Jeremia46
1Mami dow chenchapuüa lawnguan kowi kowh risi Jeremia kowi CHAKRAMANG uang tek pe mih laiklow chekhai.
Aiguptauüa kowi CHAKRAMANG naripah kown mih
2Juda pren kowi Josia kowh chapa Jehoiakim chowm mang mih tali ning khe Babulawn pren hai Aigupta pren mih tasen khai. Nami khin khe Karchemis marow kowi Nebuknezar mih Aigupta pren mang Faraw-Nekaw kowh siphaiuüa kowi senah now nowngta khai. Nami siphaiuüa lawnguan kowi CHAKRAMANG tek mih,3“Enni kowh kawngma aiuk asowm uowi mih maten pawla diah,now cham dowk tasen kownkow lawt büa diah.4Enni kowh kawrnga kamrütla hanow nami luk kowi chowm büa diah,krukla lukruk büah hanow atanma kowiowng büa diah.Enni kowh reh mih tawk pluplup pat sükah büah diah,now enni kowh tasen tawnguat tawngla büa diah.5“Tawngplawng kowchow naiawng ang tuk khi khai?Amatni dow kram kowh kung prakowi sut khai,amatni kowh siphaiuüa dow sum khai.Amatni dow sum kowh kung prakowi ngeula dowi kowi alenma powt khai,amatni dow lainowmma kram khai.6Iowm lenma miuüa paw ia powt dowi chekhai,now akürma miuüa paw nowng powt dowi chekhai.Amatni dow tawngphak prakowi Iufratis aw re-e tatheu kowh tim büah khai.7“Paimi uang hai mang mih amia chenchap chow?Nail aw tui krawi limta pren bowk mih iawng uang haimang mih mia chow?8Aigupta siphaiuüa uaimang mih dow Nail aw tui iawng chekhai.Nami dow krawi limta pren bowk mih aw tui iawng chekhai.Amatni dow bawrima hown tek mih, ‘Anging nakrawi mumta lusa bowk kown,now anging nakrawi piakta marow hai maru bowk kown,’ pakhai.9Kawrnga kowi kowh chowm miuüa low, dowk tasen büa diah,kawrnga kari te miuüa low, thuklama miuüa iawng te kawrnga kari büa diah.Siphaiuüa, kawngma kur mih Ethiawpiauüa hai Libiauüa, now leba dowk mih Lidiauüa low,pur prakowi thüa büa diah.10Tawngplawng kowchow panow nami ni dow mukuang siphaiuüa kowh CHAKRAMANG kowh ni chekhai;nami dow ransu-uüa luk kowi aia napaw lu klai kown mih ni chekhai.Nami ni khe dow saidawng mih du dowi mowr nakrawi sowi banlan kown,now vi sakkrai mih rim dowi mowr aia nakrawi sowi banlan kown.Tawngplawng kowchow panow tawngphak pra kowh pren hai Iufratis aw pang kowimukuang siphaiuüa kowh CHAKRAMANG nachang phuchua pawi kown.11Aw Aigupta chama, rü hanow Gilead süng kowi kowpün diah,now uang pawla arau iowm müa chakhang diah.Nachenganchepaw chakhang chap ahuma en tawng mih dow aiawnglowma taih chekhai,en naiung kown mih sakowmra uowi dowi.12Chenchapuüa mih en rukrai mih lawnguan ta khai,en kowh kar klow lusa tek khai bowt.En kowh akürma mih siphaiuüa dow nataiua iowm kown,now amatni dow tachawn hanow krawng kowi katsang natim kown,” pakhai.13Babulawn mang Nebuknezar nauang sen Aigupta pren kown mih satang CHAKRAMANG mih risi Jeremia kowi uang tek pe khai.14Aigupta kowi kowchia pe büa diah, Migdawl kowi kowphuang pe büa diah.Memfis hai Tapanhes kowi maiawng kowtek pe büah diah,“Kamrüt büah hanow atanma kowiowng büa diah.Tawngplawng kowchow panow saidawng hown enni napiak bowk kown chowbowt,” pape diah.15Tawngplawng kowchow enni kowh siphaiuüa tim khai?Amatni dow nowng iowng dowi bowt chekhai.Tawngplawng kowchow panow amatni kowi dow CHAKRAMANG nawtah mih chekhai.16Amatni dow aplan aplan tatheu khai;amatni dow en luk ang luk kowi tim büah khai.Amatni dow tatek mih, “Chu, rü hanowchang a-i nowng miuüa kowh saidawng rut hownia a-i cham powt lah,now a-i matia maru-uüa tut-e hai a-i matia pren kowi a-i plan lah,” pakhai.17Nami kung kowi dow maru-uüa natatek kown mih,“Aigupta pren mang Faraw dow aklow taih tün,aia dow khin iung uang ting mih iawmta khai,” napa kown.18Aming mukuang siphaiuüa kowh CHAKRAMANG pami mang tek mih,“Ang kowh ming hown ang takham khowk,Aigupta kowi nakingküaah kown mih maru nauang lowk ia kown.Aia dow hungh dawng kowi kowh Tabawr hungh iawng akroma chekhai,now sata ria kowi kowh Karmel hungh iawng aiukma chekhai.19Aw Aigupta maru-uüa, maru nakhümla enni hanow alakma kowi nacham pawla enni kown.Naiawng rakowi enni matia kowh uanh mih kamrüt büa diah.Memfis marow dow apiaknama nauowi kown.Nakowi dow miapaw nauowi kown nadowi.20Aigupta dow klangiungma mih chia chah iawng chekhai.Tawkche aia kowi namakah kownkow tawngphak hownia iawrh uang tarü lowk chekhai.21Aigupta kowi kowh ka maina mih siphaiuüa dow akauma mih chia chah iawng chekhai;amatni paw nataplan hanow alenma napowt kown.Tawngplawng kowchow panow amatni luk kowi dow piak khin uang ting khai bowt,amatni naka ripra kown mih khin uang towm khai bowt.22Amatni kowh ransu siphaiuüa uang haimang khe Aiguptauüa dow napowt kown;amatni dow rua sowr klow iawng asachow asachow napowt kown.Amatni kowi dow singh krip miuüa iawng marek dowkma ransu-uüa nauang senah kown.23Aigupta kowh kaurawng aiiuma chepaw ransu-uüa dow nauang chiata kown.Tawngplawng kowchow panow amatni kowh ransu-uüa dow plawng hawmh lak-e lang kawm chekhai.24Aiguptauüa kowi dow napeah rukrai kown,now amatni kowi dow tawngphak pra kowh maru-uüa rut kowi naap-ah kown,” pakhai.25Mukuang siphaiuüa kowh CHAKRAMANG Israeluüa kowh Thurai tek mih, “Thebes marow kowi kowh Amawn thurai kowi, Faraw hai Aigupta kowi kowh arup aren maten kowi neplawng nesak miuüa kowi ang naripah kown.26Amatni kowi nasaita kown nau mih Babulawn mang Nebuknezar hai aia kowh siphaiuüa rut kowi ang naap-ah kown. Nachenganchepaw akung kowi dow Aigupta pren kowi alai kowh iawng maru nauowi iawk kown. Ang CHAKRAMANG mami laiklow ang tek khowk,” pakhai.27Thurai tek mih, “Aw ang kowh nar Jakawb, hangkow kram diah,aw Israel, hangkow tanua diah.En cham takhangra pren alakma mih hownia ang nalawng en ngengche kown,now nami hownia en kowh chuprek chaprekuüa kowi ang nalawngah ngengche kown.Jakawb dow thaulangma nauowi iawk kown,aia kowi dow miapaw natüng pe kramra kown nadowi.28Aw ang kowh nar Jakawb, hangkow kram diah.Tawngplawng kowchow panow ang tawi uowila en reng chekhai.Ang cham uet en khe akeng chenchapuüa tut-e en cham uowi khai;naiawngün chenchapuüa maten kowi dow asaima ang napiakta kown.Tawkche en kowi dow asaima ang napiak en kown nadowi.En kowi dow tara nowm hown ang nahawi en kown,mapaw rip en dowi matchang ang nalawt en kown nadowi,” pakhai.The Seed Company