Chanlai Lawng19
1Tek dai lai mih abualama mih maru lak-eanowmma uowi mih ngaraima mih maru lang iung.2Tukra uowi dowi mih naura dow iung dowi chekhai,chang lup khe sakkrowng lai now lup tawi reng chekhai.3Tawngbak mih maru dow aia buala lai rakowi piak reng.Tawkche aia dow CHAKRAMANG kowi sak-hiah reng chekhai.4Kurengma mih maru dow ka auiua sar reng.Tawkche ngaraima mih maru kowi dow auiuauüa nuata reng chekhai.5Thuak dai lai saksi mih maru dow naka ripra ngengche kown.Tawkche tek dai lai mih saksi dow naia plai kown nadowi.6Maru iukuüa hownia kala khowng kownkow maru tow auiua reng,pe awmrawm sung mih maru kowi dow maru naukhi-ah reng chekhai.7Ngaraima mih maru kowi dow aia kowh tasin taken miuüa suiah reng,aia kowh auiuauüa khowm aia kowi dow riaah reng chekhai.Aia dow auiuauüa hown krawi taklang reng.Tawkche amatni dow aia kowi klangah dowi chekhai.8Chanlaima mih maru dow kowmatia kowi tasakrau reng,aiung angak tukra uowi mih maru dow ka iungra reng chekhai.9Dai lai saksi thuak mih maru dow naka ripra ngengche kown,tek dai lai mih saksi dow napiak kown.10Abualama mih maru dow asowrma nauowi kown mih lahawm dowi chekhai,mang chapauüa luk kowi nar nachang alow kown mih khowm mapaw lahawm dowi chekhai.11Prengia uowi mih maru dow kunmarau naklak dowi chekhai,chang ngak mih maru kowi bekah angak dowi mih maru dow ka ringkawra reng chekhai.12Mang kowh kunmarau dow krangsi hek klow iawng kramra uowima chekhai.Tawkche aia kowh sanara dow bawrchak luk kowi nang kla khe kowh iawng chekhai.13Abualama mih chauüa rakowi dow u-pa luk kowi piakra uang ting reng,taran dawma mih masi dow uang iat daplap mih iawng hing pusata hüah reng.14U-pa nowngia pe mih dow kim üa hai dawngthawnguan chowtaih.Tawkche prengia uowima mih masi nowngia pe mih dow CHAKRAMANG chowtaih.15Silikma mih maru dow müi dawma chekhai,silik lup chang mih maru dow akhawr hown bowm reng.16Thurai rirow chün mih maru dow ka singra reng.Tawkche aia kowh rirow prakowi pe ching dowi mih maru dow nakowng kown.17Ngaraima mih maru kowi khowng mih dow CHAKRAMANG kowi pe lowi mih iawng chekhai,nami lup sung dow CHAKRAMANG aiamat ngengche napeah kown.18Khin uowi reng tak khe en chauüa kowi hawiah diah,hawiah dowi mih dow nape piakah kownkow en khowngah mih iawng chekhai.19Kunma ngakma mih maru kowi dow ripah ngengche diah,nadowi now aia nacham kla phih kown mih hownia plan plan alawng natakla kown chekhai.20Prengia lai hai pringhawi lai sünta diah,nahanow en naka chanlaira kown.21Maru-uüa dow amatni nau changah kown mih lawnguan kowi ahuma sangkrang reng.Tawkche CHAKRAMANG naukrang iawng chowtaih nauang tachi kown.22Maru dow achur uowi dowi mih sakraura nau reng,dailama mih maru lak-e ngaraima mih maru lang iung.23CHAKRAMANG kowi ringkawma hown kram mih maru dow aia kowh chownglawng kowi sak-ih reng,naiawng mih maru luk kowi dow phih uang kla dowi kowi thaulangma uowi reng chekhai.24Silikma mih maru dow hawm rowm kowi tangta rut hüah khowk chepawnawr kowi awr sawk hawm kown mih khowm nau dowi chekhai.25Prawngren dawma mih maru kowi dow ripah diah,nahanow abualama mih maru natawi tarip kown towbowt.Prengia uowi mih maru kowi pringah hawiah diah,nahanow aia dow naka tukra kown.26A-pa kowi chang nowng mih hai a-u kowi prüt mih chauüa rakowi dow upa-uüa ka rukrai reng,now prawng renra kowi paw cham kla reng chekhai.27Chapa ow, ang kowh pringhawi laiklow sünta diah,nadowi now en tukah mih paw en natamata kown chekhai.28Angakma mih saksi dow tara nowm kowi changla rensi reng,maru ngakuüa dow angak chang kowi lainowmma nau büah khai.29Prawngren dawma miuüa vüi dow kamrütta pe ripra hüah khowk,bualama miuüa vüi paw towta pe müa kaneu khowk.
The Seed Company