Habakuk2
1Ang dow kangchawngra kimkrowng kowi nahawt iowng kown;tawng chow CHAKRAMANG natek ang kown mih ang nahawt sünta kown,now ang awr chawk lai mih kowi tawng iawng chow aia nauang klang ang kown mih ang nahawt chawng kown.2Nakhowk khe CHAKRAMANG klangah mih,“Mukmang kowi kowh mami laiklow ruiah diah;mami dow aiachow naia phatla kownkow huapher kowi klangiungma ruiah diah.3Tawngplawng kowchow panow mukmang kowi kowh mami laiklow natachi kown mih akhin uowi tak;mami dow alenma nauang tachi kown,mami mukmang dow dai lai nadowi chekhai pami nakhi-ah kown.Mukmang laiklow nauang tachi kown mih kra tak chepaw hawt chawngah diah;mami mukmang laiklow dow akhin uang ting now nauang tachi ngengche kown.4“Bawrima miuüa dow amatni matia luk kowi owmsak rakowi chownglawng kowi nga reng;tawkche achinawmma miuüa dow Thurai luk kowi owm rakowi nasing kown.5Dawngthawnguan kowi owmsak mih maru dow aiamat takuan mih chekhai,lawphara dow makownguüa uowi rah iawng adu uowi dowi chekhai.Naiawng rakowi aia dow akeng chenchapuüa hown krawi tasen reng,now aia dow chenchap maten kowi khümla now pawla khai.6“Tawkche aia kowi dow maru naprawng renah kown;maru natek pe kown mih, ‘Aia luk kowi ripra nauang ting kown mih dow kramra uowi lai kowbow!Aia dow kür hown krawi pawah mih uanh hown kureng khai;tawkche aia napiak kown mih kra dowi bowt,’ napa kown.7Pakat dow en tut-e kowh kakra uowi miuüa paw narü kown,amatni dow rü hanow chür prang nachang en kown.Nakhowk khe dow amatni tut-e cham rupah mih uanh iawng en nachowng kown.8En dow chenchap ahuma kowh dawngthawnguan krawi khün khai;naiawngün chenchap kowi kowh ta sing uowi miuüa mih en kowh dawngthawnguan nakhünta en kown.Tawngplawng kowchow panow en dow krawi sai maru reng chekhai,en dow pren towng hai marow towng kowi kowh maru maten kowi krawi chang nowng reng chekhai.9“En dow angak hown kowh kaah mih tangka hown kim aiukma en thawp khai;en luk kowi piakra nauang ting kown mih dow kramra uowi lai kowbow!En kowh dawngthawnguan naia pe en thaulangra kown mih en owm khai;naiawngün uowi rah en thawp mih dow phih hownia nakala thaulangra kownkow chekhai.10Chenchap akawmma kowi en krawi saiah khai;naiawng rakowi en kimchakuüa dow ka rukrai khai.Naiawng hai en dow en kowh singra mih en mata khai.11En changla kim mih hua ün natang en aprek kown,now kim kowi kowh klowng ün nakingküa en kown.12“En dow sai maru kowh kaah mih tangka hown thawp marow khai,now nowng chang powng chang hown kowh kaah mih tangka hown en thawp kua khai.Naiawng rakowi en luk kowi piakra nauang ting kown mih dow kramra uowi lai kowbow!13En nowngah mih chenchapuüa kowh kawm rak dow aiawnglowma taih chekhai,akawm akratma hown amatni changah mih maten dow maih kamta pe khai.Naiawng chang mih dow mukuang siphaiuüa kowh CHAKRAMANG chekhai.14Sata kowi dow tui atekma uowi reng chekhai,nami iawng CHAKRAMANG kowh kraingra tuk mih maru dow lusa kowi atekma nauowi bowt kown.15“En dow kunmarau kowh kowmatia kimping namkhet kowi pe khamah arak khai,en dow kimping namkhetuüa kowi tengiow tengklaima namüah kownkow arak hown pe puaah khai.Naiawng rakowi en luk kowi piakra nauang ting kown mih dow kramra uowi lai kowbow!16En kowh dow ringkawra takcha rukraira atekma nauowi bowt kown,kawmat dow arak pua mih maru iawng tengiow tengklaima en nauowi kown mih khin chowbowt.CHAKRAMANG kowh kunmaraura dow en prakowi uang tarü thüm khowk,en kowh ringkawra dow rukraira hown natamum bowk bowt kown.17Lebanawn kaurawng kowi kowh singh ün en krawi kripta khai;nami iawng en kowi paw nakrip en kown.Lebanawn kowi kowh tawncher hawmh kowi en saiah khai;nami iawng en kowi paw tawncher hawmh nasai en kown.Tawngplawng kowchow panow en dow krawi sai maru khai,now pren towng hai marow towng kowi kowh maru-uüa kowi en krawi chang nowng khai.18“Arup aren dow tawngpaw asung uowi dowi chekhai,naiawngün dow maru thawpah mih chowtaih.Huiah mih arup paw asung uowi dowi chekhai,naiawngün hownia dow maru ka daila reng.Naiawngün thawp mih maru tawngplawng kowchow aia thawpah mih uanh luk kowi tuk neplawng nesak khai,naiawngün arup aren dow tuk tek lai dowi chekhai.19En luk kowi piakra nauang ting kown mih dow kramra uowi lai kowbow!En dow singh dung kowi tek pe mih, ‘Rü now lawng anging diah,’ pakhai.Now nowng lai dowi mih hua kowi en tek pe mih, ‘Rü now sang anging diah,’ pakhai.Tawng chow nachang kown mih arup aren nowng tek en kown bow?Naiawngün dow kuh hai tai hown kowh sowah mih chepaw naia;tawkche naiawngün kowh dow asak uowi dowi chekhai.20Nachenganchepaw CHAKRAMANG dow aia kowh chimsaima mih kim kowi uowi reng chekhai;aia pur kowi dow palusama maru rarimma pacham uowi lah,” pakhai.
The Seed Company