Chanlai Lawng24
1Maru ngakuüa kowi hangkow irsi diah,amatni hown taiua uowi kown mih paw hangkow nau büa diah.2Tawngplawng kowchow panow amatni kowh saktuak dow nakrawi chang nowng kown mih kangowh chekhai,amatni talawp mih dow nakrawi chang ngak kown mih lawnguan kangowh chekhai.3Chanlaira hown dow maru thawp kim reng,prengia hown dow kim mih akhawtma changah reng.4Tukra hown dow asung khakma mih hai klangiungma mih uanh nowng kram reng,now naiawngün uanh dow akhawtma mih kim tek pat towah reng chekhai.5Chanlaima mih maru kowh dow ia changra huma chekhai,tukra uowima mih maru kowh dow kür hu ngamlam chekhai.6Cham dowk tasen kown now cham rik paw prengia diah,prengia pek mih akawmma uowi hanow tasen awng reng chekhai.7Abualama mih maru dow chanlaira laiklow tukta dowi,aia dow marow tapplawt kowi kowh takua talawmra kowi tawngpaw tawi tek dowi chekhai.8Chang angak kownkow sangkrang reng mih maru kowi dow maru ngak pahai maru tuakah reng,now aia kowi kingküa dawma mih maru pahai maru tukah reng chekhai.9Abualama mih maru kowh sangkrangra dow angak chekhai,prawngren dawma mih kowi dow maru suiah reng chekhai.10Kla phih mih khin khe hangkow sak nen diah,en sak nen mih dow en kowh kür uowi dowi mih chekhai.11Chet pe tara nowm dowi kowi kowngta kown mih maru kowi lawngah diah,naiawng mih maru kowi nakrawi lawng kown mih hangkow awi-ai diah.12“Tawngpaw ang tawi tuk dowi,” pahai hang tada diah.Tawngplawng kowchow panow Thurai dow en kowh saktuak tuk reng.Aia dow en tuakah mih maten tuk reng,aia dow maru maten changah mih lup iawng nape aklai kown.13Chapa ow, cha kuai tui diah.Nami dow en vüi iung müa chekhai.Aba hownia cha kuai tui diah.Nami dow en nawr kowi nading kown.14Nami iawng chanlaira paw en sak vüi iung müa chekhai;en kowh chanlaira uowi now en chownglawng kowi sakowmra uowi,now en kowh sakowmra dow natapiak kown nadowi bowt.15Achinawmma mih maru kowh kim hangkow krawi powng diah,naiawng mih maru kowh kim hangkow krawi piak diah.16Achinawmma mih maru dow tim ranit kat chepaw awr plan rü reng.Tawkche maru ngak dow piakra uang ting akat now hing piak reng chekhai.17En kowh ransu tim khe hang awmrawm diah,aia tatheu mih khin khe hang piaw diah.18Naiawng en chang mih CHAKRAMANG khita hanow aia dow nasak-ih en kown nadowi,now en kowh ransu kowi dow aia naripah kown nadowi bowt.19Maru ngakuüa lawnguan tata hanow hang tuak krat diah,maru ngakuüa kowi khita hanow hang irsi diah.20Tawngplawng kowchow panow amatni kowh dow tawngpaw sakowmra uowi dowi,now maru ngakuüa dow mit kown chowbowt mih maibu iawng chekhai.21Chapa ow, CHAKRAMANG hai mang kowi kram hai ringkawah diah,CHAKRAMANG hai mang kowi kingküa dawma miuüa hown hang tawi tahum diah.22Tawngplawng kowchow panow amatni dow linlanma napiak kown,CHAKRAMANG hai mang hownia ripra uang ting kown mih dow miapaw tuk dowi chekhai.23Maiawngün paw chanlaima miuüa kowh laiklow chekhai:Tara chetra kowi mia kowi paw tangila kown iung dowi chekhai.24Chang ngak mih maru kowi tek pe maru iung mih tara chet miia kowi dow pren towng nam towng kowi kowh maru-uüa mih nakhareah kown,now aia kowi dow chen towng chap towng kowi kowh maru-uüa mih napeah piati kown.25Tawkche chang ngak mih maru kowi maru ngak pahai phuang mih tara chet miia dow aiungma chekhai,aia dow aia chownglawng kowi naiungla kown mih prasi naka kown.26Auiua che tek lainowm khai hanownami dow auiua ching pami tatukra chekhai.27Prang kowi kowh lup rik churta bowk diah,üa hai laih ün rik kamrütta kaneu diah.Nami kung kowi phai chang kim iang.28Tawngpaw tawi tuk dowi matchang en kimping namkhetuüa kowi kingküala mih saksi hang tawi thuak diah,now amatni lawnguan kowi hang tek dai lai diah.29“Aia chang ang iawng ang paw nachangah kown,aia chang mih iawng ang nasat pe aklai kown,” padow hang tek diah.30Silikma mih maru kowh laih ria iawng ang cham kowi khai,abualama mih maru kowh grep krum iawng ang cham mang khai.31Nakowi dow chuh mung hing tamum klum khai,mawh awr ru kowh krawng kowi hing tasak khai,hua hown kowh tap paw tim khai.32Naiawngün ang khita hanow ang pawtuak khai,nami hownia ang ka tatukra mih maiawng:33Müi nawngchow tak, müi rau reng tak,mawk se em rut nawngchow tak pahai uowi miuüa tut-e dow alenma akhawr nauang ting kown,now damra thowkta kung kowi ta ngarai mih iawng naphaw kown.
The Seed Company