Chanlai Lawng1
1Maiawngün dow mang Sawlawmawn kowh chanlai lawng chekhai,aia dow Israel mang David kowh chapa chekhai.2Maiawngün ruila mih dow maru nakala chanlaira hai prengia kownkow,aiung angak tukra maru nakala ngamlam kownkow,3lowkkowlowk aiungma hown naia taiua uowila kownkow,lahawm taka iawng, anowmma hai aiungma naia uowila kownkow,4prengia uowi dowi miuüa naia kala prengia kownkow,tukra hai aiung angak tukra klanguüa hawmh naia kala kownkow chekhai.5Chanlai miuüa dow maiawngün prengia lai pacham sünta hai pacham tasang lah,now prengia chakma miuüa dow mami ta hanow aiungma pacham tuk uowi lah.6Nahanow laiuat hai abüpma mih laiklow naia tukta kown towbowt,now chanlai miuüa kowh laiklow hai ta-aw lai natukta kown towbowt.7CHAKRAMANG kowi ringkawma hown kram mih dow tukra uown tarowng mih chekhai.Nachenganchepaw bualama miuüa dow chanlaira hai pringhawi kowi nau dowi chekhai.8Chapa ow, en pa kowh prengia pek sünta diah,en u sang en mih hangkow nuata diah.9Naiawngün dow en lu kowi kowh napawng klangiungma mih iawng naown kown,now en ngawng kowi kowh pauleng klangiungma mih iawng naown kown.10Chapa ow, maru ngakuüa hawla en lup ngak chang chepawhang cham tawi tarü diah.11Maru natek en kown mih, “Anging hown uang tawi chaw,sai maru kownkow a-i hawt pawm maru lah,angak uowi dowi mih maru kowi khümah kownkow a-i hawt tapet lah.12Amatni kowi a-i hawt khümah khe asingma hai kow iungma chepawa-i powtta pe khowk khe dow akowngma a-i ta towla hüah kown.13Nahanow asung khakma mih uanh ahuma a-i naka kown towbowt,now a-i kala mih uanh hown a-i kowh kim dow atekma a-i natowah kown.14Anging hown en paw uang tawi bowt,a-i cham kuah mih uanh maten a-i taretah kown towbowt,” napa kown.15Chapa ow, naiawngün maru-uüa hown hang cham tawi taiua ba,naiawngün maru-uüa kowh tiama kowi hang cham tawi mang ba.16Tawngplawng kowchow panow amatni dow chang angak kownkow towk iowh reng chekhai,amatni kowh khawk dow cham sai maru kownkow cham iowmla reng mih chekhai.17Nakhüm uakling kown nau kowh uakling khi khe thang pe powk hanowuakling dow nataia kown mih tuk rakowi cham lang tahen reng chekhai.18Tawkche naiawng cham pawm maru mih dow amatni matia kowng reng,amatni dow amatni matia leng kowi tasowk reng chekhai.19Lawpha kowh angak hown krawi kram miuüa dow naiawng own reng,angak hown kowh kaah mih uanh dow paw asak reng chekhai.20Chanlaira dow tiama towng krawi haw reng,chanlaira dow chi kowi prang kowi krawi tüng klow reng.21Tiakrum kowi kowh maru kawm dawng kowi chanlaira dow krawi haw reng,chanlaira dow tapplawt re-e maiawng krawi tek reng,22“Bualama miuüa low, mün ni tak chow bualama uowi kown mih enni nau?Prawngren maru miuüa low, prawngren maru mih hown mün ni tak chow enni napiaw kown?Aiung angak tukra uowi dowi miuüa low, mün ni tak chow tukra kowi enni nasui kown?23Ang kowh pringhawi laiklow che enni sünta khai panü,ang nape enni chanlaira hai tukra kown chowdiah.24Ang haw enni reng chepaw enni dow sünta ang dowi;ang iaw enni rut khowk chepaw miapaw enni klang ang dowi.25Ang kowh prengia laiklow kowi enni pe ching dowi chedow,tüng enni atawi ama mih kowi paw enni nauta dowi chedow,26enni kowh piakra ang khi hanow ang naren enni kown,enni kla phih kla tan khe ang nachangla enni rensi küakau kown.27Liku iawng enni luk kowi phih uang ting chepaw,akrat pusa dawng kowi enni uowi chepaw,ang nachangla enni rensi küakau kown.28Nami khin khe prengia uowi dowi miuüa dow nahaw ang kown.Tawkche amatni kowi dow ang naklangah kown nadowi.Nakhowk khe amatni dow nakrawi cham ang kown.Tawkche amatni dow nakrum ang kown nadowi.29Tawngplawng kowchow panow amatni dow tukra kowi sui khai,now CHAKRAMANG kowi ringkawma hown kram kown nau büah dowi.30Amatni dow ang kowh prengia lai chün kown nau dowi,ang kowh pringhawi laiklow mih amatni dow sünta kown nau dowi.31Naiawng rakowi amatni kowh lup sung dow amatni naka kown,amatni kowh lup rakowi amatni kowh chownglawng dow nakrat kown.32Bualama miuüa dow tiama tawi kowi mang rakowi nakowng kown,aiung angak tuak dowi miuüa dow tawngpaw tuak dowi rakowi napiak kown.33Nachenganchepaw ang laiklow sünta miuüa dow thaulangma nauowi kown,amatni dow angak chap nauang ting kown mih kowi nakram kown nadowi,” pakhai.
The Seed Company