Tarüa21
1Arad marow dow Kanan pren mrawkphak prakowi kowh süngrüp süngkangma kowi chekhai. Nami marow kowi kowh mang dow Atharim kua pra kowh tiama iawng Israeluüa uang haimang mih satang ta khai. Naiawng rakowi aia dow Israeluüa kowi kowkrawi senah hanow khümla sangrum khai.2Nakhowk khe CHAKRAMANG tut-e takham se Israeluüa tek mih, “Aw CHAKRAMANG, en che Arad marowchakuüa kowi anging rut kowi apta anging khai hanow amatni hai amatni kowh marow maten asaima anging napiakta pe kown,” pakhai.3CHAKRAMANG dow naiawng Israeluüa awr lü khowng mih hawt sünta pe khai, now Kananuüa kowi nanowngta kownkow aia mih Israeluüa kowi tawi khowngah khai. Nahanow Israeluüa dow Kananuüa hai marow maten asaima piakta pe khai. Naiawng rakowi nami arah ming dow Hawrma pahai chap pe khai. (Hawrma pami dow “Piakra” pami chekhai).4Nami kung kowi dow Israeluüa mih Edawm pren iawng nakowpat kownkow Hawr hungh hownia lawt hanow sata Rik pra kowh tiama iawng mang büah khai. Nachenganchepaw amatni dow kowplan tapat iawk kown mih nau dowi bowt chekhai. Naiawng rakowi amatni dow nowng town sak dowi bowt kowh tiama rawng kowi chowreng tak khe Thurai hai Mosi iüah kowi kamcheah khai. Amatni tek mih, “Aigupta pren hownia tawngplawng kowchow enchi uang tuk lawtla anging khai; mami süngrüp süngkangma kowi anging pakowng lah pakowh bow? Mami re-e dow kawm paw uowi dowi, tui paw uowi dowi! Mami manna kawm anging silik khi khai bowt!” pakhai.6Naiawng rakowi CHAKRAMANG dow akru uowima mih rua Israeluüa tut-e uang chin pe khai. Naiawngün rua chawtra hownia Israeluüa mih ahuma kowng khai.7Nakhowk khe Mosi tut-e maru kawmuüa kowkowiah now tek pe mih, “CHAKRAMANG hai en luk kowi kingküala mih lai anging tek mih hown anging changta angak khai nowm. Kawmat mih maiawngün rua nahenta anging kownkow CHAKRAMANG tut-e awr lü anging diah,” pakhai. Naiawng rakowi Mosi dow maru kawmuüa vüi CHAKRAMANG tut-e awr lü khai.8Nakhowk khe CHAKRAMANG tek pe Mosi mih, “Kri hown thawp rua rup lowk diah, now phük pe achüng lowk hanow achüng chem kowi nami rua rup towah diah. Rua chawtah mih maru dow nami rua rup prakowi pacham mü lah, nahanow aia dow nasing kown taih,” pakhai.9Now Mosi dow CHAKRAMANG tek iawng chang khai bowt. Aia dow kri hown thawp rua rup lowk hanow achüng luk kowi towah khai. Nami hownia bowt now rua chawtah mih maru mih nami rua rup prakowi haimü hanow kowng dowk chekhai.10Nami kung kowi dow Israeluüa mih nami süngrüp süngkangma hownia lawt hanow Awbawt pami arah kowi kowkhup tangbung khai.11Nami kung kowi dow Awbawt pami arah hownia lawt büah hanow süngrüp süngkangma kowi kowh Ie-Abarim pami arah kowi kowkhup tangbung büah khai. Ie-Abarim dow Moab pren satlawt pra kowh süngrüp süngkangma kowi chekhai.12Nami kung kowi dow Abarim hownia lawt büah hanow Zered lawngrawi kowi kowkhup tangbung büah khai.13Nami kung kowi dow Zered lawngrawi hownia lawt büah hanow Arnawn aw paipra pown kowi kowkhup tangbung büah khai. Arnawn aw uowi mih dow Amawruüa pren hownia kowh haitachawn mih süngrüp süngkangma kowi chekhai. Arnawn aw mapra pown kowi uowi mih dow Amawruüa pren, now paipra pown kowi uowi mih dow Moabuüa pren chekhai.14CHAKRAMANG Kowh Tasen Bowih kowi arui uowi mih, “Arnawn aw hai nami kowi kowh uang mawr mih aw ün, aw ria kowi kowh rak ün, Ar marow prakowi kowh uowi mih Sufa süng kowi kowh Vaheb marow ün dow Moab pren sünghi chekhai,” pakhai.16Arnawn aw pang hownia plan lawt hanow Israeluüa mih Beer pami tuikuam re-e kowting büah khai. Nami tuikuam re-e uowi khe Mosi kowi CHAKRAMANG tek pe mih, “Maru kawmuüa kowi arasang kuaah diah; amatni kowi ang napeah tui kown,” pape khai.17Nakhowk khe Israeluüa dow maiawng tek meng khai,“Aw tuikuam, tui atekma uang awr uowi diah,Israeluüa low, mami tuikuam vüi kowi tek meng büa diah.18Mami tuikuam dow pren kruitown miuüa ana hown kowh thaiah mih chekhai,mami dow maru iukuüa tawk pe raitua kowh pe thawpah mih chekhai,” pakhai.Nami kung kowi dow Israeluüa mih nami arah hownia lawt hanow Matana pami arah kowi kowkowi khai.19Nami arah hownia Nahaliel pami arah kowi kowkowi büah khai, now nami hownia Bamawt pami arah kowi kowkowi büah khai. Nami kung kowi dow Moab pren kowi kowh lawngrawi kowi kowkowi büah khai. Nami lawngrawi re-e kowh Pisga hungh lang lowng mih hownia dow süngrüp süngkangma kowi kowh Jesimawn pape mih arah haikhi chekhai.21Moab pren kowi kowh lawngrawi hownia lawt büah khe Amawruüa kowh mang Sihun tut-e Israeluüa kowrik phowng pe satang khai. Mang Sihun kowi Israeluüa krawi tek pe mih,22“En kowh pren iawng pe mang anging diah. Enni kowh üa, laih hai grep krum iawng anging cham mangla kown nadowi, now tuikuam hownia tui khowm padow anging nakhamla kown nadowi. En kowh pren klen dowi mowr dow tiama rowkrowk taih anging namang kown; akeng prakowi anging cham mangla kown nadowi,” pakhai.23Nachenganchepaw mang Sihun dow aia pren iawng Israeluüa kowi pe mangah dowi chekhai. Aia dow aia kowh siphai maten kowi pawla now Israeluüa kowi kowhawt senah kownkow süngrüp süngkangma kowi kowkowi khai. Aia dow Jahaz marow kowi kowkowiah now Israeluüa hown kowdowk tasen khai.24Nami tasen kowi aia kowi dow Israeluüa nowngta khai, now aia kowh pren dow tawngphak pra kowh Arnawn aw hownia mrawkphak pra kowh Jabawk aw mowr Israeluüa powngta pe khai. Nachenganchepaw Amawnuüa kowh pren dow Israeluüa nowng powngla dowi chekhai. Tawngplawng kowchow panow Amawnuüa dow amatni kowh pren sünghi mih akhawtma chawngah khai.25Israeluüa dow Amawruüa kowh marow maten, marow kri Hesbawn pami hailawm ariaret kowi kowh kua maten powngta pe bowk khai, now nakowi dow uowi büah khai.26Hesbawn marow dow Amawruüa kowh mang Sihun kowh marow kri chekhai. Naiawngün pren maten dow Arnawn aw mowr alai kowh Moabuüa mang kowi dowkah tasen kowh mang Sihun powngah mih chekhai.27Naiawng rakowi meng sarauüa tekla mih,“Hesbawn kowi uangah now uang thawp marow büah iawk diah;mang Sihun kowh marow dow pacham uowi iawk lah.28Hesbawn marow hownia maih uang lawt hanowMoab pren kowi kowh Ar marow kowi uang kamta khai,Arnawn aw pang kowi kowh maru-uüa kowi paw kamta khai.29Uh Moab! En kowh piakra dow kramra uowi lai kowbow!Aw Kemaws thurai kowh maru-uüa, enni chum mih chowbowt.Kemaws kowh chapauüa dow cham powt khai bowt,aia kowh chamauüa dow mang Sihun tut-e takhang khai bowt.30Nachenganchepaw anging dow Amawruüa kowi nowngta khai,Hesbawn hownia Dibawn mowr anging piakta khai bowt.Amatni kowi dow Medeba hownia Nawfa mowr anging krawi senah khai,amatni kowh marow maten dow anging piakta pe bowk khai,” pakhai.31Naiawng rakowi Israeluüa dow Amawruüa pren kowi uowi büah khai bowt.32Jazer marow kowi krawi kumü kownkow Mosi kowchin dumiow kung kowi nami marow riaret kowi kowh kua maten dow Israeluüa powngta bowk khai, now nakowi kowh uowi mih Amawruüa maten kowi dow prütta büah bowk khai.33Nami kung kowi dow Israeluüa mih Basan pren pra kowh mangla mih tiama iawng kowmang büah khai. Nami khin khe Basan pren kowi kowh mang Awk dow aia kowh siphai maten pawla now Israeluüa kowi nauang senah kownkow Edrei marow kowi uang hawt uowi khai.34Nakhowk khe CHAKRAMANG tek pe Mosi mih, “Mang Awk kowi hangkow kram diah. Tawngplawng kowchow panow aia kowh pren hai aia kowh siphaiuüa hailawm aia kowi dow en rut kowi ang apta khowk chekhai. Hesbawn marow kowi kowh uowi mih Amawruüa kowh mang Sihun kowi en changah iawng dow mang Awk kowi paw en nachangah kown,” pape khai.35Naiawng rakowi Israeluüa dow mang Awk hai achapauüa hown aia kowh siphaiuüa maten kowi saita bowk khai; amatni dow lowk iachow paw ta lat dowi chekhai. Israeluüa dow mang Awk kowh pren paw hing powngta khai.
The Seed Company