Jeremia2
1CHAKRAMANG dow Jerusalem marow kowi kowh maru-uüa tut-e mami laiklow nakowtek kownkow kowchin ang khai. Aia tek mih,“Enni klanguüa khe kaah sakowmma enni uowi mih dow ang sak kowi uowi reng chekhai.Nami khin khe dow amasi sar kowi ahua sakrauah iawng enni sakrau ang khai.Tawng luprak paw phaw dowi mih süngrüp süngkangma kowi ang tek iawng enni mang khai.3Israeluüa dow CHAKRAMANG vüi kowi kowh lang kloah mih chenchap chekhai,amatni dow aia rik kaah mih chauüa chekhai.Naiawng rakowi Israeluüa kowi pe ngarau miuüa maten dow ka aprek reng chekhai,now amatni luk kowi dow phih uang kla reng chekhai.Ang CHAKRAMANG mami laiklow ang tek khowk,” pakhai.4Aw Jakawb krungchak, Israel krungchak maten, enni mih CHAKRAMANG kowh laiklow sünta büa diah.5CHAKRAMANG tek mih,“Tawng atawi chow ang changta khai kowh ang hownia enni pipu-uüa tuk powt khai?Amatni dow asung uowi dowi mih arup aren kowi cham chupiia khai,now asung uowi dowi mih iawng phaw büah khai.6‘Aigupta pren hownia kowh uang lawtla anging mih CHAKRAMANG tawng kowi chow?Aia dow tui uowi dowi mih süng iawng, akang khawngma mih süng iawng,aiiuma mih süng iawng, katpaw maru mangah dowi iawng,maru uowiah dowi mih süngrüp süngkangma iawng uang pawla anging khai,’pami amatni dow katpaw tek dowi chekhai.7Enni kowi dow krawngsi uowi mih pren kowi ang uang pawla enni khai;nakowi ang uang pawla enni mih dow uih-ak enni paka chala pakowh chekhai,now aiung aiungma mih chakkham enni paka chala pakowh chekhai.Tawkche enni dow uang hanow nami ang kowh pren mih enni uang sürlawkta nak khai,now nami pren dow suiiai kaniaima mih uanh iawng enni changah khai.8‘CHAKRAMANG tawng kowi chow?’ pami uamowuüa dow katpaw tek dowi chekhai.Ari aiang tuk miuüa dow tuk mat ang dowi chekhai,aluchowuüa dow kingküa ang khai.Risiuüa dow asung uowi dowi mih Baal thurai ming hown tek lai khai,now asung uowi dowi mih arup aren kowi tawi chupiia büah khai.9Naiawng rakowi enni kowi dow ang natüng enni aprek kown,now enni kowh krungchakuüa kowi paw ang natüng pe aprek kown.10Satkup pra kowh Saipras süngdum sata paipra pown kowi kowh pren ün kowi kowmü diah,now satlawt pra kowh Kedar süng paw kowchin pe maru hanow klangiungma kowpe müah diah.Nakowi dow naiawng mih angak katpaw chang dowi chekhai.11Akeng chenchapuüa dow amatni owmah mih thurai kowi leah lütlüt dowi,nami thurai aching nadowi chepaw nuaah büah dowi chekhai.Tawkche ang maru-uüa dow Thurai kowi arup aren hown leah khai,now asung uowi dowi mih thuraiuüa kowi tawi chupiia büah khai.12Naiawng rakowi aw mukuang, takrow diah,now kram hown chür diah.13Tawngplawng kowchow panow ang maru-uüa dow changta lup ngak pre chap chekhai;amatni dow ang masing tuikuam kowi nuata ang büah khai.Nami takcha amatni matia vüi thawp tuikuam khai;tawkche nami tuikuam dow avitma rakowi tui tanung dowi chekhai,” pakhai.14CHAKRAMANG plan tek mih, “Israel mih nar chekhai bow?Uang dia hownia aia mih nar chekhai bow?Nadowi kowh chalow now tawngplawng kowchow aia kowi ransu-uüa tuk krawiah khai?15Israeluüa kowh ransu-uüa dow krangsila iawng tüng klow reng,now amatni kowi khi hanow ransu-uüa dow chang ran sulu reng chekhai.Amatni kowh pren dow ransu-uüa piakta pe nak khai,now amatni kowh marow ün paw towkta pe khai.Naiawng rakowi nakowi dow amiapaw uowi dowi bowt chekhai.16Aigupta pren kowi kowh Memfis marowchakuüa dow khaita enni lu khai,now Tapanhes marowchakuüa paw pe enni rukrai kownkow khaita enni lu khai.17Naiawng enni piak mih dow enni kowh angak rakowi chekhai.Tawngplawng kowchow panow tiama nowm kowi aia pawla enni mih khin khe aia kowi dow enni nuata khai.18Nail aw tui kowkham kown mih iawng Aigupta pren kowi enni kowkowi mih tawng chow mrawk?Iufratis aw tui kowkham kown mih iawng Asuria pren kowi enni kowkowi mih tawng chow mrawk?19Enni kowh angak dow nauang pawla enni ripra kown,enni mangah mih tiama ngak dow nape enni aprek kown.CHAKRAMANG Thurai kowi enni nuata mih khin khe mün khowt chow nanga kown mih sam tuak madiah,now aia kowi enni kram dowi mih khin khe mün khowt chow nanga kown mih sam tuak madiah.Ang lang kri lang kraing mih CHAKRAMANG Thurai mami laiklow ang tek khowk,” pakhai.20CHAKRAMANG tek mih, “Israel, en dow alai hownia ang tek iawng en chün dowi chekhai;nami khin khe en tek mih, ‘En kowh lup ang nachang kown nadowi bowt,’ pakhai.En dow chawkkrawma iawng alowngma mih hungh towng cham krawi chupiia arup aren khai,now aram chakma mih singh tut towng kowi paw en cham krawi chupiia arup aren khai.21En kowi dow lang ruiah mih aliu hownia kowh awr ru mih aiungma mih grep pawi iawng ang chowk en mih chowdiah;nami kowi tawng iawng chow angakma mih grep iua ruih iawng en tuk chowng khai?22Alawi takhuala mih chap hown en tasau chepaw en kowh angak dow ang pur kowi uowi reng,now dua hown plan plan en tasau chepaw en kowh angak dow ang pur kowi uowi reng chekhai.Ang CHAKRAMANG mami laiklow ang tek khowk.23En tek mih, ‘Ang dow sürlawkma nadowi,now Baal thurai kowi paw ang cham tawi chupiia dowi chekhai,’ pakhai.Tawkche Hinawm hungh kowi kowh en changah mih angak mü diah,nakowi kowh en changah mih suiiai kaniaima mih lup sam tuak madiah.En dow utla hown tapaw hau kownkowmapra paipra krawi iowm haplap mih utma iawng chekhai.24En dow süngrüp süngkangma kowi kowh uowi mih kaurawng kawrngaramchükma iawng chekhai,en dow krawi paw hau kownkow krawi hüp anam mih kawrngaramchükma iawng chekhai.Kawrngaramchükma kowi dow aia nau hau pawk mih khin khe amiapaw nowng hangah dowi chekhai,aia kowi kowh krawi cham mih kawrngaramchük ala hawmh dow nakawm kown nadowi.Tawngplawng kowchow panow hau pawk khin khe amatni dow aia kowi aiachow nakrum kown.25Aw Israel, arup aren kung kowi hang cham tawi krawi tham bowt.Naiawngün arup aren vüi kowi kowh en kowh sakkraira taingta bowt.Tawkche en tek mih, ‘Ang ia plan dowi tham;naiawngün thuraiuüa kowi ang sakrau khai,now amatni kowi ang natawi chupiia kown,’ pakhai.26“Ka khümta kuk mih khe kowh kuk mih rukrai iawngIsrael krungchakuüa paw ka rukrai khai.Now amatni, amatni kowh manguüa, maru iukuüa,uamowuüa hai risiuüa maten paw tawi ka rukrai khai.27Amatni dow singh kowi tek pe mih, ‘En dow apa chekhai,’ pakhai.Now hua kowi tek pe mih, ‘En dow au chekhai,’ pakhai.Amatni dow ang prakowi uang plan dowi chekhai,uang plan lak dow kung prakowi plan büah ngamlam chekhai.Tawkche amatni kla phih mih khin khe tek ang mih,‘Awr rü hanow uang lawng anging bowt,’ pakhai.28Aw Juda, en vüi kowi kowh en thawpah mih thuraiuüa tawng kowi chow?En kla phih mih khin khe amatni che nowng lawng en hanow pacham uang lawng en lah.Tawngplawng kowchow panow en kowh dow marow uowi mowr thuraiuüa paw uowi chekhai,” pakhai.29Amatni kowi CHAKRAMANG tek pe mih,“Tawngplawng kowchow enni tuk pe ang angak khai?Changta atawi ama mih dow enni chowtaih chekhai.30Enni kowh chauüa kowi ang ripah khowk chowdiah.Tawkche tawngpaw mrawkra uowi dowi chekhai.Enni kowh risiuüa kowi dow saidawng hown enni saiah khai;amatni kowi dow chak sakkrai mih krangsila iawng enni makah khai.31“Ang kowh maru-uüa low, ang laiklow sünta büa diah,Israeluüa tut-e süngrüp süngkangma iawng ang chowng khai bow?Ang mih pren iiu iawng angakma chekhai bow?Ang maru-uüa tek mih, ‘Thurai hownia anging ka lawtra khowk;anging lakke Thurai dowi bowt,’ pakhai.32Tawng iawng mih masiuüa paw tama üta ngawng awr mih uowi dowi chekhai,now cham mang kown mih masiuüa paw tama khupla tawnguat dowi chekhai.Tawkche ang kowh maru-uüa dow tamata ang mih akrama khowk.33“Aw Juda, en dow masiuüa lek kiakma chekhai,en kowi khi hanow angakma mih masiuüa pawnaiawng nachang kown mih natuk kown.34Ngaraima miuüa hai angak uowi dowi miuüa kowh vi dow en tawnguat kowi ang khi khai,amatni dow tawng iawng mih ngak paw chang en dowi chekhai.Nami kung kowi paw en tek mih, ‘Ang dow achinawmma;Thurai dow ang luk kowi kunmarau ang dowi bowt chekhai,’ pakhai.Tawkche en kowi dow ang nachet en tara hanow ang narip en kown.Tawngplawng kowchow panow en tek mih, ‘Ang chang ngak dowi,’ pakhai.36En dow mapra lai paipra lai cham krawi lü khowng khai.Nachenganchepaw Asuriauüa tut-e enni kowh tuak chur mih iawng Aiguptauüa tut-e paw enni kowh tuak chur kown.37Aiguptauüa hownia dow kala khowng dowi kowi tawmpa rukrai mumla tulu se en nauang plan kown.Tawngplawng kowchow panow en neplawng nesak mih maru-uüa kowi dow ang CHAKRAMANG nuata khai bowt.Amatni dow tawngpaw tawi nowng khowng en kown nadowi bowt,” pakhai.
The Seed Company