Jeremia51
1CHAKRAMANG tek mih,“Sünta, Babulawnuüa hai Babulawn kowi kowh uowi miuüa kowi napiakah kownkowli iawng akürma mih siphaiuüa kowi ang nauang chin pe kown.2Babulawn kowi mih chapli kowi li rownla iawng napawla kownkow prenlang siphaiuüa kowi ang nauang chin pe kown,aia kowh maru-uüa kowi napiakta pe kownkow prenlang siphaiuüa kowi ang nauang chin pe kown.Aia kowi dow bowkbowk hownia nauang senah kown,now aia dow akhaw aklaima ransu-uüa nata towla hüah kown.3Babulawn siphaiuüa ka khup tasen tawnguat dowi rawn uang büa diah,amatni ka uüi leba dowi rawn uang senah büa diah.Amatni kowh tasen lang kiak mih siphaiuüa kowi khowm hangkow pe plaiah diah,amatni kowh siphaiuüa maten kowi asaima saita pe diah.4Amatni kowh uak dow Babulawnuüa pren kowi natakuakla pan kown,amatni dow ka arau kowh tiama towng kowi kowng mih natakuakla pan kown.5Israel hai Juda pren mih mukuang siphaiuüa kowh CHAKRAMANG nuata dowi tak.Amatni kowh pren dow Israel kowh chimsaima mih kowi kingküala mih angak tek khai bowt;nachenganchepaw kawmat pat aia dow amatni kowh Thurai chowreng chekhai.6“Judauüa hai Israeluüa low, Babulawn hownia alenma powt büa diah,enni kowh sak naplaila kownkow iowm büa diah.Aia kowh angak rakowi hang tawi piak büa diah,CHAKRAMANG nasat klai kown mih khin uang ting khai bowt.Aia kowh kakbak dow aia kowi CHAKRAMANG napeah kown.7Babulawn dow CHAKRAMANG rut kowi kowh kuh bia iawng chowdiah,aia dow palusama maru kowi pe puaah khai.Chenchapuüa mih aia kowh grep tui tawi kham khai.Naiawng rakowi amatni dow kawmat thu khai bowt.8Babulawn dow mingmang dowi khe dowh kowh teu khai bowt,aia vüi kar büah nguk büa diah.Aia kowh arau iung müa uang pawla pe chakhang büa diah;aia kowh arau naiung chepaw naia.9Prenlang maru-uüa tek mih, ‘Babulawn naiungla kownkowanging khowngah khowk chowdiah.Tawkche aia mih ia iung dowi bowt chekhai.Chu, aia kowi towla hüah now chowlowkkow pren kowi i mangta pe bowt lah.Tawngplawng kowchow panow aia kowh ripra dow kuangchan kowi tawk khai bowt.Nami ripra dow kraing lai bowt kowh nowng khaiah dowi bowt,’ pakhai.10Judauüa hai Israeluüa tek mih, ‘A-i dow CHAKRAMANG matia kowh maru chekhai pami aia tüngah khai.Naiawng rakowi chu, a-i kowh CHAKRAMANG Thurai changah mih lup lawnguan Zaiawn kowi i kowtek diah sik,’ pabüah khai,” pakhai.11CHAKRAMANG mih Babulawnuüa kowi nasenah kownkow Media mang kowi kowkrowkah khai. Tawngplawng kowchow panow aia kamrütra dow Babulawn kowi napiakta kown mih chekhai. Aia kowh chup kim piakta mih rakowi CHAKRAMANG mih Babulawnuüa kowi nasat pe aklai ngengche kown. Babulawn kowi uang senah mih siphai aluchow tek pe siphaiuüa mih, “Enni kowh leba sek sükah büa diah, now pawla kawngma büa diah,” pakhai.12Babulawn kowi nasenah kownkow ruang tamkhuown lowk diah,kangchawng miuüa kowi akhawtma changah küng diah.Tow kangchawng mih diah,siphaiuüa kowi tapetra kowi towah diah.CHAKRAMANG mih aia tekta iawng Babulawnuüa kowi changah khai.13Aw Babulawn, en dow tui huma mih ria kowi en uowi khai,now en kowh dow dawngthawnguan ahuma chekhai.Nachenganchepaw en kowh chur khin uang ting khai bowt,en kowh piak khin uang ting khai bowt.14Mukuang siphaiuüa kowh CHAKRAMANG dow aia ming hown takham se tek mih,“Babulawn pren kowi dow plawng hawmh iawng ransu akawmma ang nauang pawla en kown,now naiawngün maru kawm dow awng mih klow atünma natüng büah kown,” pakhai.15CHAKRAMANG dow aiamat kür hown lusa mih thawpah khai;aia kowh chanlaira hown lusa mih aia thawpah khai,now aia kowh prengia hown mukuang mih aia thawpah khai.16Aia kowh ana hown mukuang kowi dow tui tün nowk rumrum reng,aia dow prenchur nammowt hownia uangnim kowi uang pawla reng.Aia dow uang nauangla kownkow pla kowi pe nowiah reng,now aia dow li krümra hownia li kowi uang lawtla reng.17Maru maten bualama hai chanlaira uowi dowi chekhai,kuh hown kowh uanthawp sarauüa dow amatni thawpah mih arup rakowi ka rukrai khai.Tawngplawng kowchow panow amatni thawpah mih arup dow aiua chowtaih,now asak paw uowi dowi chekhai.18Naiawngün arup dow asung uowi dowi hai khare nichak müa uanh chowtaih,tara chetra khin khe naiawngün dow napiak bowk kown.19Nachenganchepaw Jakawb kowh Thurai dow naiawngün arup iawng nadowi,aia dow lowra uanh thawp miia chekhai.Now Israeluüa dow aiamat kowh amülüng mih dawngthawnguan chekhai,aia kowh ming dow mukuang siphaiuüa kowh CHAKRAMANG chekhai.20CHAKRAMANG tek mih, “Aw Babulawn, en dow ang kowh tasen müa rutchün khawkleng chekhai,pren hai chenchapuüa kowi en hown ang piakah khai.21En hown kawrnga hai kawrnga kowi kowh chowm miuüa kowi ang piakah khai,en hown kawrnga kari hai kawrnga kari te miuüa kowi ang piakah khai.22En hown masiuüa hai kachakuüa kowi ang piakah khai;en hown lawngtanguüa hai ngeuüa kowi ang piakah khai,now en hown malauüa hai klanguüa kowi ang piakah khai.23En hown ruapur thing miuüa hai ruapur hawmh kowi ang piakah khai;en hown laithawn miuüa hai chiala hawm kowi ang piakah khai,now en hown pren kruitown miuüa hai mang kowh maru iukuüa kowi ang piakah khai.24“Nachenganchepaw kawmat dow Zaiawn kowi kowh en changah mih klai ang nasat en kown. Babulawn hai Babulawn kowi kowh uowi miuüa maten kowi ang maru-uüa pur kowi ang naripah kown,” pakhai.25CHAKRAMANG tek mih, “Aw Babulawn, en dow palusama kowi krawi piak mih hungh iawng chekhai.Nachenganchepaw kawmat dow ang nakingküa en kown.Ang kowh rut parah hanow hungh hownia ang nalün en kown,now akamnama mih hungh iawng ang nachang en kown.26En pren kowi kowh hua dow nachangla kim kownkow lowkchow khowm maru natawngah kown nadowi bowt,en dow chowngchowng saksakma akhaw aklaima nauowi bowt kown.27“Nadowk tasen kown mih amat müa ruang tamkhuown büa diah,now tum baw büa diah.Babulawn kowi nasenah kownkow chenchapuüa kowi pe kamrütah diah;aia kowi nauang tawi sen kownkow Ararat, Minni hai Askenaz prenchak kowi hawla büa diah.Aia kowi nakowsen kownkow rui siphai aluchow lowk ia diah,now plawng hawmh iawng ahuma pawla kawrnga büa diah.28Aia kowi nakowsen kownkow chenchapuüa kowi pe kamrütah diah;Mediauüa kowh manguüa kowi hai amatni kowh pren kruitown miuüa kowi pe kamrütah diah,now mang kowh maru iukuüa hai amatni krüa kowi kowh uowi mih pren maten kowi paw pe kamrütah diah.29Babulawn pren dow rau lai bowt kowh chür prang towbowt.Tawngplawng kowchow panow CHAKRAMANG dow Babulawn kowi akhaw aklaima hai apiaknama nachangah kown mih kamrüt khai,now aia dow nami aia kamrütta mih iawng Babulawn kowi chang pe khai bowt.30Babulawn kowh tasen mih siphaiuüa dow taingta tasen khai bowt,amatni dow amatni kowh akhawtma mih kangchawngra kim kowi uowi hüah khai bowt.Amatni kowh dow kür khowk khai bowt,amatni dow masiuüa iawng auaklakma phaw khai bowt.Amatni kowh uowi rah dow towkta pe khai bowt,Babulawn kowh tapplawt klia maten dow piakta pe khai bowt.31Satang phowng miuüa dow alowk kung kowi alowk Babulawn mang kowi uang phowng pe satang khai.Aia kowh marow ransu-uüa powngta pe mih satang dow aia kowi maru uang phowng pe khai.32Aw kowi kowh khawk hown nowng pownah mih arah ransu-uüa powngta pe khai,now uaklung taw dow towkta pe khai.Naiawng rakowi Babulawn siphaiuüa dow lainowmma kram khai bowt.33Ang mukuang siphaiuüa kowh CHAKRAMANG Israeluüa kowh Thurai tek khowk.Babulawn dow te kowi küaah mih luprak iawng phaw khai bowt,ngen luprak mih iawng aia kowi nangenah kown mih khin uang ting khai bowt,” pakhai.34Jerusalem maru-uüa tek mih, “Babulawn pren mang Nebuknezar iawnta anging khai;aia dow dita anging nak khai,now tuikawng khaw iawng tow anging khai.Aia dow rua mang iawng iawnta anging khai;anging kowh uanh iung maten dow aia pawta anging khai,now anging pren hownia aia kuakta anging khai,” pakhai.35Zaiawn kowi kowh uowi miuüa dow maiawng pacham tek lah:“Anging kowi kowh chang anging nowng mih iawng Babulawnuüa kowi paw changah nowng büah dit,Sai anging mih iawng Babulawnuüa kowi paw saiah büah dit,” pahai pacham tek lah.36Naiawng rakowi CHAKRAMANG tek mih, “Aw Jerusalem, ang natawi tangila en kown taih,now en vüi ang nasat pe klai kown taih.Babulawn kowh sata mih ang nakangta pe kown,now aia kowh tui lawtra maten paw ang nakangta pe kown.37Babulawn dow apiaknama naphaw kown;aia dow nachowng brenkhui hawmh uowi rah kown,now maru prawngren müa nachowng kown.Nakowi dow miapaw nauowi kown nadowi bowt,aia piak krang dow khi hanow maru naawda kown.38“Aia kowh maru-uüa maten dow krangsi iawng nahek kown,now krangsi chah iawng nalai büah kown.39Amatni chak sakkrai nowm nowm khe dow ang nakamrüt pe pawi lowk kown,amatni naia piawla kownkow amatni kowi dow ang nape puaah kown.Nami kung kowi dow katpaw thowr dowi bowt pat achowngma vüi ang nape müiah kown.40Amatni kowi dow ngenra prakowi ruapur, ruapur chah hai rua kowi iawng ang napawla kown,now nakowi dow tawncher ngen iawng amatni kowi ang nangenah kown.41“Babulawn kowi dow palusama kiowah chowdiah.Nachenganchepaw aia dow tim khai bowt.Aia kowh piak krang khi hanow chenchapuüa mih lainowmma naawda kown.42Babulawn luk kowi dow sata tuilowng iawngransu-uüa nauang taluk khup kown.43Aia kowh marow ün dow napiak bowk kown,naiawngün marow dow akang khawngma mih süngrüp süngkangma pren iawng naown kown.Nakowi dow miapaw nauowi kown nadowi,now nami pren iawng dow miapaw namang nakat kown nadowi.44Babulawn kowi kowh Bel thurai kowi dow ang naripah kown;aia kowi dow aia iawnah mih maten ang nape hükah kown.Aia tut-e dow tui hawr iualua mih iawng chenchapuüa nakowkowi kown nadowi bowt.Aia kowh tap paw natakhue bowt kown.45“Aw ang maru-uüa, Babulawn pren hownia uang lawt büa diah,enni matia sak naplaila kownkow uang powt büa diah.CHAKRAMANG kowh kunmarau lün pluplup mih hownianaplaila kownkow alenma powt büa diah.46Babulawn pren kowi anowm nadowi mih satang enni ta khe hangkow kram büa diah,now hangkow sak nen büa diah.Pren kowi dow paning kowh paning anowm nadowi mih satang nakrawi tauet kown;tawngbak khe dow Babulawn kowi kowh nowng chang powng changra satang enni nata kown,now mami mang hown paimi mang tasen mih satang enni nata kown.47Babulawn kowi kowh arup aren kowiang naripah kown mih khin nauang ting ngengche kown chowbowt.Aia kowh pren paprenma narukrai kown,aia kowh kowng mih maru-uüa maten dow tiama kowi natakuakla pan kown.48Nami kung kowi dow mukuang hai lusa kowi kowh uowi mih maten Babulawn piak mih lawnguan ta hanow piaw kowh nahow kown.Tawngplawng kowchow panow tawngphak hownia aia kowi napiakah kown mih maru nauang senah kown.Ang CHAKRAMANG mami laiklow ang tek khowk.49Babulawn rakowi palusama maru kowngla klip mih iawngIsraeluüa kowi kowngta mih rakowi Babulawnuüa paw nakowng kown.50Kowngra hownia enni ia plai miuüa low,uang powt büa diah, hangkow kra tham bowt.Alakma mih pren kowi enni uowi khe CHAKRAMANG kowi ka tuak büa diah,now Jerusalem lawnguan kowi tuakah büa diah.51“Enni tek mih, ‘Maru prawngren anging kowh anging ka rukrai khai bowt,rukrai rakowi anging mumta lumowr khai bowt.Tawngplawng kowchow panow CHAKRAMANG chup kim kowi kowh chimsaima mih rah kowi prenlang maru-uüa uang kup khai,’ pakhai.52Nachenganchepaw ang tek khowk,Babulawn kowi kowh arup aren kowi ang naripah kown mih khin uang ting khowk.Nakhowk khe ka arau kowh Babulawn kowi kowh arah maten kowi maru nakarla sawm kown.53Kuang dawng kowi pat Babulawn kowting chepaw;now kangchawngra kimkrowng khawt chamang khawt changah chepaw,aia kowi napiakah kown mih maru ang nakowchin pe kown,” pakhai.54Babulawn hownia kar klow tarua phawnglawng khai,Babulawn pren hownia piak mih klow nowk rumrum khai.55Tawngplawng kowchow panow CHAKRAMANG mih Babulawn kowi piakah thüm chekhai,aia kowh klow kraingma mih dow CHAKRAMANG nataingta pe kown.Ransu-uüa mih tuilowng iawng dow aklow nowk rumrum nauang kown,amatni dow atün atünma hekla se Babulawn kowi nauang senah kown.56Babulawn kowi nauang senah kownkow krawi piak mih maru-uüa uang khai;amatni dow Babulawn kowh siphaiuüa kowi khümah khai,now amatni kowh leba mih klowkta pe büah khai.Tawngplawng kowchow panow CHAKRAMANG dow aklai sat mih Thurai chekhai;aia dow Babulawnuüa kowi amatni krawi chang mih klai sat pe khai.57Mukuang siphaiuüa kowh CHAKRAMANG pami mang tek mih, “Aia kowh maru iukuüa, chanlai miuüa,pren kruitown miuüa, akeng mih maru iukuüa hai tasen mih siphaiuüa kowi apuama ang nachangah kown.Amatni dow achowngma vüi namüi bowt kown,amatni dow nathowr kown nadowi bowt.58Babulawn kowi kowh tap dow nakheuta hanow krawng hown alik sang ang nachangta pe kown,now aia kowh tapplawt akroma mih dow ang natowkta pe kown.Maru-uüa kawmah mih dow aiawnglowma nachowng kown,now chenchapuüa kowh kawm sung dow maih kowi nakam kown,” pakhai.59Juda pren kowi Zedekia chowm mang mih tali ning khe mang Zedekia hown Seraia mih Babulawn pren kowi kowtawi khai. Nakhowk khe Seraia kowi risi Jeremia peah ana ne khai. Seraia dow Neria kowh chapa chekhai, now Neria dow Meseia kowh chapa chekhai. Seraia dow mang kowh hawmlawm bawng chekhai.60Babulawn pren luk kowi kowh phih nauang ting kown mih lawnguan maten Jeremia mih charam tua kowi ruiah khai.61Seraia kowi Jeremia tek pe mih, “Babulawn pren kowi en kowting khe mami charam tua kowi kowh laiklow maten maru-uüa kowi en naphat pe kown mih kowi pela ching diah.62Nami kung kowi en natek pe kown mih, ‘Aw CHAKRAMANG, mami arah napiakta kown mih laiklow en tek khai. Nahanow maru hai tawncher mih makowi miapaw nauowi kown nadowi bowt. Nami arah dow achowngma vüi akhaw aklaima nauowi kown towbowt,’ pape diah.63Mami charam tua en ki phat kung kowi dow tap pe huaklu lowk hanow Iufratis aw kowi en nakuakta kown.64Nami kung kowi dow en natek kown mih, ‘Babulawn dow mami iawng nanip kown. Aia dow narü kown nadowi bowt. Tawngplawng kowchow panow aia luk kowi dow CHAKRAMANG mih nauang pawla pe phih kown chekhai. Aia dow asaima napiak kown,’ pape diah,” pakhai.
Jeremia kowh laiklow dow mami mowr now chur khai bowt.
Jeremia kowh laiklow dow mami mowr now chur khai bowt.
The Seed Company