Uown Thawp9
1Noa hai achapauüa kowi Thurai peah prasi khai, now tek pe mih, “Ahuma awr prung awr se büah hanow lusa kowi atekma uang uowi büa diah.2Lusa kowi kowh asak uowi mih maten, kuang kowi kowh uakling uaber ün, kam hai sowr mih ün, sata kowi kowh dam ün nakram enni kown. Naiawngün dow enni low kowi nauowi kown.3Alai khe dow pramna ang pe cha enni khai. Nachenganchepaw kawmat hownia dow kam hai sowr mih hown asak uowi mih maten paw enni naiung cha kown towbowt. Naiawngün dow ang peta enni bowk khowk.4Tawkche vi dow sing müa chekhai rakowi tawng iawng mih chaknga paw avi hailawm enni nacha kown nadowi.5Paw enni asak mih kowi dow aia kowh asak paw napawta pe kown. Maru lah, asadua lah paw maru asak mih kowi dow aia kowh asak paw napawta pe ngengche kown. Ang CHAKRAMANG tek khowk.6Maru kowi dow ang matia powm iawng ang thawpah khai; naiawng rakowi amia iawng mih chow sai maru mih kowi dow aia kowi paw akeng mih maru nasaiah kown.7Uang prung uang se büa diah. Akawmma prek chu prek cha büah hanow palusama kowi krawi tauet büa diah,” pakhai.8Nami kung kowi Noa hai achapauüa kowi Thurai tek pe mih,9“Sünta, enni hai enni kowh krungchakuüa vüi sangbowk laitawm ang towta khowk.10Nami klen kowi uakling uaber ün, tawncher ün, kaurawng uaramchak hai asak uowi mih maten chawnlawng hownia enni hown kowh uang tawi lawt mih srui vüi paw ang towta sangbowk laitawm khowk chekhai.11Nami sangbowk laitawm dow maiawng: tuikling mangma hown lusa kowi kowh asak uowi mih chap maten kowi ang napiakah kown nadowi bowt, now palusama nowng piakla iawng mih tuikling mangma paw nauang kown nadowi bowt,” pakhai.12Thurai plan tek iawk mih, “Enni hai asak uowi mih maten vüi ang towta sangbowk laitawm khowk mih dow chowngchowng saksakma vüi chekhai. Nami sangbowk laitawm matra dow uangnim dawng kowi ang kowh tummapia ang nape tatüngah kown. Nami dow lusa kowi kowh asak uowi mih maten vüi ang towta sangbowk laitawm khowk mih amatra chekhai.14Mukuang kowi ang kua uangnim mih khin khe nami uangnim dawng kowi enni nakhi tummapia kown.15Nami khin khe dow enni hai asadua maten vüi kowi kowh ang towah mih sangbowk laitawm ang naka tuak kown. Nahanow tuikling mangma hown lusa kowi kowh asak uowi mih maten napiak kown nadowi bowt.16Uangnim dawng kowi tummapia uang tatüng mih ang khi hanow lusa kowi kowh asak uowi mih maten hown chowngchowng saksakma vüi ang towta sangbowk laitawm khowk mih ang naka tuak kown,” pakhai.17Nami kung kowi Thurai tek pe Noa mih, “Lusa kowi kowh asak uowi mih maten vüi ang towta sangbowk laitawm khowk pami amatra dow nami tummapia chekhai,” pakhai.18Chawnlawng hownia kowh uang lawt mih Noa kowh chapauüa dow Sem, Ham hai Jafet büah chekhai. (Ham dow Kanan kowh pa).19Lusa kowi kowh maru maten dow Noa chapa sum ia kowh chuprek chaprekuüa kangowh chekhai.20Noa dow uown chang üa chang lai khai. Aia dow uown ien grep khai bowt.21Akat khe aia dow kham grep tui kowh lainowmma pua khai. Aia dow pua lai rakowi tengiow tengklaima hown aia kowh tangbung lak kowi müi khai.22Nami khin khe Kanan kowh pa Ham mih naiawng a-pa müi nga mih kowkhita khai. Nami khita hanow Ham dow prang kowi kowh ataimow pre ia tut-e kowkowiah hanow naiawng apa müi nga mih lawnguan kowtek pe khai.23Nami tata hanow Sem hai Jafet iüah dow paw uan lowk now pangkawt riaria batla iüah now kungpah kungpah kowkowi iüah khai, now nami uan mih a-pa luk kowi kowmum pe iüah khai. Amatchi dow a-pa prakowi dang iüah dowi rakowi a-pa tengiow tengklaima mih khi iüah dowi chekhai.24Now pua prowng kung kowi dow Noa mih achapa sawi mih Ham kowh uowi krang tukta khai.25Naiawng rakowi Noa tek mih, “Kanan dow pacham ka piati lah. Aia dow atainau-uüa kowh lang sowm mih nar pacham chowng lah,” pakhai.26Noa plan tek iawk mih, “Sem kowh CHAKRAMANG Thurai dow akiow pauowi lah. Kanan dow Sem kowh nar pachowng lah.27Thurai mih Jafet kowi dow krawng bawn pacham peah küng lah. Now aia dow Sem kowh prasi pacham tawi ka lah. Kanan dow Jafet kowh nar pacham chowng lah,” pakhai.28Tuikling mangma uang kung kowi paw Noa dow singla 350 ning tak chekhai.29Now 950 ning chih now Noa mih kowng khai bowt.
The Seed Company