Isai36
1Juda pren kowi Hezekia chowm mang mih laitali ning khe Asuria pren mang Senakerib mih Juda pren kowi kowh tap uowi mih marow maten uang senah hanow uang powngta bowk khai.2Nami kung kowi dow Asuria mang mih aia kowh siphai aluchow Rabsake kowi siphai akawmma hown Lakhis marow hownia Jerusalem marow kowi Hezekia tut-e kowchinah khai. Now Rabsake mih siphaiuüa hown kowtarü hanow dawnguan chukra dowm pra kowh tiama ria kowi alowngma mih kanh hown taplawn mih tui khawng re-e kowiowng khai.3Nakhowk khe mang kim mingkhet mih Hilkia kowh chapa Eliakim, cha rui mih Sebna hai mang kowh chownglawng lawnguan rui mih Asaf kowh chapa Joa büah uang lawt hanow Rabsake tut-e uang khai.4Nakhowk khe amatni kowi Rabsake tek pe mih, “Hezekia kowi kowtek pe büah dit, Asuria pren mangkri tek mih, ‘Mia luk kowi chow en neplawng nesak?5En kowh dow laiklow krowngchow taih; en kowh dow tawngpaw kür uowi dowi chekhai. Sam tek madiah, mia luk kowi chow en sakowmla kowh en uang kingküa ang?6En neplawng nesak mih dow Aigupta pren luk kowi chekhai. Tawkche Aigupta dow aphukma mih uaklung kawng iawng chekhai. Nami uaklung kawng kowi changla raitua mih maru dow chukta rut reng. Tawngplawng kowchow panow Aigupta pren mang Faraw kowi dow mapaw kaah sakowm dowi chekhai,’ pape diah.7Nakhowk khe, ‘Anging neplawng nesak mih dow CHAKRAMANG anging kowh Thurai luk kowi chekhai,’ padow enni natek ang chepaw naia kown. Tawkche Thurai kowi chowbowt nadowi bow mang Hezekia peah rukrai mih? Arah kroma mih kowi kowh chupiiara hai phuchuara ün Hezekia piakta mih dow nami Thurai kowh chowbowt nadowi bow? Judauüa hai Jerusalem marowchakuüa kowi dow Jerusalem marow kowi kowh phuchuara kowi chowtaih nachupiia kown mih Hezekia tek pe khowk nadowi bow?8“Enni kowh mang kowi kowtek pe diah. Ang kowh chakramang Asuria pren mang mih enni vüi maiawng nachang enni kown nauta. Tuk chowm kawrnga mih maru iun che enni nowng tüng ang 2,000 ia hanow ang nape enni kawrnga 2,000 pum kown.9Nakhowt chow khowm uowi dowi tak hanow Aigupta pren kowi kowh kawrnga kari hai kawrnga kowi kowh chowm miuüa kowi enni neplawng nesak chepaw Asuria pren mang kowh lang sowm mih maru kowi khowm enni nanowng kown nadowi tak.10CHAKRAMANG tek ang dowi kowi mami pren nauang piak kownkow ang uang sen mih chekhai bow? Mami pren uang senah hanow napiakta kown mih CHAKRAMANG ngengche tek ang khowk,” pape diah.11Nakhowk khe tasen kowi kowh aluchow kowi Eliakim, Sebna hai Joah tek pe mih, “Chakramang, sakrauma hown Aramaik lai hown klang anging diah. Nami lai anging tukta chow. Hebrai lai hown hauang klang anging diah. Tawngplawng kowchow panow tap luk kowi kowh maru-uüa natawi tukta bowk kown chekhai,” pakhai.12Nachenganchepaw nami aluchow tek pe kowbüah mih, “Naiawngün laiklow nauang tek kownkow ang kowh chakramang uang chin ang mih enni kowh mang hai enni tut-e krowngchow nadowi. Naiawngün laiklow dow tap luk kowi kowh maru-uüa vüi paw na chekhai. Tawngplawng kowchow panow mami marow dow anging nauang rumta kown. Nakhowk khe enni kawm iawng amatni paw natawi kawm kown. Amatni paw chakkham sakkrai lai rakowi kowmatia kowh kih nacha kown, now kowmatia kowh iantui nakham kown,” pape khai.13Nami kung kowi dow tasen kowi kowh aluchow mih iowng hanow tap luk kowi kowh maru-uüa ta bowk iawng Hebrai lai hown atün atünma tek mih, “Enni mih Asuria pren kowi kowh mangkri laiklow sünta büa diah,14‘Mang Hezekia nowng kuan enni dowi iawng uowiah büa diah. Aia dow ang kowh kür hownia nanowng lawng enni kown nadowi.15CHAKRAMANG kowi enni naowmla kownkow aia dow maiawng natek enni chepaw naia kown, “CHAKRAMANG nalawng a-i ngengche kown. Mami marow dow Asuria pren mang rut kowi naap-ah kown nadowi,” napah kown. Tawkche nami laiklow enni naowm kown nadowi,’ pakhai,” pape khai.16Tasen kowi kowh aluchow plan tek mih, “Asuria pren mang tek mih, ‘Ang hown tatow sangbowk laitawm büa diah, now marow hownia uang lawt hanow ang tut-e uang tawi uowi büa diah. Nahanow enni chowlowkkow kowh grep ruih hownia hai uidut singh hownia enni naka cha uih kown, now kowmatia tuikuam hownia kowh tui enni naka kham kown.17Nami kung kowi dow ang nauangah hanow enni matia kowh pren iawng mih alowk mih pren kowi ang nacham pawla enni kown. Nami pren dow luprak hai grep tui sar uowi rah pren chekhai. Nami dow kawm hai grep krum atekma mih pren chekhai.18“‘CHAKRAMANG natowkala enni kown taih pahai Hezekia tek enni mih hangkow sünta büa diah. Asuria mang rut hownia akeng chenchapuüa kowi amatni kowh thuraiuüa nowng towkala pe pren tak bow?19Tawng kowi chow Hamat marow hai Arpad marowchakuüa kowh thuraiuüa? Tawng kowi chow Sefarvaim marow kowh thuraiuüa? Naiawngün thuraiuüa mih ang kowh kür hownia Samari marow kowi nowng lawng tak bow?20Naiawngün pren kowi kowh thuraiuüa maten dow ang kowh kür hownia amatni kowh pren kowi miapaw nowng lawng dowi chekhai. Nami kowi tawng iawng chow CHAKRAMANG mih Jerusalem marow kowi ang kowh kür hownia nowng lawng kown?’ pakhai,” pape khai.21Nachenganchepaw maru kawmuüa dow tawng iawng paw klangah dowi kowi rarimma uowi khai. Tawngplawng kowchow panow naklangah dowi kownkow amatni kowi mang Hezekia rik tek pe khowk chekhai.22Nami kung kowi dow mang kim kowi kowh kruitown mih Hilkia chapa Eliakim, mang kowh cha rui mih Sebna hai satang phowng mih Asaf chapa Joa büah mih sak piak rakowi amatni kowh tawnguat thekah büah khai. Nami kung kowi dow amatni mih mang kim kowi uang büah khai, now Asuria pren hownia kowh tasen kowi kowh aluchow krawi tek pe mih maten Hezekia kowi uang tek pe büah khai.
The Seed Company