Tarüa16
1Akat khe Ishar kowh chapa Kora dow Dathan, Abiram hai Awn büah hown takrüpah hanow Mosi kowi kingküaah khai. (Ishar dow Levi chapa Kohat kowh chah chekhai. Dathan, Abiram hai Awn büah dow Reuben krungchak chekhai. Dathan hai Abiram iüah kowh pa dow Eliab chekhai. Now Awn kowh pa dow Pelet chekhai). Nami tali ia klen kowi Israeluüa pungmadawng kowi kowh aming anang uowima kangowh mih aluchowuüa paw amatni hown tawi takrüp 250 ia khai.3Amatni dow ahawmsang uangah now Mosi hai Arawn iüah kowi uang tek pe mih, “Lainowmma enchi chang lowchow khai! Israel pachenma dow chimsaima kangowh towbowt nadowi bow, now anging hown paw CHAKRAMANG uowi nadowi bow? Tawngplawng kowchow CHAKRAMANG kowh maru-uüa luk kowi enchi lang chang lowchow rengreng tak?” pakhai.4Nami laiklow tata hanow Mosi mih krawng kowi tabawkah krawm se chup Thurai khai.5Now Kora hai athumchakuüa kowi Mosi tek pe mih, “Mia chow aia kowh maru, mia chow chimsai mih hai mia chow aia pur kowi kowia kowi kown mih tharau khe CHAKRAMANG nauang tüng a-i kown. CHAKRAMANG kloah mih kowi chowtaih aia pur kowi aia nape kowiah kown.6Kora, en hai en kowh thumchakuüa hown maiawng enni nachang kown: Tharau khe maikhük towk müa puh kowi enni natow pe mairing hanow nam iungma mih maikhük towk müa than enni nathe pe kown, now CHAKRAMANG pur kowi nami nam iungma mih maikhük enni natowkah kown. Nami khin khe mia kowi chow CHAKRAMANG kloah mih a-i natuk kown taih. Lang lowchow mih dow enni Leviuüa chowbowt!” pape khai.8Kora kowi Mosi plan tek pe mih, “Enni Leviuüa ang laiklow sünta büah!9Thurai dow taklowp taklangra te kowi aia tut-e enni nanowng kowila kownkow lang klo enni khai. Now Israeluüa maten vüi lakke takla mih lup enni nanowng chang pe kownkow aia klo enni khai. Naiawng Israeluüa maten pungmadawng hownia Israeluüa kowh Thurai lang klo enni mih pankri dowi pabow enni ka tuak? Nami klen kowi tawng chow enni nau tak?10Kora, en hai enni Leviuüa maten kowi amülüngma hown CHAKRAMANG pe enni kurdik khowk nadowi bow? Nachenganchepaw tawngplawng kowchow enni tawi takhün uamow rah reng tak?11Arawn kowi enni kingküaah mih dow aia kowi kowh enni kingküa mih nadowi; CHAKRAMANG kowi kowh enni kingküa mih chekhai. Naiawng rakowi tawngplawng kowchow Arawn kowi enni tuk kingküaah khai?” pape khai.12Nami kung kowi dow Eliab kowh chapa Dathan hai Abiram iüah kowi uang hawla kownkow Mosi kowchin maru khai. Nachenganchepaw kowiüah krawi tek pe mih, “Angching uang dowi tham!13Iawn tui, kuai tui hai tawng chap paw akhawr uowi dowi mih pren hownia en uang lawtla anging khai. Now mami süngrüp süngkangma kowi nakowngta anging kownkow en uang pawla anging khai. Naiawng en chang chepaw en sak ta-ih dowi tak bow? Now kawmat dow anging luk kowi nachang alow kown mih paw en nau khai iawk!14Iawn tui, kuai tui hai tawng chap paw akhawr uowi dowi mih pren kowi en pawla anging dowi, now krawng bawn hai grep rawng paw en pe powng anging dowi! Hauang kuan anging tham bowt! En tut-e mapaw angching uang kown nadowi,” pakhai.15Nami laiklow tata hanow Mosi dow lainowmma kunmarau khai. Mosi tek pe CHAKRAMANG mih, “Aw CHAKRAMANG, kowbüah kowh uanap hangkow paw pe diah. Kawmat mowr dow kowbüah luk kowi ang tawita mata mih tawngpaw uowi dowi tak, now kawrngaramchük lowkchow khowm padow kowbüah hownia ang paw dowi tak chekhai. Nachenganchepaw amatni dow kingküa ang khai,” pakhai.16Nami kung kowi Mosi tek pe Kora mih, “Tharau khe en hai en thumchakuüa mih CHAKRAMANG pur kowi nakowkowi ngengche kown takla. Now Arawn paw nakowi natawi uowi kown.17Enni bowkbowk maikhük towk müa puh kowi tow pe mairing hanow nam iungma mih maikhük towk müa than enni nathe pe kown, now nami dow CHAKRAMANG pur kowi natowkah kown. 250 ia mih aluchowuüa hailawm Arawn enchi paw naiawng natawi chang kown,” pape khai.18Naiawng rakowi auai rau dow Mosi laiklow iawng chowlowkkow kowh maikhük towk müa puh kowi tow pe mairing hanow the pe nam iungma mih maikhük towk müa than khai. Nami pawla hanow Mosi hai Arawn iüah hailawm taklowp taklangra te plawt re-e kowiowng büah khai.19Now Kora dow Mosi hai Arawn iüah kowi kingküaah kownkow taklowp taklangra te plawt re-e aia thumchakuüa kowi kuaah khai bowt. Nakhowk khe amatni bowkbowk pur kowi CHAKRAMANG kowh kraingra dow uang tatüng khai.20Mosi hai Arawn iüah kowi CHAKRAMANG tek pe mih,21“Naiawngün maru-uüa kowi amaisang ang saita bowk bowt kown. Naiawng rakowi kowbüah hownia lang tahen iüa diah,” pape khai.22Nachenganchepaw Mosi hai Arawn iüah dow krawng kowi tabawkah krawm now chup Thurai khai. Amatchi tek mih, “Aw Thurai, en dow asak uowi mih chap maten kowh singra chekhai. Chang ngak mih dow lowk iachow taih; lowk iachow ngak rakowi Israeluüa pachenma luk kowi en nakunmarauah kown bow?” pakhai.23Nakhowk khe CHAKRAMANG tek pe Mosi mih,24“Israeluüa kowi kowtek pe diah: Kora, Dathan hai Abiram büah kowh tangbung ria hownia pacham tahen büah lah,” pakhai.25Nami laiklow tata hanow Mosi dow Dathan hai Abiram iüah kowh tangbung kowi kowkowi khai, now Israel lawngtang aluchowuüa paw aia kung tawi krawi khai.26Israeluüa kowi Mosi tek pe mih, “Maiawngün maru ngakuüa tangbung hownia lang tahen büa diah. Kowbüah kowh uanh tawng mih paw hangkow kak büah; enni che kak hanow kowbüah kowh angak rakowi enni kowi paw nakowngla enni kown,” pape khai.27Nami laiklow tata hanow maru kawmuüa dow Kora, Dathan hai Abiram büah kowh tangbung hownia lang tahen khai. Nakhowk khe Dathan hai Abiram iüah dow amatchi kowh masi chauüa hailawm uang lawt hanow tangbung plawt re-e uang iowng büah khai.28Nakhowk khe Mosi tek pe Israeluüa mih, “Sünta büah, ang changah mih lup srui ang matia sak nau hown kowh ang changah mih nadowi; CHAKRAMANG uang chin ang kowh ang chang mih chekhai. Ang kowh laiklow nowm bow nowm dowi bow mih maiawng enni natuk kown:29Maiawngün maru-uüa che maru kowng iawng tawi kowng khai, now kowng khe paw lang taklowi dowi hanow CHAKRAMANG uang chin ang mih nadowi.30Nachenganchepaw CHAKRAMANG che amatni luk kowi alangma changah khai, now krawng che awr talak phak now amatni kowh uowi mih srui kowi hai amatni kowi singlingma iawnta bowk khai hanow CHAKRAMANG kowi nü büah klowk büah dowi rakowi chekhai pami enni natuk kown,” pakhai.31Now Mosi kowh lai chur hown akrowksang Dathan hai Abiram iüah kowh kimchakuüa iowngra kowi kowh krawng dow awr talak phak khai.32Nami krawng dow Kora kowh thumchakuüa maten kowi hai amatni kowh uowi mih srui kowi iawnta bowk khai.33Amatni dow amatni kowh uowi mih srui hailawm krawng dawng kowi tama rim khai. Now amatni luk kowi nami krawng dow kutplan taplim khai. Amatni dow Israeluüa pungmadawng hownia hing tama rim khai.34Amatni kowh plak klow tata now aria aret kowi kowh Israeluüa maten dow hekla plala se powt büah khai. Amatni dow, “A-i kowi paw krawng iawnta a-i kown chowbowt le,” pahai tekla se iowm büah khai.35Now 250 ia mih aluchowuüa kowi paw CHAKRAMANG hownia kowh maih uangah now uang kamta bowk khai. Naiawngün aluchowuüa dow nam iungma mih maikhük towk mih chekhai.36CHAKRAMANG tek pe Mosi mih,37“Uamow Arawn kowh chapa Eleazar kowi kowtek pe diah: Aluchowuüa kam rah re-e kowh maikhük towk müa puh pauang cham pawla lah, now maivia dow alak sangrum re-e pacham kuakah lah. Tawngplawng kowchow panow maikhük towk müa puh dow chimsaima chekhai.38Maikhük towk müa puh dow chang ngak rakowi kowng miuüa kowh chekhai. Nachenganchepaw naiawngün puh dow ang pur kowi uang pawla khai bowt rakowi chimsaima chekhai. Naiawngün maikhük towk müa puh dow apachow phengah hanow bawmla phuchuara diah. Nami dow Israeluüa vüi tarip müa amatra pacham chowng lah,” pakhai.39Now maih kamta mih maru-uüa uang pawla mih kri hown kowh maikhük towk müa puh srui dow uamow Eleazar mih krawi pe kuaah khai bowt. Now nathawpla phuchuara bawm müa kownkow naiawngün dow apachow aia pe phengah khai.40Naiawng hai aia dow Mosi kowi kowh CHAKRAMANG peah ana iawng chang khai bowt. Naiawng chang mih dow Arawn krungchakuüa klen kowi CHAKRAMANG pur kowi miapaw nam iungma mih maikhük ia towk dowi chekhai pami Israeluüa natukla reng kownkow chekhai. Arawn krungchakuüa klen kowi nam iungma mih maikhük kowtawi towk mih che uowi khai hanow nami maru dow Kora hai athumchakuüa iawng naown kown.41Nami auai ni khe Israeluüa maten dow Mosi hai Arawn iüah kowi plan kamcheah khai iawk. Mosi hai Arawn iüah kowi tek pe büah mih, “CHAKRAMANG kowh maru-uüa kowi kowngta mih enchi chowtaih,” pakhai.42Nachenganchepaw Mosi hai Arawn iüah re-e kowh Israeluüa maten dow taklowp taklangra te prakowi haidang pache taklowp taklangra te luk kowi amaisang uangnim uang tamum klum mih khi büah khai, now CHAKRAMANG kowh kraingra paw uang tatüng mih khi büah khai.43Nakhowk khe Mosi hai Arawn iüah dow taklowp taklangra te pur kowi kowkowi khai.44Now CHAKRAMANG tek pe Mosi mih,45“Naiawngün maru-uüa hownia lang tahen iüa diah. Amatni kowi dow kawmat mat ang namitta kown,” pakhai. Nami laiklow tata hanow Mosi hai Arawn iüah dow krawng kowi tabawk krawm se CHAKRAMANG kowi chupah khai.46Nami kung kowi Mosi tek pe Arawn mih, “En kowh maikhük towk müa puh kowi tow pe mairing hanow the pe nam iungma mih maikhük towk müa than diah, now alenma kowkowi hanow maru kawmuüa kowh angak nalawtta pe kownkow kowchang pe lup diah. CHAKRAMANG kowh kunmaraura dow uang tatüng khai bowt; makowng hawi dow uown tarowng khai bowt,” pakhai.47Now Arawn dow Mosi tek iawng aia kowh maikhük towk müa puh kowi tow pe mairing hanow nam iungma mih maikhük towk müa than the pe khai, now maru kawmuüa prakowi kowiowm khai. Nami takra kowi makowng hawi dow maru kawmuüa pungmadawng kowi tarowng tüng khowk chekhai. Nachenganchepaw aia dow sing reng tak miuüa hai kowng khowk miuüa takra kowi kowiowng khai. Now amatni kowh angak nalawtta pe kownkow Arawn dow nam iungma mih maikhük kowap khai. Nami kung kowi dow makowng hawi mih taing khai bowt.49Kora rakowi kowh kowng miuüa klen kowi paw 14,700 ia tak makowng hawi hown maru kawmuüa tawi kowng khai.50Now makowng hawi taing kung kowi dow taklowp taklangra te plawt re-e Mosi tut-e Arawn kowplan khai bowt.
The Seed Company