Chanlai Lawng18
1Mia hown paw taklawp taiua dowi mih maru dow kowmatia sak nau iawng chang reng,aia dow maru sangkrangta kaneu mih lup lawnguan kowi tawi nauta reng dowi chekhai.2Abualama mih maru dow aiung angak tuk kown nau dowi,aia süngür mih dow aia kowh saktuak pe tuk pe ta kown mih krowngchow chekhai.3Chang lup ngak mih kowi dow maru suiah reng,powingia uowi dowi mih kowi dow maru prawng renah reng chekhai.4Chanlaima mih maru kowh laiklow dow krawng dawng tui iawng chekhai,krawng dawng tui iawng aia nawr hownia dow chanlaira laiklow uang lawt reng.5Chang ngak mih maru kowi tangila kown iung dowi,achinawmma mih maru kowi angakma nachet pe tara kown mih iung dowi.6Abualama mih maru kowh nawr dow taranra prakowi pawla reng,aia dow aia laiklow rakowi cham dang müa reng chekhai.7Abualama mih maru luk kowi piakra uang ting mih dow aia laiklow rakowi chekhai,aia dow aia laiklow rakowi tauowk reng chekhai.8Taprawng taren mih laiklow dow asowrma mih chakkham iawng.Naiawng rakowi nami dow maru cha kown mih lainowmma nau khai.9Silik lup chang mih maru dow angakma chekhai,aia dow lup ngak chang mih maru hown katsang chekhai.10CHAKRAMANG ming dow akhawtma mih kimkrowng iawng chekhai,achinawmma mih maru dow nakowi alenma kowkowi hanow ka lawngra reng chekhai.11Kurengma mih dow aia kowh dawngthawnguan hown nowngia talawng pami ka tuak reng,aia kowh dawngthawnguan kowi dow aia kowh talawng müa tap iawng tuakla khai.12Piak dowi rawn maru chang bawri reng,ka ringkawra dowi rawn maru khamsum khamdaw reng chekhai.13Maru kowh laiklow rik sünta dowi matchang hang klang diah,naiawng klang mih dow uowiah parukrai hai abualama mih lup chang mih chekhai.14Arau abau uowi khe sakkhawtra uowi khü chiang maru nowng ka iungra.Tawkche sakkhawtra uowi dowi now naiung kown mih sakowmra uowi dowi chekhai.15Prengia uowima mih maru kowh sak dow krawi kram tukra reng,chanlaima mih maru kowh param dow krawi cham tukra reng chekhai.16Pankrima mih maru hown takrum kown nau now pawla pe awmrawm sung diah,nahanow aia hown nakowtalawp kownkow aia pur kowi naia kowi kown.17Tara chetra kowi kowmatia lawnguan rik tek khe dow kaah owm iawng chekhai.Tawkche nami maru kowi akeng mih maru uang lüntaah khe dow aia kowh angak tatüng reng chekhai,18Pankrima mih maru pre ia taran khe kuak pe plang hanow iungra uang ia phaw chekhai,nami plang kowi cha iawng amatchi dow chang reng chekhai.19Auiua kowi khowngah hanow aia dow akhikhawtma mih tap iawng natowkala en kown.Tawkche aia hown che en taran khai hanow aia dow nabüngta en kimplawt kown.20Lai iung tekra hownia dow maru ka sak-ihra reng,aia laiklow iawng aia luk kowi uang phaw reng chekhai.21Laiklow rakowi dow sing paw ia sing, kowng paw ia kowng reng,amatni tekta iawng amatni luk kowi uang phaw reng chekhai.22Ka masi mih maru dow ka prasira khai.Nami dow CHAKRAMANG sanara luk hownia kaah mih chekhai.23Ngaraima mih maru dow kurengma mih maru tut-e lü khowng reng.Tawkche kurengma mih maru dow peah rukrai se klangah reng chekhai.24Auiua nowm dowi mih dow akawmma chepaw piak reng.Tawkche tawngbak mih auiua dow kowmatia tainau lak-e lang kaah sakowmra chekhai.
The Seed Company