Chanlai Lawng22
1Ahuma dawngthawnguan uowi mih lak-e ming iung nang iung uowi mih lang iung,kuh hai tai lak-e maru hownia ka ringkawra mih lang iung chekhai.2Maru maten dow CHAKRAMANG thawpah mih chekhai,kurengma mih hai ngaraima mih paw aia thawpah mih chekhai.3Prengia uowima mih maru dow kla phih kown mih tuk hanow lang tahen reng.Tawkche abualama mih maru dow kla phih kown mih tuk chepaw thüa reng rakowi kawm reng.4Khamsum khamdawma mih maru dow kurengra, ringkawra hai chowngdawng sakklangra ka reng;Thurai kowi ringkawma hown kram mih maru dow kurengra, ringkawra hai chowngdawng sakklangra ka reng chekhai.5Maru ngakuüa mangah mih tiama kowi dow phih hai akrat pusa kangowh chekhai.Tawkche kowmatia kowi takhet kaneu mih maru dow naiawng mih hownia lang tahen reng.6Tiama nowm kowi namang kown mih chauüa kowi tüngsangah diah,nahanow amatni lawngtang mowr pat naiawng nachang büah kown.7Kurengma mih maru dow ngaraima mih maru luk kowi chang alow reng,pe lowi mih maru dow paw lowi mih maru luk kowi chang alow reng.8Angak liu sawt mih maru-uüa dow achur kowi angak uih nangen kown,nahanow kunmarau rakowi aia krawi chang nowng mih dow nataing kown towbowt.9Kawklawma mih maru dow aia kowh chakkham ngarai miuüa kowi retla pe reng.Naiawng rakowi aia dow ka prasi reng chekhai.10Prawngren dawma mih maru kowi prütta diah,nahanow taüara, taranra hai tanangra nauowi kown nadowi bowt.11Saktuak chinawmma mih hai saksing sanara laiklow tek khai hanow,naiawng mih maru hown dow mangkri chang auiua reng chekhai.12Tukra uowima mih maru kowi dow CHAKRAMANG khowngah reng.Tawkche kaah sakowm dowi mih maru kowh sangkrangra dow aia pe tachiah dowi chekhai.13Silikma mih maru dow kim kowi uowi phulu chekhai,aia dow, “Prang kowi cham lawt now krangsi mak,” padow tek reng.14Chang iang mih masiuüa kowh laiklow dow abüpma mih kuam iawng,CHAKRAMANG kunmarauah mih maru dow nami kuam kowi nadowh kown.15Ngeuüa dow bualama mih lup chang reng chekhai.Tawkche pringah hawiah hanow naiawng mih lup nataingta kown.16Kureng kown nau rakowi ngarai miuüa kowi chang nowng mih maru dow nangarai kown,kurengma mih maru kowi pe awmrawm sung mih maru paw nangarai kown.17Chanlaima miuüa kowh laiklow sünta diah,ang tüngsang en mih kowi kaneuma pe ching diah.18Naiawngün laiklow en tuakah reng hanow en napiaw kown,naiawngün laiklow dow phuangah reng diah.19Naiawngün dow ani ang pe tuk pe ta en khai.Nami dow CHAKRAMANG kowi en pacham neplawng nesak lah pakowh chekhai.20En vüi ang ruita chanlai laiklow süngkawm chap khowk,naiawngün dow tukra hai chanlai lawng atekma chekhai.21Naiawngün hownia dow anowmma mih hai achingma mih lawnguan en natuk kown,nahanow uang chin en miuüa kowi aiungma en nanowng tek pe kown towbowt.22Ngaraima mih maru-uüa kowi kür hown hangkow paw pe uanh diah,ngaraima mih maru-uüa kowi dow tara chet kowi hangkow changah nowng diah.23Tawngplawng kowchow panow amatni kowi dow CHAKRAMANG natangila kown chekhai,amatni kowi rup pe uanh mih maru kowi dow CHAKRAMANG nakowngta kown.24Kunma ngakma mih maru hown hang ta-auiua diah,kunmarau naklak mih maru hown hang taiua diah.25Aia hown en taiua hanow aia iawng en natawi phaw kown towbowt,nahanow nami hownia en natawi piak kown towbowt.26Maru paw lowi mih kowi hang tawi takham diah,aia nowng pe dowi now en nape kown mih hang tawi takham diah.27En tawi takhamta mih che en nowng pe dowi hanow,en kowh uowi mih maten klen kowi en kowh mawk rah khowm napawta en kown.28En kowh pipu-uüa dow sünghi mat müa chowkla hua ai khowk,naiawngün mat müa dow hangkow krawi sütsowita diah.29Akiakma tuk chang lup mih maru kowi dow manguüa pe changah lup reng,naiawng mih maru dow iawngpa mih maru nimkrüa kowi nachang lup kown nadowi.
The Seed Company