Meng Lai22
Mami dow David kowh meng chekhai. Mami meng dow “Rau-e kowh naki iia” pami meng owi iawng natekah kown takla.
1Ang kowh Thurai, ang kowh Thurai, tawngplawng kowchow en powtta ang khai?Tawngplawng kowchow kar se ang awr lü mih en sünta ang dowi?Tawngplawng kowchow takhula ang dowi kowi alakma en lang uowi khai?2Aw ang kowh Thurai, ni towng ang awr haw en reng.Tawkche en iu klang ang dowi chekhai.Iak towng ang awr haw en reng.Nachenganchepaw ang ka iungra dowi chekhai.3Tawkche en dow chimsaima chekhai;en dow mang chowm rah kowi chowm hanow Israeluüa kowh rowsi kiowrira ka khai.4Anging kowh pipu-uüa dow en luk kowi chowtaih neplawng nesak reng,now amatni kowi dow en takhula reng chekhai.5En tut-e amatni uang kar hanow amatni kowi dow en takhula reng chekhai,en luk kowi neplawng nesak hanow amatni dow cham kla rukrai dowi chekhai.6Nachenganchepaw ang dow maru nadowi, lowngsur kambawr chowtaih;ang kowi dow maru nü ang klowk ang dowi kowi sui ang khai.7Khi ang miuüa maten dow changla ang rensi kau khai,amatni dow kharema hown mü ang reng, now ngüp lu se tek büah mih,8“Aia dow CHAKRAMANG luk kowi neplawng nesak reng chekhai.Naiawng rakowi aia kowi mih CHAKRAMANG pacham takhula lah!Aia luk kowi dow CHAKRAMANG sak-ihah reng chekhai.Naiawng rakowi aia kowi mih CHAKRAMANG pacham takhula lah,” pakhai.9Au mu lak hownia uang lawtla ang mih dow en chowtaih,ang kham iawn reng tak hownia en luk kowi neplawng nesak kown mih en sang ang khai.10Uang dia kung kowi ang kowi mih en rut kowi ap en khai,au mu lak kowi ang uowi hownia en chowtaih ang kowh Thurai.11Ang hownia alakma kowi hang cham uowi diah;tawngplawng kowchow panow ang kowh phih uang tawn khai bowt,phih hownia nalawng ang kown mih miapaw uowi dowi chekhai.12Ang kowh ransu-uüa dow chiala hawmh iawng rumta ang chuk khai;amatni dow Basan pren kowi kowh akürma kangowh mih chiala iawng umta ang lut khai.13Krawi cham chak khe kowh krangsi hek klow iawngamatni dow kingküa ang kownkow hata nawr hüah khai.14Tui takhük iawng ang kowh dow kür khowk bowk khowk,ang kowh kung ming pang ming dow tasüt tasowi bowk khowk;iawn maih iawng ang kowh sak dow ter bowk khowk chekhai.15Akangma mih bawn kawng sek iawng ang kowh kür dow kang bowk khowk,ang kowh dai dow krang kowi tadan tüng khowk.En nape kowng ang kownkow bawn dawng kowi en iüata ang hüah khai.16Ang kowh ransu-uüa dow kui hawmh iawng rumta chuk khai,amatni dow ang kowh rut hai khawk ün iaita ang nak khai.17Naiawng rakowi ang kowh hut khowm kaah rüa khai bowt,ang kowh ransu-uüa dow awmrawm kowh tang müla ang mak khai.18Amatni dow ang kowh tawnguat taretah büah khai,now ang kowh khupdip tawngklai vüi kuak plang büah khai.19Aw CHAKRAMANG, alakma kowi hangkow cham uowita ang diah!Aw ang kowh kür, uang khowng ang kownkow alenma uang diah!20Saidawng rut hownia uang takhula ang reng diah,pai iawngün kui hawmh hownia ang kowh asung khakma mih chownglawng towkala ang diah.21Naiawngün krangsi nawr hownia uang lawng ang diah,naiawngün chiarowngla nang hownia uang towkala ang diah.22Ang tainau-uüa tut-e en lawnguan ang nakrawi phuang kown;en kowh maru-uüa takua talawm mih rah kowi ang nakiow en kown.23CHAKRAMANG kowi ringkaw miuüa low, aia kowi rowsiah diah!Jakawb kowh krungchakuüa low, enni mih aia kowi ringkawah büa diah!Israel krungchakuüa low, enni mih aia kowi towah kiowri diah!24Aia dow ngare miuüa kowi suiah dowi hai nuata hüah dowi chekhai,aia dow amatni hownia cham dangta pe lumowr dowi chekhai.Naiawng changah lak dow amatni awr lü khowng mih aia hawt sünta pe reng chekhai.25Aw CHAKRAMANG, en kowh maru-uüa takua talawmra kri kowi ang nakiowri en kown,ringkawma hown kram en miuüa pur kowi ang takhamta mih uanap maten ang nachang en kown.26Ngarawng ngarai miuüa dow aduma naka cha reng kown,CHAKRAMANG kowi cham miuüa dow CHAKRAMANG kowi nakiowah kown.Amatni kowh sak dow chowngchowng saksakma pacham piaw reng lah.27Prenchur nammowt kowi kowh maru-uüa paw dia sar hanow CHAKRAMANG tut-e nauang kown,palusama kowi kowh chenchap maru maten paw aia pur kowi natabawk hanow aia kowi nachup naiiaah kown.28Tawngplawng kowchow panow CHAKRAMANG chowtaih mang,chen towng chap towng kowi kowh kruitown mih dow aia chowtaih.29Lusa kowi kowh kurengma miuüa paw aia pur kowi nacha nakham kown,now aia kowi nachup naiiaah kown.Kowng ngialia miuüa paw aia pur kowi nauang tabawk kown,now aia kowi nachup naiiaah kown.30Pur prakowi kowh krungchakuüa dow aia kowh lup nachang bowt kown,now maru-uüa tut-e mih CHAKRAMANG lawnguan natek büah kown.31Amatni dow aia tachi tanawm mih lawnguan nakrawi tek kown,amatni dow kawmat kowh uang dia dowi tak miuüa tut-e CHAKRAMANG changah mih lup lawnguan nakrawi phowng kown.The Seed Company