Meng Lai21
Mami dow David kowh meng chekhai.
1Aw CHAKRAMANG, en peah kür rakowi mang dow awmrawm reng,en pe awngah khai rakowi aia dow lainowmma piaw reng chekhai.2Aia kowi dow aia nau mih en peah khai,aia awr lü mih sia en peah reng chekhai.3Aia kowi dow en peah iungra khai, now aia kowh lup en pe chawnah khai,aia lu kowi dow kuh hown kowh mang lukruk en kruk pe khai.4Aia dow en tut-e uang lü singra khai, now aia kowi dow en peah khai,aia kowi dow chowngdawng sakklangma en pe singah khai.5En pe awngah rakowi aia dow ringkawra ahuma ka khai,aia kowi dow kiowrira hai kraingra en peah khai.6Aia kowi dow chowngchowng saksakma vüi en peah prasi khai,en tawi uowila reng rakowi aia dow lainowmma piaw khai.7Tawngplawng kowchow panow mang dow CHAKRAMANG luk kowi chowtaih neplawng nesak reng,lang kri lang kraing mih Thurai kowh achur uowi dowi mih sakraura hown mang dow anikma nauowi kown.8Aw CHAKRAMANG, en kowh ransu-uüa maten kowi dow en nakhümta bowk kown,sui en miuüa maten dow en hawmlawm rut kowi nauang tapham kown.9En uang mih khin khe amatni kowi dow maih hown en napiakah kown.Amatni kowi dow en kunmarauah rakowi en napiakah kown,amatni kowi dow maih hown en nakamta kown.10Lusa hownia dow amatni kowh chauüa kowi en namata pe kown,lusa maru pungmadawng hownia dow amatni kowh krungchakuüa kowi en namitta pe kown.11Amatni dow nakingküa en kownkow thawp prengia ngak khai.Tawkche amatni kowh sangkrangra ngak dow nachawn kown nadowi.12Tawngplawng kowchow panow amatni kowi tawngah now en nauüi leba kown.Nakhowk khe amatni dow khawlawt dowi kowi apowt natakla kown chekhai.13Aw CHAKRAMANG, en kowh kür uang tüng diah;nahanow en kowh kürra kowi anging narowsi hai natek meng kown.The Seed Company