Meng Lai45
Mami dow Kora krungchakuüa tekah mih “Changlawng plawngnau” meng chekhai. Mami meng dow “Kra pau” meng owi iawng natekah kown.
1Ang kowh sak kowi dow lai ding lai sau kangowh chekhai;mangkri vüi kowi ang thawn pe changlawng plawngnau meng lowk khai.Ang dow meng thawn kiakma mih iawng ang tuk thawn meng khai.2Lusa maru pungmadawng kowi dow en lang klangiung khai;en nawr hownia kowh uang lawt mih dow lai ding lai sau kangowh chekhai.Naiawng rakowi Thurai mih chowngchowng saksakma pe en prasi reng chekhai.3Aw tasen kiakma mih maru, en kowh saidawng mih kelang kowi tapla diah;en tut-e dow kiowrira hai kraingra uowi chekhai.4Anowm, khamsum khamdawra hai tachi tanawmra vüi kowi tasen reng diah,nami tasen naia awngla kownkow en kowh kraingra hown tarü reng diah.Nahanow en kowh akürma mih rut hown kri kraingma mih lup en naia chang kown.5En ransu-uüa kowi dow achukma mih leba sek hown en ap-ah reng,en kowh ransu chenchapuüa dow en khawk daw kowi uang khamsum reng chekhai.6Aw Thurai, en kowh mang chowm rah dow chowngchowng saksakma anikma nauowi kown,en dow en kowh maru-uüa kowi anowmma hown en kruitown reng chekhai.7Anowm kowi dow en sakrau reng, now angak kowi en sui reng;naiawng rakowi Thurai, en kowh Thurai dow lang klo en khai,now akeng miuüa kowi lak-e awmrawmra kraingma aia lang pe en khai.8En kowh mang tawnguat kowi dow nam iungma mih sau, asung khakma mih singh pun hai paingbawng nam uowi chekhai,ngasai sa hown tawngah mih mang kim kowi aiang uowi mih tünteu chang müa tün hown en piaw khai.9En kowh ringkaw uowima mih masiuüa pungmadawng kowi dow mang chama uowi ne chekhai,en hawmlawm prakowi dow Ofir pren hownia kowh kuh uanh hown tatawng mih en nachangla masi kown mih masiuüa uowi chekhai.10Aw mang masi, ang laiklow sünta diah, pe ching diah;en kowh chen nawiuüa kowi hangkow tuak tham bowt,now en kimchakuüa kowi paw hangkow prüa tham bowt.11Tawngplawng kowchow panow en klangiung rakowi en hua dow nanau en bowt kown,aia dow en kowh kimrengia chekhai rakowi aia kowi en naring nakawah kown takla.12Tura marow kowi kowh kurengma miuüa dow nauang pawla en awmrawm sung kown,amatni dow en tut-e uang hanow nauang lü khowng kown.13Mang kim kowi dow mang masi mih lainowmma klangiung khai,aia khupah mih tawnguat dow kuh hown kowh tawngah mih chekhai.14Sawt pe bawng mih tawnguat khupma hown aia kowi dow mang tut-e nakowpawla kown;aia tut-e kowh tawi mih narma malauüa hawmh paw mang re-e nakowtawi kown.15Amatni dow apiaw apama hown mang kim kowi nauang kown,amatni dow mang kim kowi nauang kup büah kown.16Aw mangkri, en chapauüa dow en pipu-uüa iawng nata chowm mang kown;amatni kowi dow palusama kowi kowh pren kruitown mih en nachangah kown.17Ang kowh meng dow achowngma en kowh ming iung natown en reng kown.Naiawng rakowi chenchapuüa dow chowngchowng saksakma nakiow en kown.The Seed Company