Isai19
1Mami dow Aigupta pren kowi CHAKRAMANG kingküaah mih laiklow chekhai.Sünta, alenma iow lawmlawm mih uangnim hown Aigupta pren kowi CHAKRAMANG uang khowk;aia pur kowi dow Aigupta pren kowi kowh arup arenuüa nachür kown,now Aiguptauüa kowh sakkraingra mih nauowi kown nadowi bowt.2Aigupta prenchakuüa kowi amatni lala ang natowkah ran kown;nahanow taichow nauchow lala nataran kown,now kimping namkhet lala nataran büah kown.Amatni dow mami marow hown alowk mih marow nataran kown,now mami pren hown alowk mih pren nataran kown.3Aiguptauüa dow namata sakkraingra kown,now amatni kowh sangkrangra dow ang napiakta pe kown.Amatni dow arup aren hai kowng miuüa lümla tut-e,süngnam hown taklawp taiua miuüa tut-e,now lümla ngak hown taklawp taiua miuüa tut-e nacham paw prengia kown.4Amatni kowi dow angakma mih kim iah tut-e ang nacham ap-ah kown;amatni kowi dow kramra uowima mih mang nakruitownah kown.Ang mukuang siphaiuüa kowh CHAKRAMANG mami laiklow ang tek khowk.5Nail aw tui dow naiut rürü kown,now nami aw tui dow nakang krow kown.6Awchawng awlang dow asu namma naphaw kown.Aigupta pren kowi kowh aw maten dow nasowm hanow nakang bowk kown;tui kowi kowh sing mih pramna maten dow nakeu bowk kown.7Nail aw pang kowi kowh singh kau maten dow nakeu bowk kown.Aw pang kowi kowh sawtah mih kan nuk hap liu maten paw nakeu hanow narüp bowk kown.Pram pawi maten dow rüp kowh li hown nacham rown bowk kown;tawngpaw nata lat kown nadowi bowt.8Dam pawk miuüa hai Nail aw kowi kowh kuai kuak miuüa nanguk nakar kown,now lawk pat miuüa paw lainowmma saktuak nachur kown.9Asinchow mih la thawp miuüa dow saktuak natanua bowt kown,now apachow mih uan kawng miuüa paw saktuak natanua bowt kown.10Uan kawng sarauüa dow sak napiak bowk kown,now sukkri kowi miuüa maten dow nasak nga bowk kown.11Zoan marow kowi kowh maru iukuüa dow bualama chekhai;Faraw kowh prengia pek miuüa kowh prengia lai dow tawngpaw asung nauowi kown nadowi.Amatni dow, “Ang dow chanlaima mih maru-uüa pungmadawng kowi kowh maru lowk ia,achük alai kowh mang krungchak ang na,” pami tawng iawng chow Faraw kowi tuk tek pe büah khai?12Aigupta pren mang ow, en kowh chanlaima mih maru-uüa tawng kowi chow?Aigupta pren luk kowi CHAKRAMANG nachangah kownkow khowm bowkta mih pacham tuk büah lah,now en kowi paw pacham tekla en büah lah.13Zoan marow kowi kowh maru iukuüa dow bualama chekhai,now Memfis marow kowi kowh aluchowuüa dow kowmatia kowi takuan büah khai.Aigupta pren kruitown miuüa dow amatni kowh maru-uüa kowi tiama tawi kowi kruila khai.14Amatni kowi dow tawng chow chang e iung kown mih tuk dowi iawng CHAKRAMANG changta khai.Naiawng rakowi Aigupta maru-uüa dow apuama mih maru kowmatia hük kowi taiua lutlut mih iawng phaw bowk khai.15Aiguptauüa dow kureng mih hai ngarai mih lah,asung uowima mih maru hai asung uowi dowi mih maru lah miapaw nanowng takhowng büah kown nadowi.16Nami ni khe dow Aiguptauüa mih masiuüa hawmh iawng naown kown.Amatni kowi mukuang siphaiuüa kowh CHAKRAMANG ripah mih khita hanow amatni dow kram kowh nachür kown.17Rük Judauüa ming krowngchow mih maru kowi khowm padow Aiguptauüa lainowmma nakramah kown.Tawngplawng kowchow panow amatni kowi nakingküaah kownkow mukuang siphaiuüa kowh CHAKRAMANG khowm bowkta mih chekhai.18Nami ni khe dow Aigupta pren kowi kowh marow tanga klüng kowi uowi miuüa mih Israeluüa kowh Hebrai lai natek kown, now naiawngün marow pungmadawng kowi marow lowk mih kowi dow piakra marow pahai narük pe ming kown. Amatni dow mukuang siphaiuüa kowh CHAKRAMANG tut-e kaah sakowmma nauowi kown mih laikham natakham büah kown.19Nami ni khe dow Aigupta pren lak kowi mih CHAKRAMANG vüi phuchuara nauowi lowk kown, now pren sünghi kowi CHAKRAMANG vüi nachowk pe hua lowk kown.20Naiawngün dow Aigupta pren kowi mukuang siphaiuüa kowh CHAKRAMANG kowi chupiia mih saksi mat müa naown kown. Amatni kowi maru changah anowng apowng rakowi CHAKRAMANG tut-e awr nguk awr kar büah khe amatni tut-e mih nauang towkala kown mih hai nauang lawngah kown mih maru kowi CHAKRAMANG nauang chin pe kown, now nami maru dow amatni kowi nauang lawngah kown.21Naiawng hown CHAKRAMANG mih Aiguptauüa tut-e aiamat lawnguan kowi nape tukah kown. Nami ni khe dow amatni mih CHAKRAMANG kowi natuk hanow nachupiiaah bowt kown. Amatni dow tawncher hai kawmdi uanap nauang pawla hanow CHAKRAMANG kowi nachupiiaah kown, now CHAKRAMANG tut-e natakham hanow takhamta iawng nachang büah kown.22CHAKRAMANG mih Aigupta pren kowi naripah kown; aia dow amatni kowi napeah arau kown, now iung paw naiungah iawk kown. Amatni mih CHAKRAMANG prakowi nauang plan bowt kown. Amatni awr lü mih kowi CHAKRAMANG nauang klangah kown, now nauang iungah kown.23Nami ni khe dow Aigupta pren hownia Asuria pren mowr tiama naphaw lowk kown. Asuriauüa mih Aigupta pren kowi nakowkowi kown, now Aiguptauüa paw Asuria pren kowi nakowkowi kown. Aiguptauüa hai Asuriauüa mih katsang nachupiia Thurai büah bowt kown.24Nami ni khe dow Aiguptauüa, Asuriauüa hai Israeluüa mih pathumchow maru nachowng kown, now amatni dow lusa kowi nachowng prasira büah kown.25Mukuang siphaiuüa kowh CHAKRAMANG mih amatni kowi maiawng napeah prasi kown, “Ang kowh maru Aiguptauüa, ang rut hown ang thawpah mih Asuriauüa hai ang matia vüi ang lang kloah mih Israeluüa mih pacham ka prasi lah,” napa kown.
The Seed Company