Isai21
1Mami dow Babulawn lawnguan kowi kowh CHAKRAMANG laiklow chekhai.Negeb süng kowi khownawng li uang iawng phih uang tarü lowk;nami phih dow kramra uowima mih süngrüp süngkangma pren hownia uang tarü mih chekhai.2Kramra uowima mih mukmang ang khi lowk.Nami mukmang kowi ang khi mih krawi kuan mih maru dow krawi kuan khai,now krawi piak mih maru dow krawi piak maru reng chekhai.CHAKRAMANG tek mih, “Aw Elam hai Media,Babulawn kowi kowrumah hanow kowsenah dit.Tawngplawng kowchow panow maru kowi aia krawi towk kawm mih maten ang naprowngta pe bowt kown,” pakhai.3Naiawng rakowi lainowmma ang mu rau khai;masiuüa penchow kimuowi mu rau iawng ang mu rau khai.Ang mu rau lai bowt kowh tawngpaw ang ta dowi bowt,now ang kram lai bowt kowh ang khi mik dowi bowt chekhai.4Ang kowh sak mih thü dukluk towbowt;kram lai bowt kowh ang chür klukluk towbowt chekhai.Sat kowi khe kowh khin kowi lainowmma ang prüa chowdiah.Tawkche nami akhin dow ang vüi uang chowng kramra khai bowt.5Mukmang kowi ang khi mih Babulawn pren kowi kowh maru iukuüa chang pawi khai;amatni dow nacha chakkham kownkow be pe chowm rah büah hanow cha chakkham khai.Nakhowk khe linlanma ana pek uang ting mih, “Nadowk tasen kownkow en kowh kawngma kamrütta kaneu!” pakhai.6Now CHAKRAMANG tek ang mih, “Kowkowiah hanow kowtow kangchawng mih lowk ia diah.Aia khi-ah mih srui pauang phuang lah.7Achum achumchow kawrnga luk kowi maru chowm mih khi khe aia pacham müah kaneuma lah;kawrngaramchük hown ut luk kowi maru chowm mih khi khe paw aia pacham müah kaneuma lah,” pakhai.8Nakhowk khe nami kangchawng mih maru atünma tek mih, “Aw ang kowh chakramang,ni towng iak towng kangchawngra kim alowngma mih kowi ang uowi khai.9Sünta, kawmat mih achum achumchow kawrnga luk kowi chowm hanow maru uang tarü khowk,” pakhai.Nami kung kowi dow aia tek mih, “Babulawn piak mih chowbowt,Babulawn piak mih chowbowt.Aia kowh thurai rup maten adi asekma krawng kowi takuakla kun towbowt,” napa kown.10Ang maru Israeluüa low, pakat khe dow püm thua iawng Babulawnuüa thua enni khai.Nachenganchepaw kawmat dow mukuang siphaiuüa kowh CHAKRAMANG,Israeluüa kowh Thurai hownia ang taah mih satang iung ang uang phowng enni khowk.11Mami dow Edawm pren lawnguan kowi kowh CHAKRAMANG laiklow chekhai.Seir hungh hownia mia iawng mih chünchü haw ang hanow tek ang mih,“Kangchawng mih ow, tawng khe chow uar nathowi kown?Kangchawng mih ow, tawng khe chow uar nathowi kown?” pakhai.12Now kangchawng mih klangah mih,“Uar nathowi kown chowbowt.Tawkchedow alenma uar naiiu iawk kown.En che lünta kown nau iawk hanowuang plan uangah now uang lüntaah iawk towbowt,” pakhai.13Mami dow Arab pren lawnguan kowi kowh CHAKRAMANG laiklow chekhai.Aw Arab pren kowi kowh kun chang miuüa,süngrüp süngkangma kowi khup tangbung mih Dedanuüa low,14tui sakkrai miuüa vüi uang pawla pe tui büa diah.Tema prenchakuüa low,cham powt miuüa vüi uang pawla pe chakkham büa diah.15Tawngplawng kowchow panow amatni dow parta hüah mih saidawng hownia cham powt mih chekhai,amatni dow vüita hüah mih leba hai kramra uowima mih tasenra hownia cham powt mih chekhai.16CHAKRAMANG tek ang mih, “Paning chur hown krowksang Kedar pren kowi kowh kraingra maten nachur kown.17Kedar kowi kowh sakkraingma panow leba ap akiakma mih siphaiuüa chowtaih nata sing sangrumchow kown. Mami laiklow mih Israeluüa kowh CHAKRAMANG Thurai tek khowk,” pakhai.
The Seed Company