Tarüa4
1Mosi hai Arawn iüah kowi CHAKRAMANG tek pe mih,2“Levi chenchap pungmadawng kowi Kohat kowh krungchak hai kimchak kowi rüaah iüa diah.3Taklowp taklangra te kowi nachang lup kownkow amatni kowi mih 30 ning hownia 50 ning mowr mih kachakuüa kowi enchi narüaah kown.4“Amatni kowh lup dow taklowp taklangra te kowi kowh lang chimsai mih uanh naming nakhet kown mih chekhai.5Akeng mih arah kowi cham süt kownkow Israeluüa piak tangbung kown mih khin khe Arawn hai achapauüa mih taklowp taklangra te lak kowi nakowkup kown. Now sangbowk laitawm tawkpla re-e kowh iangah mih uaniang nalutta hanow nami uaniang hown namumla sangbowk laitawm tawkpla büah kown.6Nami uaniang luk kowi dow chak pik aiungma mih hown naplan mumah palüp büah kown. Nami chak pik luk kowi paw aruama mih uan hown naplan mumah palüp iawk kown. Now sangbowk laitawm tawkpla kawtlawng dow akli kowi nasowrah büah kown.7“Chimsaima mih kawm towk rah pawitang dow aruama mih uan hown namumah büah kown. Nami uan luk kowi dow bia, biatum hai lawngpan ün natow pe büah kown, now khamah mih uanap chang müa kowi kowh tuikawng paw natow pe kown. Nami klen kowi pawitang luk kowi kowh aiawng uowi mih chimsaima mih kawm paw nauowi kown.8Naiawngün uanh luk kowi dow aringma mih uan naplan mum pe kown. Nami uan luk kowi paw chak pik aiungma mih hown naplan mumah palüp iawk kown. Now pawitang kawtlawng dow akli kowi nasowrah kown.9“Maibu towngh hai maibu ün, bawthi kep müa kaingkep hai maidim towk rah lawngpan, now sau towk müa puh dow aruama mih uan hown amatni namumah kown.10Naiawngün uanh luk kowi dow chak pik aiungma mih hown naplan mumah palüp iawk kown. Now naiawngün dow akrowng müa phen luk kowi natowah kown.11“Kuh hown kowh phuchuara luk kowi dow aruama mih uan hown namumah kown. Nami uan luk kowi paw chak pik aiungma mih hown naplan mumah palüp iawk kown. Now phuchuara kawtlawng dow akli kowi nasowrah kown.12“Taklowp taklangra te chimsaima mih kowi kowh tawngah kengah mih akeng mih uanh maten dow aruama mih uan hown amatni namumah kown. Nami uan luk kowi paw chak pik aiungma mih hown naplan mumah palüp iawk kown. Now naiawngün dow akrowng müa phen luk kowi natowah kown.13“Kri hown kowh phuchuara luk kowi kowh plawi maten dow nakuakta büah kown. Now nami phuchuara luk kowi dow arikma mih uan namum pe kown.14Nami uan luk kowi dow chang phuchua khe kowh tawngah mih puh bia aikam, maih chang müa puh, chaknga khowng müa chuk, kep hai tawncher vi towk müa biatum ün natowah kown. Naiawngün luk kowi dow chak pik aiungma mih hown namumah kown. Now phuchuara kawtlawng dow akli kowi nasowrah kown.15“Akeng mih arah kowi cham süt kownkow Israeluüa piakta tangbung mih khin khe Arawn hai achapauüa ki mumta mih chimsaima mih uanh hai taklowp taklangra te kowi kowh tawngkengah mih uanh nauang kawt kownkow Kohat krungchakuüa dow taklowp taklangra te kowi nauang kown. Taklowp taklangra te lak kowi kowh uowi mih uanh maten dow Kohat krungchakuüa nakawtla kown. Tawkchedow naiawngün chimsaima mih uanh kowi nakak büah kown nadowi. Amatni che kak khai hanow amatni dow nakowng kown.16“Uamow Arawn kowh chapa Eleazar luk kowi dow taklowp taklangra te hai alak kowi kowh uanh maten naming nakhet kown mih kurdik nauowi kown. Aia dow maibu towk müa sau ün, anam iungma mih maikhük towk müa than, atungma changah mih kawmdi uanap hai nümnap müa sau naming nakhet kown,” pakhai.17Nami kung kowi Mosi hai Arawn iüah kowi CHAKRAMANG tek pe mih,18“Arawn hai achapauüa mih lang chim lang sai mih uanh ki mumta dowi mowr dow achimsaima mih uanh re-e Kohat krungchakuüa naia kowi kown nadowi, now mü paw kownowng mü kown nadowi. Amatni che kowkak hai kowmü khai hanow nakowng büah kown. Naiawng rakowi amatni kowi dow Arawn hai achapauüa mih taklowp taklangra te kowi nakowpawla kown, now tawng mih chow nakawtla kown mih amatni kowi nakhowm nabowk pe büah kown,” pakhai.21CHAKRAMANG tek pe Mosi mih,22“Levi chenchap pungmadawng kowi Gersawn kowh krungchak hai kimchak kowi rüaah diah.23Taklowp taklangra te kowi nachang lup kownkow amatni kowi dow 30 ning hownia 50 ning mowr mih kachakuüa kowi enchi narüaah kown.24“Amatni nakawtla kown mih uanh dow taklowp taklangra te luk müa adipükchow mih uan, nami uan luk kowi kowh lüpah mih rua pawi hown kawngah mih uan, rua pawi hown kowh kawngah mih uan luk kowi kowh lüpah mih ruapur pik, chak pik aiungma mih hai taklowp taklangra te plawt kowi kowh uaniang ün chekhai.26Nami klen kowi taklowp taklangra te hai phuchuara tavir lut pingla viadawng mih uaniang ün, viadawng plawt kowi kowh uaniang ün, taklowp taklangra te tük müa leng ün, now taklowp taklangra te kowi kowh tawngah kengah mih uanh srui paw amatni nakawtla kown takla. Taklowp taklangra te kowi kowh akawt takla mih uanh maten dow Gersawn krungchakuüa nakawtla kown takla.27Amatni dow Arawn hai achapauüa tek iawng nachang kown. Nami dow akawt takla mih lup chepaw, akeng mih lup chepaw amatni nachang kown takla. Amatni nakawtla kown mih lup bak maten dow Gersawn krungchakuüa kowi Arawn hai achapauüa natek pe kown.28Naiawngün dow taklowp taklangra te kowi kowh Gersawn krungchakuüa nachangah kown mih lup chekhai. Nami maru-uüa kowh lup naming nakhet kown mih kurdik dow uamow Arawn kowh chapa Ithamar luk kowi nauowi kown.29“Levi chenchap pungmadawng kowi Merari kowh krungchak hai kimchak kowi rüaah diah.30Taklowp taklangra te kowi nachang lup kownkow amatni kowi dow 30 ning hownia 50 ning mowr mih kachakuüa kowi enchi narüaah kown.31“Amatni nakawtla kown mih dow taklowp taklangra te ping müa phen ün, akep müa lawng ün, achüng hai akhawk rup rah ün chekhai.32Nami klen kowi taklowp taklangra te viadawng kowi kowh achüng hailawm akhawk rup rah ün, taklowp taklangra te tükra chung ün, pingla viadawng mih uaniang tük müa leng hai lakke mih uanh srui paw amatni nakawtla kown takla. Now tawng mih uanh chow nakawtla kown mih amatni lowkkowlowk kowi Arawn hai achapauüa nakhowm nabowk pe kown.33Naiawngün dow taklowp taklangra te kowi kowh Merari krungchakuüa nachangah kown mih lup chekhai. Nami maru-uüa kowh lup naming nakhet kown mih kurdik dow uamow Arawn kowh chapa Ithamar luk kowi nauowi kown,” pakhai.34Mosi, Arawn hai Israel aluchowuüa dow Kohat krungchakuüa kowi amatni kowh krungchak hai kimchak taken iawng rüaah büah khai.35Taklowp taklangra te kowi nachang lup kownkow Kohat krungchakuüa kowi dow 30 ning hownia 50 ning mowr mih kachakuüa kowi rüaah khai bowt. Naiawngün maru iun dow 2,750 ia chekhai.37Naiawngün dow Kohat krungchakuüa kowh maru iun mut chekhai. Mosi kowi kowh CHAKRAMANG peah ana mih iawng Mosi hai Arawn iüah dow amatni kowi rüaah khai.38Gersawn krungchakuüa kowi paw amatni kowh krungchak hai kimchak taken iawng rüaah khai.39Taklowp taklangra te kowi nachang lup kownkow Gersawn krungchakuüa kowi rüaah büah khai. Tawkchedow 30 ning hownia 50 ning mowr mih kowi kowh ming tang uowi khowk miuüa kowi chowtaih rüaah büah khai. Naiawngün maru iun dow 2,630 ia chekhai.41Naiawngün dow Gersawn krungchakuüa kowh maru iun mut chekhai. Mosi kowi kowh CHAKRAMANG peah ana mih iawng Mosi hai Arawn iüah dow amatni kowi rüaah khai.42Merari krungchakuüa kowi paw amatni kowh krungchak hai kimchak taken iawng rüaah khai.43Taklowp taklangra te kowi nauang chang lup kownkow 30 ning hownia 50 ning mowr mih Gersawn krungchakuüa hownia uang mih kachakuüa kowi dow rüaah khai. Naiawngün maru iun dow 3,200 ia chekhai.45Naiawngün dow Merari krungchakuüa kowh maru iun mut chekhai. Mosi kowi kowh CHAKRAMANG peah ana mih iawng Mosi hai Arawn iüah dow amatni kowi rüaah khai.46Naiawng hai Levi krungchakuüa kowi mih amatni kowh krungchak hai kimchak taken iawng Mosi, Arawn hai Israel aluchowuüa rüaah khai.47Taklowp taklangra te kowi nauang chang lup kownkow hai nakawtla uanh kownkow 30 ning hownia 50 ning mowr mih uang mih kachakuüa maten kowi dow rüaah khai.48Naiawngün maru iun dow bowkbowk kowi 8,580 ia chekhai.49Mosi kowi CHAKRAMANG peah ana mih iawng tawng lup ngai chow chang takla mih hai kawt takla mih amatni lowkkowlowk kowi khowm pe bowk pe khai.
Mosi kowi kowh CHAKRAMANG peah ana mih iawng Levi krungchakuüa kowi mih rüaah büah khai.
Mosi kowi kowh CHAKRAMANG peah ana mih iawng Levi krungchakuüa kowi mih rüaah büah khai.
The Seed Company