Tara chet miuüa8
1Akung kowi Efraimuüa tek pe Gideawn mih, “Kowsen Midianuüa kownkow tarü mih khin tawngplawng kowchow en hawla anging dowi? Tawngplawng kowchow naiawng en tuk chang anging khai?” pakhai. Naiawng hai amatni dow Gideawn kowi lainowmma nangah khai.2Nachenganchepaw Gideawn tek pe amatni mih, “Enni lak-e ang lang changta hu mih tawngpaw uowi dowi chekhai. Enni Efraimuüa lümah dowk mih grep uih khowm padow anging Abiezeruüa rik lüngah mih grep uih lak-e lang iung nadowi bow?3Midianuüa kowh mang Oreb hai Zeb iüah kowi Thurai mih enni rut kowi ap enni khai. Enni hown che tuah now ang dow tawngpaw lang chang hu dowi chekhai,” pape khai. Naiawng Gideawn tek mih ta hanow aia luk kowi kowh Efraimuüa kowh kunmaraura dow prowng khai bowt.4Gideawn hai aia kowh 300 ia mih maru-uüa dow Jawrdan aw re-e uang ting hanow haipown Jawrdan aw büah khai. Amatni dow bowm mih nowm khowk chepaw ransu-uüa kowi krawi ia um dowi mowr kawikrawi büah khai.5Now Sukawt marow kowi kowting büah khe Gideawn tek pe marowchakuüa mih, “Sakrauma hown ang kowh siphai hawmh kowi pe chaah chakkham ne dit. Kowbüah dow bowm mih nowm khowk. Kawmat mowr kowi Midianuüa kowh mang Zeba hai Zalmuna iüah kowi anging krawi um dowi tak,” pakhai.6Nachenganchepaw Sukawt marow kowi kowh aluchowuüa tek pe mih, “Tawngplawng kowchow en kowh siphai hawmh kowi anging napeah chakkham kown? Zeba hai Zalmuna iüah kowi enni krawi ia khümta khowk bow?” pabüah khai.7Gideawn tek pe mih, “Iung taih! CHAKRAMANG dow Zeba hai Zalmuna iüah kowi anging rut kowi naap anging kown. Nami kung kowi dow enni tut-e anging nauang plan uang iawk kown. Nakhowk khe chiang süngrüp süngkangma kowi kowh chuh hai chuh kangowh mih singh hown nga tasek pat anging nabawp enni kown,” pakhai.8Nami kung kowi dow Gideawn mih Sukawt hownia Penuel marow kowi kowkowi khai. Now nakowi kowh maru-uüa tut-e paw aia mih kowlü chakkham khai. Tawkche nakowi kowh maru-uüa paw Sukawt marowchakuüa tek iawng Gideawn kowi hawt tek pe khai.9Naiawng rakowi Penuel marowchakuüa kowi Gideawn tek pe mih, “Tasen awng kung kowi enni tut-e ang nauang plan uang iawk kown. Nakhowk khe mami kimkrowng ang napiakta enni nak kown,” pakhai.10Nami khin khe Zeba hai Zalmuna iüah dow amatchi kowh siphai hawmh hown Karkawr marow kowi uowi khai. Satlawt pra kowh pren hownia siphaiuüa pungmadawng kowi kowh ta sing mih dow 15,000 ia towbowt. Tawngplawng kowchow panow kowng mih dow 120,000 ia khowk chekhai.11Gideawn dow Noba marow hai Jawkbeha marow satlawt prakowi kowh tiama iawng kowkowi khai. Now Midianuüa kowh siphai mingmang dowi khe Gideawn mih kowsenah khai. Ransu-uüa dow naiawng Gideawn nauang senah kown mih hing ka tuak dowi chekhai.12Naiawng kowsenah mih khin khe Midianuüa kowh mang Zeba hai Zalmuna iüah dow ku powt khai. Nachenganchepaw Gideawn dow amatchi kowi kawikrawiah hanow krawi khümta khai. Now amatchi kowh siphai hawmh maten dow Gideawn rakowi lainowmma kram khai.13Nami kung kowi Joas kowh chapa Gideawn mih Heres pami pangchowng iawng tasenra hownia uang plan khai bowt.14Gideawn mih Sukawt marow hownia uang khümla klanguüa lowk ia khai. Now aia dow nami klanguüa kowi marow kowi kowh maru iukuüa ming hai lawngtang aluchowuüa ming lüntaah khai. Nahanow nami klanguüa dow naiawngün 77 ia ming rui pe khai.15Nami kung kowi dow Gideawn mih Sukawt marow kowi kowkowi khai. Now tek pe marowchakuüa mih, “Mow, Zeba hai Zalmuna iüah. Ang uang rik uang khe dow enni khare ang khai. Nakhowk khe enni tek ang mih, ‘Tawngplawng kowchow en kowh siphai hawmh kowi anging napeah chakkham kown? Zeba hai Zalmuna iüah kowi enni krawi ka khüm khowk bow?’ pakhai,” pape khai.16Nahanow Gideawn mih Sukawt marow kowi kowh lawngtang aluchowuüa kowi khümah khai. Now amatni kowi dow süngrüp süngkangma kowi kowh chuh hai chuh kangowh mih singh hown bawpah khai. Naiawng hai amatni kowi dow Gideawn ripah khai.17Nami kung kowi dow aia mih Penuel marow kowi kowkowi khai. Aia dow nakowi kowh kimkrowng mih piakta pe khai, now marow kowi kowh kachakuüa kowi paw aia saita bowk khai.18Nami kung kowi Gideawn tek pe Zeba hai Zalmuna iüah mih, “Tabawr hungh kowi kowh enchi kowngta mih maru-uüa tawng iawng mih maru chow?” pakhai. Kowiüah tek pe mih, “Naiawngün maru-uüa dow en iawng; kowbüah dow mang chapa iawng kangowh chekhai,” pape khai.19Gideawn tek pe mih, “Naiawngünuüa dow ang tainau-uüa chekhai, amatni dow a-u kowh chapauüa chekhai. Masing CHAKRAMANG ming hown ang tek khowk; naiawngünuüa kowi enchi che saita dowi e dow ang paw sai enchi dowi tham diah,” pakhai.20Nami kung kowi achapa ta Jether kowi Gideawn tek pe mih, “Kowiüah kowi sai madiah!” pakhai. Nachenganchepaw Jether dow kram kowh aia kowh saidawng iu howk dowi chekhai. Tawngplawng kowchow panow aia dow ning diachow taih tak chekhai.21Nakhowk khe Zeba hai Zalmuna iüah tek pe Gideawn mih, “En phai uang sai angching towbowt! En che kachakuüa chah ching chekhai hanow uang sai angching diah,” pape khai. Naiawng rakowi Gideawn dow amatchi pre ia kowi saita khai. Now amatchi kowh ut ngawng kowi kowh kuh ngawng awr dow klüpah hanow pawta pe khai.22Nami kung kowi Israeluüa tek pe Gideawn mih, “Midianuüa rut hownia en lawng anging khai. Naiawng rakowi en hai en kowh krungchakuüa mih anging kowh kruitown miia chowng towbowt,” pakhai.23Gideawn tek pe amatni mih, “Ang dow enni kowh kruitown mih nachowng kown nadowi, now ang kowh chapa paw enni kowh kruitown mih nachowng kown nadowi; CHAKRAMANG chowtaih enni kowh kruitown mih nachowng kown,” pape khai.24Gideawn plan tek pe mih, “Ang lü enni kown mih uanh uowi pachap. Ransu-uüa hownia kowh enni uang kala mih kuh ramseng maten pe ang büa diah,” pakhai. (Tawngplawng kowchow panow Midianuüa dow Ismael krungchakuüa chekhai. Naiawng rakowi Ismaeluüa dow kuh ramseng ü bowk chekhai).25Israeluüa tek pe Gideawn mih, “Ow, anging nape en kown taih,” pape khai. Naiawng rakowi Israeluüa dow be pe uan lowk khai, now nami uan luk kowi amatni chowlowkkow kala mih kuh ramseng maten peta büah khai.26Naiawngün kuh ramseng dow bowkbowk kowi adik 20 set ngia chekhai. Nami klen kowi Gideawn kowh dow kuh leng, kuh hown kowh akeng mih tatawng müa uanh, Midian manguüa khupah mih mintau pau rawng uan hai ut kowi kowh ü pe mih kuh ngawng awr ün uowi chekhai.27Gideawn dow naiawngün kuh hown thawp ephawd kowrmow lowk khai, now aia uowi rah Ofra marow kowi towah khai. Now nakowi dow Israeluüa maten mih CHAKRAMANG kaah sakowm dowi iawng nami ephawd kowrmow kowi uang chupiia büah khai. Nami dow Gideawn hai aia kimchakuüa vüi leng kowi tasowk khe kowh iawng chekhai.28Naiawng hai Israeluüa mih Midianuüa kowi senah khai. Amatni dow Israeluüa pur kowi mapaw kownowng iowng dowi bowt chekhai. Gideawn sing uowi mowr dow pren mih 40 ning mowr thaulangma chekhai.29Tasen kung kowi Joas kowh chapa Jerub-Baal dow aia kim kowi kowplan khai bowt.30Gideawn kowh dow masi akawmma chekhai. Naiawng rakowi aia kowh dow chapa uowi 70 ia chekhai.31Sekem marow kowi paw aia changla masi mih narma uowi lowk ia. Nami masi hown paw aia dow ka kachakuüa chah lowk ia chekhai. Aming dow Abimelek pahai Gideawn rük pe khai.32Joas kowh chapa Gideawn dow lawngtangma khe kowng khai. Aia kowi dow a-pa Joas tadupra kowi dupah khai. Nami tadupra dow Abiezeruüa kowh Ofra marow kowi chekhai.33Gideawn kowng kung kowi dow Israeluüa mih CHAKRAMANG kaah sakowm dowi iawng Baal thuraiuüa kowi cham plan chupiia büah khai. Amatni dow Baal-Berit kowi changla thurai büah khai.34Amatni dow amatni riaret kowi kowh ransu-uüa hownia lawngah mih CHAKRAMANG amatni kowh Thurai kowi tamata büah khai.35Jerub-Baal dow Israeluüa vüi aiungma changla pe khowk chowdiah. Tawkche amatni dow aia kimchakuüa vüi aiungma chang pe dowi chekhai. (Jerub-Baal dow Gideawn chekhai).
The Seed Company