Nehemia4
1Anging plan thawp tap mih satang tata hanow Samari marow kowi kowh kruitown mih Sanbalat dow mapaw sak-ih dowi hai lainowmma kunmarau khai. Aia dow Judauüa kowi khareah khai.2Aia dow aia re-e kowh maru kawmuüa hai Samari marow kowi kowh siphaiuüa pur kowi tek mih, “Naiawngün kür uowi dowi mih Judauüa matawng chow chang? Nami lup nowng chang büah kown pe bow? Chang phuchua büah now pani sang nami tap nowng thawp kown mih ka tuak büah bow? Adi asekma hai akamnama khowk mih hua chun hownia pawah mih hua hown akhawtma nowng thawp tap büah kown pe bow?” pakhai.3Nakhowk khe Amawn chenchap Tobia dow aia ria kowi tawi uowi khai. Tobia paw tawi tek mih, “Kowbüah thawpah mih tap luk kowi brenkhui khowm padow kowphüt now tap napiak kown mih chowlowbow,” pakhai.4Nakhowk khe Nehemia chup Thurai mih, “Aw anging kowh Thurai, tawng iawng chow maru nü anging klowk anging dowi mih sünta diah. Amatni tekah mih laiklow iawng amatni luk kowi pe tingah diah. Amatni kowi dow tasenra hownia ransu-uüa khümla mih maru iawng akeng pren kowi cham uowi pat changah diah.5Amatni kowh aprek dow hangkow lawtta pe diah, now amatni kowh angak dow en pur hownia hangkow mata pe diah. Tawngplawng kowchow panow amatni dow tap thawp miuüa pur kowi pe en rukrai khai,” pakhai.6Akung kowi nami tap dow anging nau thawpah mowr mih kowi dawnglang khowk anging nowng thawpta. Tawngplawng kowchow panow tap thawp miuüa mih süngür sakkraima hown thawpah büah mih chekhai.7Nachenganchepaw Sanbalat, Tobia, Arabuüa, Amawnuüa hai Asdawd marowchakuüa dow thawp Jerusalem marow tap mih hai tap takhue mih pitta khowk mih ta hanow lainowmma kunmarau khai.8Naiawng rakowi amatni dow takrüpah bowk hanow Jerusalem marow kowi nauang sen kownkow hai nauang pusa kownkow sangkrang khai.9Nachenganchepaw anging chup Thurai khai, now ni-ni uar-uar kangchawng mih anging towah khai.10Nami khin khe Judauüa tawi chawk lai mih,“Lup chang miuüa kür iaw khai bowt.Hua di hua sek paw lainowmma hu khai.Naiawng rakowi a-i kangowchow nowng thawp tap dowi bowt tham,” pakhai.11Naiawng phaw mih khin khe ransu-uüa tatek mih, “Kowbüah tuk dowi hai khi dowi rawn khe kowbüah tut-e a-i kowkowi hanow kowbüah kowi a-i nasaita bowk kown, now kowbüah kowh lup dow a-i nataingta pe kown,” pakhai.12Naiawng rakowi ransu-uüa riaret kowi uowi mih Judauüa dow aplan aplan uang tek anging mih, “Enni mih anging tut-e uang plan büa diah,” pakhai.13Naiawngün laiklow ang tata hanow chowlowkkow krungchak uowi iawng ang paw maru hanow saidawng, reh hai leba ang peah khai, now naiawngün maru-uüa kowi mih tap lak pra kowh anemchow mih arah kowi tap takhue rah re-e ang towah khai.14Nakhowk khe naiawngün maru-uüa tuak krat mih ang tukta khai. Naiawng rakowi amatni hai amatni kowh aluchowuüa hown amatni kowh maru iukuüa kowi ang tek pe mih, “Ransu-uüa kowi hangkow kram. Lang kri lang kraing mih hai kramra uowima mih CHAKRAMANG kowi ka tuakah büa diah, now enni kowh tainau-uüa, chauüa, masi hai kim vüi tasen büa diah,” pakhai.15Now amatni kowh sangkrangra laiklow anging tuk mih hai amatni sangkrang iawng Thurai pe phawah dowi mih anging kowh ransu-uüa tukta khai bowt. Nami kung kowi dow tap prakowi anging kowplan hanow chowlowkkow lup bak uowi iawng anging kowchang lup khai iawk.16Nami ni hownia bowt now anging kowh maru-uüa mih maru iun dawnglang mowr chang lup khai, now akeng miuüa dow reh, kawngma, leba hai leba sek dowkma hown tasen kown mih kamrütma uowi khai. Thawp tap mih Judauüa kung kowi tawi iowngah hanow amatni kowh aluchowuüa mih tawi kruitownah khai. Now tap thawp müa uanh tawn miuüa khowm padow dowkla tasen müa rutchün khawkleng papra se chang lup khai.18Thawp tap mih maten paw amatni kelang kowi tanla saidawng bowk chekhai, now tasen kown khe kowh tum baw kown mih maru dow ang re-e tawi uowi reng chekhai.19Akung kowi dow ringkaw uowi mih maru-uüa, maru iukuüa hai akeng miuüa kowi ang tek pe mih, “A-i kowh lup changra aiukma chekhai. Naiawng rakowi tap riaria lowkkowlowk hownia alak alakchow a-i uowi khai.20Nachenganchepaw enni ta baw tün mih khin khe dow baw tün rah re-e uang takua talawm büa diah. A-i vüi kowi a-i kowh Thurai mih nadowk tasen kown taih,” pakhai.21Naiawng hai uar thowi hownia uariiu pat maru iun dawnglang mih reh dowkma uowi khai, now anging dow chang lup khai.22Nami khin khe maru kawmuüa kowi ang tek pe mih, “Uar-e dow chowlowkkow nar hown kachakuüa maten Jerusalem marow lak kowi pacham uowi lah. Nahanow uar-e dow amatni mih ka chawng marow kown towbowt, now ni-e dow amatni ia chang lup kown towbowt,” pakhai.23Nami khin khe miapaw — ang, ang kowh tainau-uüa, ang kowh naruüa hai kangchawng miuüa — klüp tawnguat dowi chekhai. Now tui ria kowi anging cham kowi khe khowm padow chowlowkkow tasen müa rutchün khawkleng mih anging dowkla reng chekhai.
The Seed Company