Tarüa23
1Nami kung kowi Balam tek pe Balak mih, “Mami re-e nachangla phuchua kownkow ang vüi thawp phuchuara ranit klüng diah. Now chiala hai ruapurla ranit pum chi kamrüt ang diah,” pape khai.2Balak dow Balam tek pe mih iawng rowprowp chang khai. Amatchi dow phuchuara towng kowi chiala hai ruapurla apum chi phuchua iüah khai.3Nami kung kowi Balam plan tek pe Balak iawk mih, “Changla tikah mih uanap mih tawncher re-e ta uowi diah ba; paipra kowi ang kowkowi tak. Paipra kowi ang kowkowi now ang hown CHAKRAMANG uang takrum chepaw naia. CHAKRAMANG tek ang iawng ang uang tek en kown taih,” pape khai. Nami laiklow tekla pe now Balam dow singh kau uowi dowi mih hungh kowi kowpün khai.4Nakhowk khe Thurai mih Balam hown uang takrum khai. Balam tek pe Thurai mih, “Ang thawp pe phuchuara ranit klüng hanow naiawngün phuchuara kowi chiala apum, ruapurla apum chi ang changla phuchua khowk,” pakhai.5Nakhowk khe CHAKRAMANG dow Balak tut-e nakowtekah kown mih laiklow Balam kowi sangah khai. CHAKRAMANG tek pe mih, “Balak tut-e kowplan now ang sang en mih laiklow maten kowtek pe diah,” pape khai.6Naiawng rakowi Balam dow Balak tut-e kowplan khai. Now Balak hown Moab pren kowi kowh aluchowuüa maten tikah mih uanap re-e hawt iowng mih aia kowkhi khai.7Nakhowk khe Thurai peah mih laiklow dow maiawng Balam uang tek khai,“Siria pren hownia mang Balak dow uang pawla ang khai,satlawt pra kowh hungh hownia Moab mang dow uang hawla ang khai.Aia tek mih, ‘Ang vüi Jakawb kowi peah piati diah,Israeluüa kowi uang tek pe piakra laiklow diah,’ pakhai.8Amatni kowi tawng iawng chow ang napeah piati kown chow?Amatni dow Thurai peah piati mih maru nadowi.Amatni kowi tawng iawng chow ang natek pe piakra laiklow kown chow?Amatni dow Thurai tek pe piakra laiklow mih maru nadowi chekhai.9Pai iow, hungh chut hownia amatni kowi dow ang haikhi,amatni kowi dow hungh luk hownia ang tang müah thüm.Amatni dow akeng chenchap hownia alakma uowi mih chenchap chekhai,amatni dow amatni chowtaih Thurai maru pami tuk büah khai.10Jakawb kowh krungchakuüa dow sema iawng ahuma chekhai,amatni kowi nowng rüa mih mia chow uowi?Israel chuprek chaprekuüa dow lainowmma kawm chekhai,amatni kowi dow tali bak kowi pabak khowm padow nowng rüaah dowi chekhai.Pai iawngün maru iunguüa iawng ang pacham kowngah,kowbüah kowh chowng chur iawng ang kowh chowng pachurah,” pakhai.11Nami laiklow tata now Balak tek pe Balam mih, “Tawngplawng kowchow naiawng en tuk chang ang khai? Ang kowh ransu-uüa kowi napeah piati kownkow ang uang pawla en mih nadowi bow? Tawngplawng kowchow ang ransu-uüa kowi en tuk peah prasi khai?” pakhai.12Nakhowk khe Balam tek pe mih, “CHAKRAMANG sang ang mih laiklow tek dowi kowi ang nowng uowi dowi chekhai,” pape khai.13Nami kung kowi Balak tek pe Balam iawk mih, “Arah sar kowi achi cham kowi diah sik. Nami hownia Israeluüa kowi en nakhi kown. Amatni bowkbowk kowi dow en khi dowi tham. Nachenganchepaw sangrum dow en nakhi kown taih. Nami hownia ang takcha amatni kowi en napeah piati kown,” pakhai.14Nami laiklow tek pe now Pisga hungh chut kowi kowh Zufim pape mih dowm kowi Balak dow Balam kowi kowpawla khai. Nakowi amatchi dow thawp phuchuara ranit klüng hanow phuchuara towng kowi chiala hai ruapurla apum chi phuchua khai.15Nami kung kowi Balam tek pe Balak mih, “Tikah mih uanap chang rah re-e ta uowi diah ba. Paipra kowi CHAKRAMANG hown ang kowtakrum tak,” pakhai.16Nakhowk khe CHAKRAMANG dow Balak tut-e nakowtekah kown mih laiklow Balam kowi sangah khai. CHAKRAMANG tek pe mih, “Balak tut-e kowplan now ang sang en mih naiawngün laiklow maten kowtek pe diah,” pape khai.17Naiawng rakowi Balam dow Balak tut-e kowplan khai. Now Moab pren kowi kowh aluchowuüa maten hown tikah mih uanap re-e Balak büah hawt iowng mih dow aia kowkhi khai. Balam kowi Balak lüntaah mih, “Tawng chow CHAKRAMANG tek en?” pakhai.18Nakhowk khe Thurai peah mih laiklow dow maiawng Balam uang tek khai,“Aw mang Balak, awr rü diah, sünta diah;Aw Zipawr kowh chapa, ang laiklow sünta diah.19Thurai dow lusa maru nadowi chekhai,aia dow tek dai lai dowi.Thurai dow lusa maru hownia kowh uang dia mih nadowi,aia kowh saktuak dow taklowi dowi chekhai.Thurai dow tekta iawng chang reng,aia dow aia takhamta mih iawng chang reng chekhai.20Israel kowi napeah prasi kown mih ana ang ka khai,Thurai pe ang mih ana dow ang ia klowi dowi chekhai.21Thurai dow pur prakowi Jakawb ngare kown mih khi pe dowi chekhai,aia dow Israel vüi kowi akrat pusara natowla pe kown nadowi.CHAKRAMANG Thurai dow Israeluüa tut-e tawi uowi reng,CHAKRAMANG dow amatni kowh mang pahai amatni phuang reng chekhai.22Amatni kowi dow Aigupta pren hownia CHAKRAMANG uang lawtla khai,CHAKRAMANG dow amatni vüi chiarowngla akürma mih iawng natasen pe kown.23Jakawb kowh maru-uüa luk kowi dow tawng iawng mih piati paw nadowk kown nadowi,Israeluüa luk kowi dow tawng iawng mih mantan paw nachang lup kown nadowi.Amatni lawnguan kowi dow kawmat maiawng maru natek kown,‘Amatni vüi CHAKRAMANG chang pe mih sam mü madiah!’ napa kown.24Israeluüa dow krangsima iawng lainowmma kür chekhai,amatni dow mak chak kown chowbowt khe kowh krangsila iawng iowng khai;Amatni dow krangsi iawng makah mih chaknga ki cha dowi mowr tanai dowi chekhai,makah mih chak vi ki khamta dowi mowr tanai kown nau dowi chekhai,” pakhai.25Nami laiklow tata hanow Balak tek pe Balam mih, “Taingta diah. Israeluüa kowi hangkow pe prasi tham bowt, piati paw pek kla dowk,” pakhai.26Balam tek pe Balak mih, “CHAKRAMANG tek ang iawng ang uang tek en kown taih pami ang tek en khowk nadowi bow?” pape khai.27Nami kung kowi Balak tek pe Balam mih, “Chu, arah sar kowi achi cham plan kowi iawk diah sik. Nami rah kowi dow Thurai naawmrawm tarawng, now nami rah hownia dow Israeluüa kowi nape pe en piati tarawng,” pakhai.28Nami laiklow ki tek pe now Balak mih Balam kowi Peur pami hungh luk kowi kowpünla khai. Nami hungh hownia dow süngrüp süngkangma kowi kowh Israeluüa uowi rah haiia khi chekhai.29Nakhowk khe Balam tek pe Balak mih, “Mami re-e nachangla phuchua kownkow ang vüi thawp phuchuara ranit klüng diah, now chiala hai ruapurla ranit pum chi kamrüt ang diah,” pape khai.30Now Balak dow Balam tek pe mih iawng rowprowp chang khai. Amatchi dow phuchuara towng kowi chiala hai ruapurla apum chi phuchua iüah khai.
The Seed Company