Isai35
1Süngrüp süngkangma hai akang khawngma mih süng dow naawmrawm kown,süngrüp süngkangma dow napiaw hanow paingbawng pau iawng nathar kown.2Nakowi dow ahuma pau napau kown, now apiawma mih meng nauowi kown;aia kowi dow Lebanawn kowi kowh kraingra napeah kown,now Karmel hai Sarawn kowi kowh klangiungra napeah kown.Maru kawmuüa mih CHAKRAMANG kowh kraingra nakhi kown,amatni dow a-i kowh Thurai klangiungra nakhi kown.3Naiawng rakowi rut kür uowi dowi miuüa kowi peah kür diah,now kungh chür klukluk miuüa kowi akhawtma pe iowngah diah.4Sak kowi kramra atekma miuüa kowi natek pe kown mih,“Hangkow kram, akürma uowi büa diah.Enni kowh Thurai nauang kown chowbowt,aia mih nauang paw lu klai hai nauang pe ripra kownkow nauang kown.Aia mih uangah hanow nauang lawng enni kown,” pape diah.5Nakhowk khe dow mikdu miuüa kowh mik nathowi bowt kown,now param pang miuüa kowh param napang kown nadowi bowt.6Nakhowk khe dow klowng khawn tabai miuüa naki iawng nachet kown,lai a-ma miuüa paw apiawma hown nahow bowt kown.Süngrüp süngkangma kowi krawng hownia tui nauang lawt kown,now süngrüp süngkangma hownia tui nahawr kown.7Kangkhawngma mih süng naphaw kanh kown,tui sakkrai mih krawng kowi tui nalawt iualua kown,now brenkhui hawmh mawk rah kangkhawngma mih dow sikklawpma naphaw kown.8Nakowi dow tiama chungh naphaw lowk kown,nami tiama kowi dow tiama chimsai napape kown.Nami tiama iawng dow sürlawkma miuüa namang kown nadowi.Nami dow chün Thurai lai mih maru-uüa kowh tiama chowtaih nachowng kown.Nami tiama iawng dow sangching uowi dowi miuüa namang kown nadowi.9Nakowi dow krangsi nauowi kown nadowi,kramra uowima mih kaurawng uaramchak nami tiama kowi namang kown nadowi.Nami tiama kowi namang kown mih dow ka lawngra miuüa chowtaih.10CHAKRAMANG lawngah mih maru-uüa dow nauang plan hanow tekla meng se Zaiawn kowi nauang kup kown.Amatni kowh achowngma mih piawpara dow amatni kowh mang lukruk nachowng kown.Amatni dow lainowmma napiaw kown,now akrat pusara hai tuak kratra dow naprowng bowt kown.
The Seed Company