Meng Lai51
Mami dow David kowh meng chekhai. Mami dow Betseba hown David taphua taiua kung kowi David tut-e risi Nathan uang khe kowh meng chekhai.
1Aw Thurai, en kowh achur uowi dowi mih sakraura rakowi saksing sana ang diah,en kowh saksing sanara hown ang kingküa en mih angak lawtta ang diah.2Ang kowh ngak maten uang sia sauta ang diah,ang kowh ngak hownia uang chimsaita ang diah.3Tawngplawng kowchow panow ang kingküa en mih maten ang tuk chekhai,now ang kowh ngak maten dow ang sak kowi uowi reng chekhai.4Ang dow en luk kowi chowtaih chang ngak khai,now en mik kowi angakma mih lup ang changta khai.Ang ngakma pahai en tek mih anowm chekhai,en kowh tara dow aser auowk uowi dowi chekhai.5Ang kowh dow uang dia hownia angak uowi chekhai,au mu lak kowi uowi reng tak hownia ang kowh angak uowi chekhai.6Tawkche achinawmma ang nauowi kown mih en nau ang khai.Naiawng rakowi ang sak lak kowi pe ang chanlaira diah.7Lawngthow singh mia hown uang sia sau ang diah;nahanow angak hownia ang nachimsai bowt kown.Ang kowi uang sawk sau ang diah;nahanow nangkhe iawng akawma ang naphaw bowt kown.8Piaw hai awmrawm mih klow pe sünta ang diah;en piakta ang nak khowk chepaw kawmat dow pe awmrawm ang diah.9Ang kowh angak nakhi dowi kownkow petta lumowr diah,ang kowh angak maten phiawkta ang diah.10Aw Thurai, achinawmma mih sak pe ang diah,ang kowh lümla mih anowmma plan chang ang diah.11En pur hownia hauang prütta ang diah,ang hownia en kowh Lümlasai hauang pawta ang diah.12En lawng ang khe kowh piawra plan pe ang iawk diah;en kowh alow nachün kown nau mih saktuak pe ang diah.13Nahanow kingküa en miuüa kowi en tiama lawnguan ang ia tüngsangah kown towbowt,now maru ngakuüa mih en prakowi nauang plan kown towbowt.14Aw Thurai, en dow ang kowh lawng miia Thurai chekhai,saita maru mih angak hownia uang lawng ang diah.Nahanow en lawng ang rakowi apiawma ang nakiow en kown.15Aw Thurai, natek lai kownkow uang khowng ang diah;nahanow ang mih nakiow en kown.16Tawncher phuchua kowi dow en awmrawm dowi chekhai,tikah mih uanap kowi paw en awmrawm dowi chekhai.En nau panü dow naiawngün ang nachang en kown taih diah.17En lang nauah mih phuchua dow sak kowi arauma hown uowi mih chekhai;aw Thurai, khamsum khamdawma hai dia sar mih saktuak dow en nuata dowi chekhai.18Aw Thurai, Zaiawn kowi saksing sanaah hai khowngah diah,Jerusalem marow kowi kowh tap mih plan rawah iawk diah.19Nahanow achinawmma mih saktuak hown kowh uanap pawi kowi,tikah mih uanap pawi kowi mih en naawmrawm bowt kown.Now en kowh phuchuara luk kowi maru nauang phuchua chiala kown towbowt.The Seed Company