Chanlai Lawng21
1Aw kowi kowh tui dow CHAKRAMANG kruiah mih iawng hawr reng,nami powm iawng mang kowh sak mih CHAKRAMANG kruiah reng chekhai.2Maru-uüa dow amatni changah mih lup maten anowmma padow tatuak reng.Tawkche CHAKRAMANG dow amatni kowh sak nowk pe khai pe reng chekhai.3CHAKRAMANG dow aia kowi tawncher hown phuchuaah mih lak-eaiungma hai anowmma chang lup mih kowi lang awmrawm chekhai.4Maru ngakuüa dow chang bawri hai chang owrow reng,amatni changah mih lup dow angak kangowh chekhai.5Rik tuakah kaneu kowh aklumma chang lup mih maru dow ahuma ka dawngthawnguan reng.Tawkche rik tuakah dowi matchang sakkrowng sakkrangma chang lup mih maru dow ngarai reng chekhai.6Kuan rak hown kowh kaah mih dawngthawnguan dow khowt pat natak kown nadowi,naiawng chang angak rakowi aia dow nakowng kown.7Maru ngakuüa dow krawi chang nowng powng rakowi napiak kown.Tawngplawng kowchow panow amatni dow anowmma mih lup chang kown nau dowi chekhai.8Chang lup ngak mih maru dow tiama kuikekma mih kowi mang reng.Tawkche achinawmma mih maru dow tiama nowm kowi mang reng chekhai.9Taran dawma mih masi hown kim kowi taiua uowi mih lak-ekowmatia malowkchow kimluk kowi uowi mih lang iung chekhai.10Maru ngak dow lup ngak chang kowi anauma,aia dow aia kowh kimping namkhetuüa kowi saksing sanaah dowi chekhai.11Prawngren dawma mih maru kowi ripah diah,nahanow abualama mih maru paw natawi tarip kown.Prengia uowi mih maru kowi pringah hawiah diah,nahanow aia dow naka tukra iung kown.12Anowmma mih Thurai dow maru ngakuüa changah mih lup tuk reng,aia dow naiawngün maru ngakuüa kowi piakah reng chekhai.13Ngaraima miuüa kar se lü khowng mih khin khe sünta pe dowi hanow,kar se aia lü khowng mih khin khe paw maru nasünta pe kown nadowi.14Kunmarau en mih maru kowi kukpa peah awmrawm sung diah,nahanow aia kowh kunmaraura naprowng kown towbowt.15Achinawmma mih maru-uüa dow tara nowm kowi awmrawm reng.Tawkche tara nowm dow maru ngakuüa vüi piakra chekhai.16Prengia tiama hownia kowh lang powt mih dow abualama kowh chekhai,aia dow kowng miuüa uowi rah kowi natawi uowi kown.17Piawra prakowi lowpa mih maru dow nangarai kown,kham rak mih hai asung khakma mih chakkham lowpa miuüa paw nakureng kown nadowi.18Maru ngakuüa dow achinawmma mih maru kowi towkah akrat reng.Tawkche achur kowi dow amatni chowtaih nakawm nakrat kown.19Taran dawma mih hai kunma ngakma mih masi hown taiua uowi mih lak-esüngrüp süngkangma kowi kowmatia malowkchow uowi mih lang iung.20Prengia uowima mih maru kim kowi dow asung khakma mih uanh uowi reng.Tawkche abualama mih maru dow amatni kaah mih srui cham sunta reng chekhai.21Anowmma hai kaah sakowmma mih tiama kowi süngürma hown mang diah,naiawng mang mih maru dow singra, prasira hai ringkawra naka kown.22Chanlaima mih maru dow akürma miuüa kowh marow krawi sen reng,amatni sakowmah mih akhawtma mih kangchawngra kim dow aia krawi piakta pe reng chekhai.23Kowmatia nawr hai dai mih khetah kaneu diah,nahanow phih hownia en naia talawng kown.24Prawngren dawma mih maru dow bawrima hai owrowma chekhai,naiawng mih maru dow abawrima hown chang lup reng chekhai.25Silikma mih maru dow chang lup kown nau dowi,aia dow silik rakowi akhawr hown nakowng kown.26Tawngbak mih maru dow ka kown mih saktuak kangowh chekhai.Tawkche achinawmma mih maru dow akawklawma hown pe reng chekhai.27Maru ngakuüa kowh phuchua dow CHAKRAMANG sui reng,angakma mih tuak hown amatni phuchuaah mih khowm aia lang sui ngamlam chekhai.28Thuak dai lai saksi mih maru dow napiak kown.Tawkche tek lainowm mih maru kowh laiklow dow maru nasünta pe kown.29Maru ngak dow sangprowk laitek kowi mapaw rukrai dowi.Tawkche maru iung dow chang lup dowi rawn rik tuakah kaneu reng.30Maru kowh chanlaira hai prengia hown dow CHAKRAMANG kowi nowng kingküaah dowi chekhai,now lusa maru kowh kamrütra hown paw CHAKRAMANG kowi nowng kingküaah dowi chekhai.31Kawrnga dow tasen khe kowh vüi kamrütiama towta reng.Tawkche awngra dow CHAKRAMANG hownia chowtaih.
The Seed Company