Daniel12
1Adipükchow mih la hown kowh tawnguat khupma mih kramamu tek mih, “Khin chur khe dow en maru-uüa kowi hawt towkala reng mih lang kri lang kraing mih kramamu Mikael mih nauang tatüng kown. Nakhowk khe dow krat pusara khin nauang ting kown. Naiawng mih krat pusara dow chenchap maten awr uown uowi hownia katpaw phaw dowi tak chekhai. Tawkche nami khin khe en maru-uüa pungmadawng kowi ming tang bowih kowi ming rui uowi miuüa dow naka lawngra kown.2Nakhowk khe dow kowng miuüa akawmma naplan awr sing iawk kown. Tawngbak mih dow achowngma nasing kownkow naawr rü kown, now tawngbak mih dow rukraira hai suiiai kaniaira kowi achowngma nauowi kownkow naawr rü kown.3Chanlai miuüa dow mukuang nowi iawng natawk kown. Now aiung tia kowi uang pawla maru miuüa dow krek iawng chowngchowng saksakma natawk pliplip kown.4Tawkche aw Daniel, achur khin uang ting dowi mowr dow naiawngün laiklow mih itah diah, now nami chabowih kowi tuk pe mur hanow hing kowpta hüah diah. Nami khin khe dow maru kawmuüa mih naka prengia kownkow nacham krawi mang panglang kown. Nahanow amatni dow naka prengia ngamlam kown,” pakhai.5Nakhowk khe ang Daniel mih krawi tang mü hanow ang pur kowi maru iowng pre ia mih ang khi khai. Nami maru pre ia dow aw mapra pown kowi lowk ia, now aw paipra pown kowi lowk ia chekhai.6Now aw tui luk kowi kowh uowi mih adipükchow mih la hown kowh tawnguat khupma mih maru kowi lowk ia mih maru lüntaah mih, “Naiawngün awdara lawnguan maten nauang phaw kown mih akhin mün khowt tak chow nalakke kown?” pakhai.7Nakhowk khe aw tui luk kowi kowh uowi mih adipükchow mih la hown kowh tawnguat khupma mih maru dow mukuang prakowi pre rut pre pra awr iaw rut hanow masing Thurai ming hown takham se maiawng awr tek mih ang ta khai. Aia tek mih, “Sum ning hown dawnglang tak nalakke kown. Thurai maru-uüa luk kowi kowh nowng chang powng changra chur khe chiang naiawngün maten nauang phaw kown ,” pakhai.8Naiawng aia tek mih laiklow dow ang ta chowdiah. Tawkche tawngpaw ang tukta dowi. Naiawng rakowi ang lüntaah mih, “Aw ang kowh chakramang, naiawngün maten tawng iawng chow nachur kown?” pakhai.9Nakhowk khe aia klang ang mih, “Aw Daniel, kawmat en namang ngengche kown takla. Tawngplawng kowchow panow maiawngün laiklow dow achur khin uang ting dowi mowr naia phuangla dowi kownkow tuk pe mur now towta khai bowt.10Tawngbak mih maru kowi dow Thurai mih achangma, achinawmma hai anowmma nachangah kown. Tawkche maru ngakuüa dow nachang ngak rengreng kown. Maru ngakuüa dow naiawngün lawnguan natuk kown nadowi; chanlaima miuüa ngetchow naiawngün laiklow natukta kown.11Ni towng kowh phuchua chang taingta pe mih ni hownia maru tasür talawkla pat mih asür alawkma mih uanh Thurai chup kim kowi uang tow mih ni mowr kowi 1,290 ni naown kown.12Kaah sakowm iawng 1,335 ni mowr town sak se hawt ia chawng mih maru dow prasira uowima chekhai.13“Tawkche kawmat kowh kaah sakowmma en uowi iawng kowng dowi mowr uowiah diah. Akung kowi en nakowng kown; tawkche khin chur khe dow naka awmrawm sung kownkow en naplan sing iawk kown,” pakhai.
The Seed Company