Jeremia11
1CHAKRAMANG kowh laiklow dow Jeremia tut-e uang ting khai. CHAKRAMANG tek pe mih, “Mami sangbowk laitawm laiklow süntala now Judauüa hai Jerusalem maru-uüa kowi kowtek pe diah. CHAKRAMANG Israeluüa kowh Thurai tek mih, ‘Ang kowh sangbowk laitawm chün dowi mih maru dow naka piati kown.4Tawngplawng kowchow panow enni pipu-uüa kowi dow Aigupta pren hownia, lawngha awp rah khuang hownia ang uang lawtla khai. Nakhowk khe amatni kowi ang peah ana mih, “Ang laiklow sünta büa diah, ang tek enni iawng chang büa diah. Nahanow enni dow ang kowh maru nachowng kown, now ang dow enni kowh Thurai nachowng kown,” pakhai.5Enni pipu-uüa kowi dow iawn tui, kuai tui hai tawngpaw akhawr uowi dowi mih pren kowi ang napawla kown mih ang takham khai. Nami ang takhamta iawng ang nachang kown,’ pakhai. Nami dow kawmat kowh enni uowiah mih pren chekhai,” pape khai. Nakhowk khe CHAKRAMANG kowi ang klangah mih, “Amen, CHAKRAMANG,” pakhai.6CHAKRAMANG dow Judauüa kowh marow hai Jerusalem marow kowi kowh tiama towng kowi maiawng krawi pe tek ang khai, “Ang kowh sangbowk laitawm sünta hanow chünah büa diah.7Aigupta pren hownia enni pipu-uüa kowi ang uang lawt mih khin hownia kawmat mowr pat nauowi kaneu kown mih plan plan ang tek pe khai. Amatni kowi ang tek pe mih, ‘Enni mih ang tek iawng uowi büa diah,’ pakhai.8Tawkche enni pipu-uüa dow ang laiklow sünta dowi, now chün paw chün dowi chekhai. Amatni dow ang kowh laiklow chün dowi kowi saktuak khawtma hown amatni nau iawng uowi büah khai. Naiawng rakowi sangbowk laitawm kowi arui uowi mih piati maten amatni luk kowi ang uang pawla pe khai,” pakhai.9Nami kung kowi CHAKRAMANG tek ang mih, “Juda maru-uüa hai Jerusalem maru-uüa dow nakingküa ang kown mih akrüp sang sangkrang khai.10Judauüa hai Israeluüa dow amatni pipu-uüa changah iawng mih angak cham tawi chang khai. Amatni dow ang laiklow nuata büah hanow akeng thurai kowi cham tawi chupiia khai. Now amatni pipu-uüa hown ang tatowah mih sangbowk laitawm dow piakta büah khai.11Naiawng rakowi ang CHAKRAMANG tek khowk, amatni luk kowi dow phih kraingma ang nauang pawla pe kown. Nami phih hownia dow amatni naia powt kown nadowi. Nami khin khe amatni dow ang tut-e kar se nauang lü khowng kown. Tawkche amatni kowh kar klow dow ang nahawt sünta pe kown nadowi.12Juda pren kowi kowh marow maten hai Jerusalem marowchakuüa luk kowi phih uang kla mih khin khe amatni dow amatni kowh thurai rup tut-e nacham kar büah kown, now naiawngün thurai rup pur kowi nam iungma mih maikhük nacham towk büah kown. Tawkche naiawngün thurai rup mih amatni kowi nanowng lawngah kown nadowi.13Judauüa kowh marow maten kowi dow thurai uowi bowk chekhai. Now Jerusalem marow kowi kowh tiama towng kowi paw amatni thawp pe phuchuara khai. Naiawngün phuchuara dow suiiai kaniaima mih Baal thurai vüi kowi nam iungma mih maikhük natowkla kownkow chekhai.14“Juda maru-uüa vüi kowi ang tut-e en mih hauang lü khowng diah, now kar paw hauang kar diah. Tawng iawng mih akhowng paw ang tut-e hauang awr lü diah. Tawngplawng kowchow panow en kowh laiklow mih ang nasünta en kown nadowi.15Ang lang sakrauah mih maru-uüa dow ang kowh chup kim kowi naiawng nauang chang kown mih alow uowi dowi. Tawngplawng kowchow panow amatni dow lainowmma chang angak khai. Ang vüi kowi chang tawncher phuchua chepaw ripra hownia amatni dow naka lawtra kown nadowi. Naiawng chang chepaw amatni dow phih hownia naplai kown nadowi.16“Ang CHAKRAMANG mih Juda kowi auih chakma hai klangiungma mih kanrawn singh pahai hawah reng chowdiah. Tawkche Juda kowi dow kaikreng maih hown ang natowkah kown. Nahanow amatni dow singh mia iawng nataklowk kown.17Aia kowi singh iawng chowkah mih mukuang siphaiuüa kowh CHAKRAMANG dow aia kowi napiakah kown mih ana lawtta khowk chekhai. Tawngplawng kowchow panow Judauüa hai Israeluüa dow chang lup ngak khai, now Baal thurai vüi kowi nam iungma mih maikhük cham towk büah khai. Naiawng hai amatni dow CHAKRAMANG kowi towkah kunmarau khai,” pakhai.18Anathawt marowchakuüa kingküa ang kown mih lawnguan ang tuk khai;nami laiklow dow CHAKRAMANG tek ang khai rakowi ang tuk khai.19Ang dow ruapur chah iawng adema chekhai;ang dow nangenah kownkow cham pawla mih ruapur chah iawng chekhai.Naiawng amatni kingküa ang mih dow ang tuk dowi chekhai.Ang lawnguan kowi amatni tek mih, “Chu, auih hailawm singh krip iawng aia kowi a-i kripah lah,Aia ming maru natukla dowi bowt kownkow aia kowi a-i saita bowt lah,” pabüah khai.20Jeremia chup Thurai mih, “Aw mukuang siphaiuüa kowh CHAKRAMANG,en dow chet tara nowm reng chekhai,now maru saktuak paw en chaing reng chekhai.Naiawng rakowi amatni luk kowi en sat klai mih pe khi ang diah.Tawngplawng kowchow panow ang dow en tut-e uang chawk lai khowk chekhai,” pakhai.21Naiawng rakowi Anathawt maru-uüa lawnguan kowi CHAKRAMANG tek mih, “Sai en kown nau miuüa tek mih, ‘CHAKRAMANG ming hown risi iawng hang krawi tek lai tham bowt. En che krawi tek rengreng now anging rut kowi en nakowng kown,’ pakhai.22Ang mukuang siphaiuüa kowh CHAKRAMANG tek khowk, amatni kowi dow ang naripah kown. Amatni kowh klanguüa hawmh dow tasenra kowi nakowng kown, now amatni kowh chama chapauüa dow khown hown nakowng kown.23Anathawt maru-uüa kowi napiakah kown mih akhin ang khowm bowkta khowk chekhai. Ang piakah mih khin khe amatni dow amiapaw naia plai kown nadowi,” pakhai.
The Seed Company