Tarüa6
1CHAKRAMANG tek pe Mosi mih,2“Israeluüa kowi kowtek pe diah: Masiuüa chepaw, kachakuüa chepaw CHAKRAMANG vüi tape kownkow chowng Nazaret kown mih enni che takham khai hanow3takham mih maru dow arak lah, grep tui lah naia kham kown nadowi. Naiawng mih maru dow arak hai grep tui hown kowh thawpah mih tui sur paw naia kham kown nadowi. Nami klen kowi grep uih sing hai grep uih keu paw naiung cha kown nadowi.4CHAKRAMANG vüi tape kownkow chowng Nazaret mowr dow grep uih hown kowh thawpah mih tawng chap paw naiung cha kown nadowi; grep uih pia hai anuk khowm padow naiung cha kown nadowi.5“Nazaret maru-uüa kowh sam dow CHAKRAMANG vüi kowi chimsaima chekhai. Naiawng rakowi chowng Nazaret mih maru dow CHAKRAMANG vüi aia tape mowr mih naia khai sam kown nadowi, now kep paw naia kep kown nadowi. CHAKRAMANG vüi tape mowr dow aia mih narai sam kown takla.6“Now aia tape mowr dow uak uowi rah re-e paw tawi ia tatawn kown nadowi.7Aia kowh lu kowi dow CHAKRAMANG vüi tape pami amat müa sam uowi khai. Naiawng rakowi u-pa, tainau-uüa hai tuamowuüa kowng khe paw aia dow natawi ia tasür talawk kown nadowi.8Naiawng hai aia dow CHAKRAMANG vüi tape mowr mih chimsaima nauowi kown takla.9“Mingmang dowi khe aia pur kowi maru kowng khai hanow CHAKRAMANG vüi kowi kowh aia raiah mih sam natasür natalawk kown. Nahanow ranit ni mowr asür alawkma hai aia nauowi kown takla. Nami ranit ni mih ni kowi aia tachim tasai khe aia kowh sam dow nakhaita kown.10Now raiat ni mih ni khe dow kimtawn uatur chepaw, kaurawng uatur chepaw aia napawla pachum hanow taklowp taklangra te plawt re-e uamow tut-e nakowkowi kown.11Kaurawng uatur chepaw, kimtawn uatur chepaw lowk mih hown dow uamow nachangla angak lawt lük müa uanap kown, now alowk mih hown dow tikah mih uanap nachangla kown. Nami dow uak uowi rah re-e uowi kowh aia tasür talawk rakowi aia kowh sürlawk mih nakhu pe kownkow chekhai. Nami ni hownia dow CHAKRAMANG vüi kowi asar hown aia naplan rai sam iawk kown takla.12Nakhowk khe paw aia rik takham khe kowh iawng CHAKRAMANG vüi tape kown mih laikham natakham iawk kown takla. Nami klen kowi nachangla aprek sung uanap kownkow paningchow mih ruapurla chah nauang pawla papum kown takla. Tawngplawng kowchow panow aia rik takhamta mih kowi dow aia sürlawkta khai bowt rakowi CHAKRAMANG vüi aia rik tape mih ni maten tabat khai bowt.13“CHAKRAMANG vüi tape kownkow chowng Nazaret mih khin chur khowk hanow maiawng nachang pawi kown takla: Aia dow taklowp taklangra te plawt re-e nakowkowi kown.14Nakowi aia kowkowi mih khin khe paningchow mih ruapurla chah apum, paningchow mih ruapur iia apum hai ruapurla apum nakowpawla kown takla. Naiawngün ruapur kowi dow aser auowk naia uowi kown nadowi. Ruapurla powrchow hown dow nachangla tikah mih uanap kown, ruapur iia hown dow nachangla angak lawt lük müa uanap kown, now ruapurla hown dow taking tasangra uanap nachangla kown.15Nami klen kowi paw kawmdi uanap hai khamah mih uanap kowi kowh uanh nauang pawla kown, now the pe tuah dowi mih kawm paw nauang pawla akharang kown takla. Nami kharang kowi dow kawmdi lang iung mih hown kowh thawpah mih kawm nauowi pre chap kown takla. Pachap mih dow atatma panow lawk pe kanrawn sau mih kawm naown kown, now pachap mih dow apalachow panow plik pe kanrawn sau mih kawm naown kown takla.16Naiawngün uanap srui dow CHAKRAMANG pur kowi uamow nakowtowah kown takla. Now angak lawt lük müa uanap hai tikah mih uanap aia nachang kown takla.17Now taking tasangra uanap chang müa kowi kowh ruapurla dow nangenah hanow aia nachangla phuchua kown. Nami khin khe the pe tuah dowi mih kawm, kawmdi uanap hai khamah mih uanap paw naphuchuala kown takla.18Nami kung kowi dow nami chowng Nazaret mih maru kowh sam CHAKRAMANG vüi kowi kowh raiah mih dow nakhaita pe kown. Nami sam dow taking tasangra uanap kowi kowh maih kowi nanawmta kown.19CHAKRAMANG vüi kowi kowh raiah mih sam ki khaita kung kowi dow ruapurla pang nga butia, kharang kowi kowh the pe tuah dowi mih kawm hai apalachow ngaiah mih kawm apah chi nami chowng Nazaret mih maru rut kowi uamow naap pe kown.20Nami kung kowi dow naiawngün uanh mih CHAKRAMANG pur kowi amülüngma mih uanap uamow nachangla kown. Naiawngün uanh dow chimsaima chekhai, naiawngün dow uamow kowh kakbak naown kown. Nami klen kowi amülüngma mih uanap kowi kowh sakowuh hai apah mih athung paw uamow kowh kakbak naown kown. Naiawngün ki changta prowng kung kowi dow nami chowng Nazaret mih maru naia kham grep tui kown towbowt.21“Naiawngün dow chowng Nazaret mih maru-uüa kowh rirow chekhai. CHAKRAMANG vüi tape kownkow takham mih maru dow nami rirow kowi uowi iawng nachang uanap pawi kown takla. Nami klen kowi aia ia pe mowr nape kown mih aia takham khai hanow nami uanh paw aia nape kown takla. CHAKRAMANG vüi nape kownkow aia takhamta mih dow rirow kowi uowi iawng nape bowk kown takla,” pakhai.22CHAKRAMANG tek pe Mosi mih,23“Arawn hai achapauüa kowi mami laiklow kowtek pe diah. Amatni mih maiawng Israeluüa kowi pacham peah prasi lah:24‘CHAKRAMANG dow pacham pe en prasi lah,aia dow pacham mingkhet en lah;25CHAKRAMANG dow pacham sakrau en lah,aia dow pacham saksing sana en lah.26CHAKRAMANG dow pacham pe en iungra lah,aia dow pacham pe en thaulangra lah’ napape kown.27“ uamowuüa mih ang ming hown Israeluüa kowi napeah prasi kown, nahanow ang matia ngengche Israeluüa kowi napeah prasi kown,” pakhai.
The Seed Company