Nehemia6
1Sanbalat, Tobia, Arab prenchak Gesem hai anging kowh akeng mih ransu-uüa dow ang ki rawta tap khowk pami hai tawng mih re-e paw tap takhue mih uowi dowi bowt pami satang ta büah khai. Tawkche nakhowk khe paw tapplawt kowi dow ang thawp pe abüng dowi tak chekhai.2Nami khin khe Sanbalat hai Gesem iüah uang krawi tek ang mih, “Chu, Ono dowm nai kowi kowh kua kowi a-i takrum diah sik,” pakhai. Tawkche amatchi sangkrang mih dow napiakta ang kownkow chekhai pami ang tukta pe khai.3Naiawng rakowi krawi chin maru hanow ang krawi tek pe mih, “Pankrima mih lup ang chang reng tak. Naiawng rakowi ang ia uang dowi tak tham. Towla lup kawk kowh enchi tut-e ang uang e dow ang kowh lup chang nataing kown chekhai,” pakhai.4Amatchi dow naiawng hai aplan aplan tali kat mowr uang krawi phowng ang satang khai. Ang paw aplan aplan naiawng ang krawi klangah reng chekhai.5Nami kung kowi paw Sanbalat dow aia kowh nar kowi uang chin hanow nami satang uang plan phowng ang khai. Now anar rut kowi dow tuk pe mur dowi mih ahoma mih chasak uowi lowk chekhai.6Nami chasak kowi arui uowi mih dow, “En hai Judauüa plan thawp tap mih dow Persia mang kowi nakingküala kownkow pe pami akeng chenchapuüa tekla prung mih ang ta, now Gesem paw tek ang khowk. Nami klen kowi Judauüa luk kowi en nachowm mang kownkow en sangkrang mih paw Gesem tek ang khowk.7Nami klen kowi Juda pren mang dow en chowbowt pami Jerusalem marow kowi nakrawi phuang kownkow risiuüa kowi khowm padow en towta hüah khowk pe. Nami satang dow mang Artazerzes tut-e nakowting kown chowbowt. Naiawng rakowi chu, nami lawnguan kowi akat sang a-i taiua talawp diah sik,” pakhai.8Nakhowk khe ang krawi plan tek pe mih, “En tekah mih aching nadowi. Naiawngün dow en sak nau iawng en thawnah mih laiklow chowtaih,” pape khai.9Naiawng anging kowh ransu-uüa uang krawi krawk mih dow anging kowh lup pacham taingta lah pakowh chekhai. Nachenganchepaw ang awr chup Thurai mih, “Aw Thurai, pe ang kür diah,” pakhai.10Akat khe Delaia chapa Semaia hown nakowtalawp kownkow aia kim kowi ang kowkowi khai. Delaia dow Mehetabel kowh chapa chekhai. Naiawng ang kowkowi mih khin khe Semaia dow kim hownia ia lawt dowi chekhai. Aia tek ang mih, “Chu, Thurai chup kim kowi kowh Chimsaima Mih Arah kowi achi kowtapet diah sik, now kimbüng ün achi krawi büngta bowk diah sik. Tawngplawng kowchow panow iak-e khe en kowh ransu-uüa nauang saita en kownkow uang tarü khowk,” pakhai.11Nachenganchepaw ang tek pe mih, “Ang iawng mih maru napowt kown mih taka bow? Now ang iawng mih maru asak naplaila kownkow Thurai chup kim kowi kowkowi kown mih taka bow? En tek iawng ang ia chang dowi tham,” pakhai.12Semaia uang tek ang mih laiklow dow Thurai hownia kowh nadowi pami ang tukta khai. Naiawng aia uang tek ang mih dow Tobia hai Sanbalat iüah peah tangka rakowi chekhai.13Semaia kowi amatchi ngaah mih dow nauang krawk ang hanow ang pacham chang ngak lah pakowh chekhai. Nahanow ang kowh ming iung nang iung piak ang hanow nape ang rukrai iüah kownkow chekhai.14Naiawng rakowi ang chup Thurai mih, “Aw ang kowh Thurai, Tobia hai Sanbalat iüah changah mih angak maten tuakah reng diah, now ripah diah. Masiuüa risi Noadia hai akeng mih risiuüa krawk ang miuüa kowi paw tuakah reng diah,” pakhai.15Tap thawp takla mih dow bowkbowk kowi 52 ni chekhai. Now ki thawp tap mih dow Elul la kowi lacher 25 ni khe chekhai.16Nami satang tata hanow anging kowh ransu-uüa maten hai anging riaret kowi kowh akeng chenchapuüa maten dow lainowmma kram khai bowt. Tawngplawng kowchow panow Thurai khowng anging luk kowi nami lup anging ia chang mih chekhai pami amatni tuk khai bowt.17Nami 52 ni kowi Juda aluchowuüa hai Tobia büah dow tape chasak reng chekhai.18Tawngbak mih Judauüa dow Tobia kowi natangila kownkow takham khowk chekhai. Tawngplawng kowchow panow aia dow Ara chapa Sekania kowh mawkchow chekhai. Nami klen kowi Tobia chapa Jehohanan chawngah mih paw Berekia chapa Mesulam kowh chama chekhai.19Juda aluchowuüa dow Tobia changah mih lup iung maten uang tek ang reng, now ang tekah mih laiklow paw aia kowi kowtek pe reng chekhai. Tobia dow krawk ang kownkow aplan aplan krawi sak ang cha reng chekhai.
The Seed Company