Jeremia5
1Jerusalem maru-uüa kowi CHAKRAMANG tek pe mih,“Jerusalem marow kowi kowh mami tiakrum hownia paimi tiakrum mowr kowkrawi len diah,now aria aret kowi krawi tang mü diah.Nami marow kowi kowh viadawng kowi ün anowmma mih maru krawi cham diah,nakowi dow achinawmma mih maru kowi krawi cham diah.Naiawng mih maru che uowi lowk ia hanow Jerusalem marow mih ang napiakah kown nadowi.2‘Masing Thurai ming hown anging takham khowk,’pahai amatni tek chepaw nami dow dai lai sawi kham amatni chang mih chekhai,” pakhai.3Aw CHAKRAMANG, en nau mih dow en maru-uüa en kaah sakowm iawng nauowi kown mih chekhai.Naiawng rakowi amatni kowi dow en peah arau khai.Tawkche amatni dow en peah arau pami tuk büah dowi chekhai.Amatni kowi dow en ripah khowk chowdiah.Nachenganchepaw amatni dow tarip dowi rengreng tak chekhai.Amatni kowh saktuak dow hua lak-e lang khawt chekhai,angak hownia amatni dow en tut-e uang plan dowi chekhai.4Ang ka tuak mih, “Naiawngün maru-uüa dow ngaraima hai abualama chekhai.Amatni dow CHAKRAMANG kowh tiama hai ari aiang tuk dowi chekhai.5Naiawng rakowi aluchowuüa tut-e ang nakowkowi kown,now amatni hown ang nakowtalawp kown.Tawngplawng kowchow panow amatni dow CHAKRAMANG kowh tiama tuk chekhai,now Thurai kowh ari aiang lawnguan paw atukma chekhai,” pakhai.Tawkche amatni paw CHAKRAMANG kowh laiklow chün dowi chekhai.6Naiawng rakowi amatni kowi dow kaurawng hownia krangsi uangah hanow nauang makah kown;süngrüp süngkangma kowi kowh sui amatni kowi dow nauang chawmah kown.Amatni kowh marow ria kowi pri rengchow nahawt pawmah kown,marow hownia kowh uang lawt mih maru kowi dow pri rengchow nahawt makah kown.Tawngplawng kowchow panow amatni dow lainowmma chang angak khai,now angak tia kowi amatni cham mang mih paw ahuma khowk chekhai.7CHAKRAMANG tek mih,“Aw Jerusalem, tawngplawng kowchow ang nalawt en kown?En kowh chauüa dow nuata ang khai,now Thurai ching nadowi mih ming hown cham kham sawi büah khai.Amatni kowi dow amatni nau mih srui ang peah khowk chowdiah.Nachenganchepaw amatni dow akeng thurai hown cham chang iang khai,now amatni dow ahawmsang akeng thurai kowi cham chupiia büah khai.8Amatni dow chata chakkham kak now lowkkowlowk masi hown taphua taiua reng chekhai,amatni dow tapaw hau kownkow krawi len panglang mih kawrngala iawng chekhai.9Naiawng rakowi amatni kowi dow ang naripah kown;naiawng mih chenchap luk kowi ang nasat pe klai kown.10“Aw ransu-uüa, Jerusalem marowchakuüa kowi kowpiakah diah.Tawkche amatni kowi asaima pat hangkow piak büa diah.Amatni kowi dow do singh mia khe kowh iawng piakah büa diah.Tawngplawng kowchow panow amatni dow CHAKRAMANG kowh maru nadowi chekhai.11Israeluüa hai Judauüa dow ang kaah sakowm dowi iawng uowi khai,ang CHAKRAMANG mami laiklow ang tek khowk,” pakhai.12CHAKRAMANG kowh maru-uüa dow CHAKRAMANG lawnguan kowi tek dai lai khai.Amatni dow tek mih, “Aia mih tawngpaw narip a-i kown nadowi,aia mih tawngpaw napiak a-i kown nadowi.Tasen hai khown ün tawngpaw a-i nakrum kown nadowi.13Risiuüa kowh laiklow dow li iawng asung uowi dowi chekhai,amatni tut-e dow Thurai kowh laiklow uowi dowi chekhai,” pakhai.Naiawng rakowi amatni tekah mih laiklow dow amatni luk kowi nauang kla kown.14Naiawng rakowi mukuang siphaiuüa kowh CHAKRAMANG Thurai tek ang mih,“Jerusalem maru-uüa kowi ang naripah kown nadowi pahai maru kawmuüa krawi tek khai.Naiawng rakowi ang kowh laiklow mih maih iawng en nawr hownia nauang lawt kown,now amatni kowi dow sawp kowi maih kamah iawng ang nakamah kown,” pakhai.15CHAKRAMANG tek mih, “Aw Israeluüa, enni kowi nakingküala kownkowalakma hownia ang nauang pawla enni chenchap lowk kown.Amatni dow alai hownia kowh akürma mih chenchap chekhai;amatni kowh lai dow enni natuk kown nadowi,now tukta paw enni natukta kown nadowi.16Amatni dow salangba ap kiakma chekhai,now amatni dow tasen akürma kangowh chekhai.17Amatni dow enni kowh uih-ak hai chakkham mih nachata enni bowk kown,now enni kowh chauüa kowi paw nasaita enni kown.Nami klen kowi enni kowh chia hai ruapur hawmh paw nakowngta enni kown;enni kowh grep ruih hai uidut singh ün nakripta enni kown.Enni sakowmah mih tap tapat lut mih marow dow napiakta enni nak kown,” pakhai.18CHAKRAMANG tek pe Juda-uüa mih, “Nachenganchepaw nami ni khe dow asaima ang napiak enni kown nadowi.19Jeremia, en kowi Judauüa nalünta en kown mih, ‘Tawngplawng kowchow CHAKRAMANG anging kowh Thurai maiawng tuk chang anging khai?’ napa kown. Nakhowk khe amatni kowi en natek pe kown mih, ‘Ang kowi enni nuata ang hanow enni pren kowi akeng thurai kowi enni chupiia khai. Naiawng rakowi kawmat enni mih akeng pren kowi kowh prenlang maru tut-e nar iawng hai enni nacham chang lup kown,’ pape diah,” pakhai.20CHAKRAMANG mih Jakawb krungchakuüa tut-e mami laiklow kowpe phuang ang khai,now Juda krungchak tut-e paw mami laiklow kowpe phuang ang khai.21Aia tek mih, “Aw abualama mih hai prengia uowi dowi mih maru-uüa,mik uowi chepaw khi dowi miuüa hai param uowi chepaw ta dowi miuüa low, sünta büa diah.22Enni ringkaw ang dowi bowt tham bow?Ang pur kowi enni kram kowh chür dowi bowt tham bow?Sata tui nave phunglung dowi kownkow chowngchowng saksakma vüi se hown ang thawpta rihi khowk;sata tui talowng phunglung chepaw nami rihi kowi dow nauang ia ue kown nadowi bowt,now tui talowng mih klow nowk rumrum chepaw nami rihi kowi nauang ia ue kown nadowi.23Nachenganchepaw naiawngün maru-uüa dow saktuak khawtma hai kingküa dawma chekhai,amatni dow angakma mih tiama kowi mang reng chekhai.24Amatni dow, ‘Chu, CHAKRAMANG a-i kowh Thurai kowi ringkawma hown a-i kram diah sik.Aia dow akhin khe pe a-i uang reng chekhai,aia dow a-i vüi kowi luprak kua khin towah a-i reng chekhai,’ pahaisakdawng kowi katpaw tek dowi chekhai.25Akhin khe enni ka uang dowi mih hai ka luprak dowi mih dow enni chang ngak rakowi chekhai,now enni kowh iungra uowi dowi mih paw enni chang ngak rakowi chekhai.26“Ang maru-uüa pungmadawng kowi angakma mih maru uowi chekhai;amatni dow uakling ap mih maru iawng hawt tapet hüah khai,now hawt khüm maru kownkow hawt thang leng reng chekhai.27Pawm kowi atekma uakling uowi iawng amatni kim kowi dawngthawnguan atekma chekhai.Naiawngün dow amatni cham kuan maru mih hownia kowh kaah mih dawngthawnguan chekhai.Naiawng rakowi amatni dow akürma hai kurengma chekhai.28Amatni dow cham krawi kuanah mih chakkham hown kau mih sisurlur towbowt,amatni kowh lup ngak chang dow achur uowi dowi chekhai.Amatni dow saratchowuüa naka tara nowm pami rakowi tawi tangila dowi chekhai,now ngarai miuüa kowi paw tara nowm chet pe dowi chekhai.29Naiawng rakowi amatni kowi dow ang naripah kown,naiawng mih chenchapuüa luk kowi ang nasat pe klai kown.Ang CHAKRAMANG mami laiklow ang tek khowk.30“Juda pren kowi dow kramra uowima mih lup uang phaw khai bowt,nakowi dow awdara uowima mih lup paw uang phaw khai bowt.31Risiuüa dow krawi küa dai khai,now uamowuüa paw amatni low iawng krawi chang khai.Ang maru-uüa dow naiawng mih lang nau rowt chekhai.Tawkche enni luk kowi piakra uang ting mih khin khe tawng chow enni nachang kown?” pakhai.
The Seed Company