Hosea1
1Juda pren kowi Uzia, Jotham, Ahaz hai Hezekia büah chowm mang mih khin khe Israel pren kowi dow Joas chapa Jeroboam chowm mang khai. Nami khin khe Beri chapa Hosea tut-e CHAKRAMANG kowh laiklow mih uang towm khai.2Hosea tut-e CHAKRAMANG rik tek laiklow mih khin khe CHAKRAMANG tek pe mih, “Kowkowiah now iang chang dawma mih masiuüa kowi en vüi kowlo diah; en masi dow kaah sakowmma nauowi kown nadowi, now en kowh chauüa paw amatni kowh u iawng naown kown. Tawngplawng kowchow panow nami powm iawng ang maru-uüa mih powtta ang khai, now kaah sakowmma uowi ang dowi chekhai,” pape khai.3Naiawng rakowi Hosea dow kowkowiah now Diblaim chama Gomer kowi kowlo khai. Akung kowi amasi dow kum nau hanow pen chapa lowk ia khai.4Nakhowk khe CHAKRAMANG tek pe Hosea mih, “Jezrel marow kowi kowh maru akawmma kowi Jehu saita khai. Naiawng rakowi en kowh chapa ming mih Jezrel rük pe diah. Jehu kowh krungchakuüa kowi dow alenma ang naripah kown, now Israel pren dow ang nachurta pe kown.5Nami ni khe dow Jezrel lawngrawi kowi Israeluüa kowh leba ang naklowkta pe kown,” pape khai.6Nami kung kowi Gomer dow kutplan kum nau hanow pen chama lowk ia khai. Nakhowk khe CHAKRAMANG tek pe Hosea mih, “Israeluüa kowi ang nasakrauah kown nadowi bowt. Naiawng rakowi aming dow Lo-Ruhama pahai rük pe diah. (Lo-Ruhama pami dow ‘Sakrau dowi’ pami chekhai). Amatni kowi dow mapaw ang nalawtah kown nadowi bowt.7Nachenganchepaw Judauüa kowi dow ang nasakrauah kown, now amatni kowi dow ang nalawngah kown. Nami lawngra dow Leba, saidawng, tasen, kawrnga hai kawrnga kowi kowh chowm miuüa hown nadowi. Ang CHAKRAMANG amatni kowh Thurai ngengche nalawngah kown,” pape khai.8Lo-Ruhama iawn kham towng hanow Gomer dow plan pen chapa lowk ia khai iawk.9Nakhowk khe CHAKRAMANG tek pe Hosea mih, “Enni dow ang kowh maru nadowi, now ang paw enni kowh Thurai nadowi. Naiawng rakowi aming dow Lo-Ammi pahai rük pe diah. (Lo-Ammi pami dow ‘Ang kowh maru nadowi’ pami chekhai).10Nachenganchepaw pakat dow Israeluüa mih sata pang kowi kowh nowng khaiah dowi hai nowng rüaah dowi mih sema iawng naown kown. Nakhowk khe dow, ‘Enni dow ang kowh maru nadowi’ pami takcha ‘Masing Thurai kowh chauüa’ padow Thurai natek pe bowt kown.11“Judauüa hai Israeluüa dow amatni cham takhang rah hownia nauang lawt bowt kown, now amatni dow naplan tabawng iawk kown. Amatni pungmadawng hownia amatni dow narui aluchow lowk ia kown. Nami ni dow Jezrel kowi ni kraingma mih ni naown kown,” pakhai.
The Seed Company