Isai42
1CHAKRAMANG tek mih, “Sünta, ang peah kür mih ang kowh nar,ang kloah mih maru, aia luk kowi dow ang sak-ih chekhai.Aia luk kowi dow ang kowh lümla ang nahüng pe kown,aia dow chenchapuüa kowi nauang chet pe tara nowm kown.2Aia dow nahek kown nadowi, now atünma paw natek lai kown nadowi.Aia dow tiama kowi aia kowh klow nakrawi tüng kown nadowi.3Aia dow taphuk nak mih uaklung kawng naklowkta kown nadowi,now nowi chele mih maibu aia namitta kown nadowi.Aia dow anowmma nauang chet tara kown.4Lusa kowi tara nowm uowi dowi mowr aia dow sakowmra hai sakkraingra namata kown nadowi.Alakma kowi kowh maru-uüa mih aia kowh ana pek kowi nachawng kown,” pakhai.5CHAKRAMANG Thurai mih thawp mukuang hanow krawi khupah khai,aia dow lusa hai alak kowi kowh uowi mih maten kowi krawi towah khai.Aia dow nakowi kowh maru-uüa kowi peah kawli khai,now nakowi kowh krawi mang miuüa kowi peah singra khai.6Aia tek mih, “Ang CHAKRAMANG,ang kowh tachi tanawmra natüngla kownkow ang haw en khai.En kowh rut mih ang nadowkta en hüah kown,ang natowkala en reng kown.En hownia maru maten hown ang nathawp sangbowk laitawm kown,now en hownia chenchapuüa maten kowi ang napeah anowi kown.7Mikdu miuüa kowi en nathowi pe mik kown;kla thawng miuüa kowi ang nalawtta kown,now kuam aiiuma mih kowi kowh towah miuüa kowi ang nauang lawtla kown.8“Ang dow CHAKRAMANG, ang ming dow mami chekhai.Arup aren hai akeng miuüa kowi ang nau kaah kown mih ringkawra ang nape kaah kown nadowi.9Sünta, naphaw kown pahai achük alai kowh ang tekah mih dow phaw khowk chekhai,now kawmat dow asar naphaw kown mih laiklow ang naphuang kown.Naiawngün phaw dowi rawn enni tut-e ang rik tek enni khowk chekhai,” pakhai.10Aw sata kowi kowh mang mih hai asak uowi mih chap maten,now pren lakma mih hai nakowi kowh uowi mih maru-uüa maten,enni bowkbowk CHAKRAMANG vüi tek meng sar büa lowk diah,prenchur nammowt hownia aia kiow meng tek büa diah.11Süngrüp süngkangma kowi kowh marow mih atünma pacham kiow Thurai lah,Kedaruüa kowh kua ün paw pacham kiow Thurai lah.Sela marow kowi kowh uowi miuüa apiawma pacham tek meng lah,hungh chut hownia apiawma pacham how lah.12Amatni mih CHAKRAMANG kowi pacham kiow lah,pren lakma kowi ün aia kowi pacham kiowah lah.13Akürma mih maru iawng CHAKRAMANG mih nauang lawt kown,aia dow tasen miuüa iawng aia kowh süngürra kowi nakrowkah kown.Aia dow hek se nadowk tasen kown mih klow natüng kown,now ransu-uüa kowi aia mih nanowngta kown.14CHAKRAMANG tek mih, “Ang CHAKRAMANG mih akhin krama ririmma ang uowi khai;kunma klamma uowi hanow ang town sak khai.Nachenganchepaw kawmat dow penchow kimuowi mu rau mih masiuüa iawng ang hek khai bowt,now ang hü sak surlur khai bowt.15Hungma mawngma dow sing kau uowi dowi iawng ang nachangah kown,nakowi kowh singh kau maten dow ang nape keuah kown.Aw maten dow ang nachangah süngdum kown,now kanh maten dow ang nape kangta bowk kown.16“Mikdu miuüa kowi dow amatni tukah dowi mih tiama iawng ang nacham pawla kown,amatni kowi dow tukah dowi mih tiama kowi ang nape mangah kown.Amatni dowi rawn aiiu kowi ang nachangah anowi kown,now anaima nadowi mih arah kowi dow anaima ang nachangah kown.Naiawngün dow bowkbowk ang nachang ngengche kown.Israel kowi ang napowtta kown nadowi.17Tawkche thawpah mih arup aren kowi neplawng nesak miuüa kowi dow pe chamang ang napeah rukrai kown;arup aren kowi, ‘Enni dow anging kowh thurai chekhai,’ pahai tek miuüa kowi dow pe chamang ang napeah rukrai kown,” pakhai.18CHAKRAMANG plan tek mih, “Param pangma miuüa low, sünta büa diah,mik duma miuüa low, tang mü büa diah.19Ang kowh maru, ang kowh nar klen kowi mikdu mih mia chow uowi?Ang chinah mih ria mang miuüa klen kowi param pang mih mia chow?Ang lang ruiah miuüa iawng mikdu mih mia chow?CHAKRAMANG kowh nar iawng mikdu mih mia chow?20En kowh mik aküma chepaw tawngpaw en khi dowi chekhai;en kowh param auowma chepaw tawngpaw en ta dowi chekhai,” pakhai.21CHAKRAMANG dow nalawng kown mih kowi süngürma chekhai.Naiawng rakowi aia dow aia kowh ari aiang kowi kri kraingma hai rowsira uowima changah khai.22Nachenganchepaw maiawngün maru-uüa kowh dow uowi mih srui khünta pe now pawla pe khai,amatni bowkbowk kowi dow kuam lak kowi cham kuakah khai,now thawngrum kowi cham petah khai.Amatni dow cham rupah mih uanh iawng phaw khai,amatni kowi nalawngah kown mih miapaw uowi dowi.Amatni dow cham khünah mih uanh iawng chowng khai;“Kowbüah kowi uang planta diah,” pami miapaw tek dowi chekhai.23Enni pungmadawng kowi mia chow ang laiklow nasünta kown?Kawmat hownia ang laiklow abüpma nasünta kown mih mia chow?24Jakawb kowi damrauüa rut kowi ap-ah mih mia chow?Nami dow CHAKRAMANG chekhai.Aia kowi kingküala mih angak a-i chang reng chekhai.A-i dow aia tiama kowi mang kown nau dowi,aia kowh ari aiang a-i chün dowi chekhai.25Naiawng rakowi aia kowh kunmaraura hai kramra uowi mih tasen aia uang hüng pe khai,Israel luk kowi lün pluplup mih maih iawng aia uang hüng pe khai.Nahanow nami maih dow Israel tapat lut krawi lün khai.Nachenganchepaw aia dow tuk kown nau dowi chekhai.Maih mih aia buk kowi kak khai bowt.Nachenganchepaw nami kowi aia mih pe ching dowi chekhai.
The Seed Company