rukrai pacham tapiak lah.18Nahanow en kowh ming dow CHAKRAMANG pami natuk büah kown,now en chowtaih palusama kowi kowh lang kri lang kraing mih Thurai pami natuk büah kown.The Seed Company