Isai5
1Ang sakrauah mih vüi ang natek meng lowk kown,aia kowh grep krum lawnguan kowi ang natek meng kown.Hungh luk kowi bawr uowima mih arah uowi lowk.Nami dow ang lang sakrauah mih grep krum chekhai.2Aia mih nami arah kowi dow pawkah hanow lauta pe hua bowk khai,nami kung kowi dow grep tut lang iung mih aia chowk pe khai.Nami grep krum kowi dow aia thawp pe kangchawngra kim lowk khai,now grep uih küa müa hua paw aia kamrütta pe kaneu khai.Nami kung kowi dow aiungma mih grep uih naka kownkow aia chawngah khai.Nachenganchepaw nami grep dow uang uih pache grep iua uih taih chekhai.3Aw Jerusalem marowchakuüa hai Juda kowi kowh maru-uüa,mia chow iung dowi mih kawmat sam tek ang büa madiah.Ang bow iung dowi, dowdow ang kowh grep krum bow iung dowi?4Ang kowh grep krum vüi ang changah mih klen kowi tawng iawng tak chow achang takla?Aiungma mih grep uih naka kownkow ang chawng khe tawng rakowi chow grep iua taih uih?5Nami grep krum kowi tawng chow ang nachangah kown mih kawmat ang natek enni kown:Nami grep krum kowi kowh khah mih ang nakhueta pe kown,nahanow nakowi kowh krawng bawn dow napiak kown towbowt.Nami grep krum kowi kowh tap mih ang nakhueta pe kown,nahanow nakowi kowh krawng bawn dow maru nathuata nak kown.6Nami grep krum dow apiaknama ang natowta hüah kown,now nakowi mih miapaw naplet grep ram kown nadowi bowt.Nakowi kowh krawng dow maru nalupah kown nadowi bowt,now nakowi mih ruih mung hai chuh mung towbowt naru kown.Now nakowi uang nauang dowi bowt kownkow uangnim kowi ang napeah ana kown.7Mukuang siphaiuüa kowh CHAKRAMANG kowh grep krum dow Israel krungchakuüa chekhai,now aia lang sakrauah mih grep tut dow Juda kowi kowh maru-uüa chekhai.Aia dow krawi cham tara nowm chowdiah.Tawkche nowng chang powng changra chowtaih khi khai.Aia dow krawi cham anowm chowdiah.Tawkche tuak kratma hown kowh nguk klow chowtaih ta khai.8Maru ngakuüa luk kowi piakra nauang ting kown mih dow kramra uowi lai kowbow!Amatni dow amatni riaret kowi kowh kim üa maten krawi ranta bowk khai.Naiawng amatni chang mih dow pren kowi amatni ngetchow towbowt nauowi kown pakowh chekhai,now maru hang pacham tawi ka kim chang üa changra lah pakowh chekhai.9Nachenganchepaw maiawng siphaiuüa kowh CHAKRAMANG takham mih ang ta,“Kim aiuk aiukma mih napiak bowk kown,klangiung klangiungma mih kim kowi miapaw nauowi kown nadowi.10Süngkawm tawng rawng grep krum hownia pirmi laipre setchow naka grep tui kown,now laitanga tawng rawng mih lup rawng hownia lairaiat setchow taih naka luprak kown,” pakhai.11Maru ngakuüa luk kowi piakra nauang ting kown mih dow kramra uowi lai kowbow!Nakham rak kownkow amatni dow mur rü reng chekhai,now pua dowi mowr uar dawng klowklowk kham grep tui büah reng chekhai.12Amatni chang pawi khe dow tingteng, taraw, sawkchow, prui hai grep tui ün uowi reng chekhai.Tawkche CHAKRAMANG kowh lup prakowi dow miapaw pela ching dowi chekhai.13Naiawng rakowi prengia uowi dowi kowh ang maru-uüa dow akeng pren kowi nacham takhang kown.Amatni kowh maru iukuüa dow hawm sakkrai hown nakowng kown,now iawngpa mih maru-uüa dow tui sakkrai hown kraw nakang kown.14Naiawng rakowi kowngra dow aia kowh kraw mih abüpma changah khai,now aia kowh nawr dow auarma haah khai.Ringkawra uowima miuüa hai iawngpa mih maru-uüa,taran dawma miuüa hai bawrima miuüa maten nakowi nadowh kown.15Maru iuk hai maru sowm maten kowi nakuakah sum kown,now bawrima miuüa dow naka rukrai kown.16Nachenganchepaw siphaiuüa kowh CHAKRAMANG dow anowmma mih lup nachang hanow aia kri kraing mih nauang tüng kown,now nachet tara nowm hanow aia chimsai mih nauang tüng kown.17Nakhowk khe dow ruapur hawmh mih apiaknama mih arah maten kowi nakrawi taw kown,now naiawngün apiaknama mih arah maten dow prenlang maru-uüa napowngta kown.18Maru ngakuüa luk kowi piakra nauang ting kown mih dow kramra uowi lai kowbow!Amatni dow krawi kuan maru reng chekhai,amatni kowh angak dow kung prakowi leng hown khuowkta hüah mih iawng chekhai.19Amatni dow Thurai kowi kharema hown tek mih,“Aia nau changah kown mih lup Thurai pacham lüa chang lah;anging khi kown nau khowk.Aia takhamta mih iawng Israeluüa kowh chimsaima mih Thurai pauang pe tachiah bowt lah;anging tuk kown nau khowk,” pakhai.20Maru ngakuüa luk kowi piakra nauang ting kown mih dow kramra uowi lai kowbow!Amatni dow aiung kowi changla angak, angak kowi changla aiung,anowi kowi changla aiiu, aiiu kowi changla anowi, adingma mih kowi akhakma,now akhakma mih kowi adingma pahai tek büah khai.21Maru ngakuüa luk kowi piakra nauang ting kown mih dow kramra uowi lai kowbow!Amatni dow kowmatia kowi chanlaima hai prengia chakma pahai tatuak khai.22Maru ngakuüa luk kowi piakra nauang ting kown mih dow kramra uowi lai kowbow!Amatni dow ahuma nowng kham grep tui hai arak iungma mih nowng kham rakowi chang bawri khai.23Amatni dow cha bümsua hanow aprek uowi mih maru kowi lawtta khai,now aprek uowi dowi mih maru kowi dow chet pe tara nowm dowi chekhai.24Naiawng rakowi amatni dow maih lün bia laplap mih kowi chida hai pram keu kam mih iawng naown büah kown.Amatni kowh prün dow natabur kown,now amatni kowh pau mum dow nakeu kown.Tawngplawng kowchow panow amatni dow siphaiuüa kowh CHAKRAMANG ari aiang nuata khai,now Israeluüa kowh chimsaima mih Thurai laiklow kowi sui büah khai.25Naiawng rakowi CHAKRAMANG dow aia maru-uüa luk kowi kunmarau lün pluplup khai,aia dow aia maru-uüa kowi rut hown phekah khai.Naiawng rakowi hungma mawngma dow chür khai,now kowng miuüa uak dow mawngchawng iawng tiama kowi takuakla pan khai.Naiawng khowt phaw khowk chepaw aia kowh kunmaraura dow rim dowi tak;aia dow aia maru-uüa kowi ripah reng tak chekhai.26Aia dow alakma kowi kowh uowi mih chenchapuüa kowi amat müa tamkhuown naruang pe kown,now prenchur nammowt kowi kowh maru-uüa kowi nahawah kown.Nami khi hai ta hanow prenchur nammowt hownia kowh akeng chenchapuüa mih iowm se nauang kown.27Amatni dow miapaw nabowm kown nadowi,tatheu paw natatheu kown nadowi.Amatni dow miapaw namüi rau kown nadowi,kekawm paw natalat kown nadowi,now phanaikhawk leng paw natalat kown nadowi.28Amatni kowh leba sek dow achukma chekhai,amatni kowh leba dow tavüi hüah chekhai.Amatni kowh kawrnga keh dow huaran iawng akhawtma chekhai,now amatni kowh kawrnga kari khawk dow khownawng li iawng alenma chekhai.29Amatni kowh hek klow dow krangsi hek klow iawng;amatni dow krangsila powrchow iawng nahek kown,now namak chak kown khe kowh iawng nangir sulu kown.Now nami chak dow napawla büah kown;nami chak kowi dow amatni rut hownia miapaw nowng lawng kown nadowi.30Nami ni khe sata tui tün nowk rumrum mih iawng CHAKRAMANG kowh maru-uüa luk kowi nahek pe büah kown.Nakhowk khe Israel pren prakowi tang mü hanow aiiu hai ngarera kangowh taih nakhi kown;anowi khowm padow uangnim hown tatung hanow aiiuma naphaw kown.
The Seed Company