Uown Thawp8
1Chawnlawng kowi kowh uowi mih Noa hai tawncher hown kaurawng uaramchak maten kowi Thurai mih tamata dowi chekhai. Naiawng rakowi aia dow lusa kowi li uang pe uangah khai, now tuikling mangma tui dow uown iut iawlaw khai.2Nami dowi rawn khe krawng hownia kowh uang towk iualua mih tui hai kuang hownia kowh uang takhük plawtlawt powm iawng mih tui maten taing khai bowt, now uangchak mang paw uang dowi bowt chekhai.3Naiawng rakowi krawng luk kowi kowh tui dow uown iut rürü khai. Now tuikling mangma uown uang hownia 150 ni kung kowi dow tui mih ahuma uang iut khai bowt.4Ranit la kowi kowh lairanit ni khe dow chawnlawng mih Ararat kowi kowh hungh lowk mih kowi kowtatang khai.5Nami kung kowi paw tui dow uang iut rürü chekhai. Now hamüt la kowi kowh auown ni khe dow hungh chut ün uang tatüng khai bowt.6Nami hownia likawm ni kung kowi Noa mih chawnlawng kowi kowh aia thawpah mih tawngpawk uowah khai.7Nami tawngpawk hownia dow aia mih lawt uaak lowk khai. Nachenganchepaw nami uaak dow uang plan dowi; krawng luk kowi kowh tui kang dowi mowr nami uaak dow cham krawi iow panglang khai.8Nami kung kowi paw krawng luk kowi tui kang khowk chünchü pami natukla kownkow Noa mih plan lawt uatur lowk iawk.9Nachenganchepaw nami khin khe palusama kowi tui uowi reng tak chekhai. Naiawng kowh ka mownra dowi kowh nami uatur mih chawnlawng kowi uang plan khai iawk. Noa mih aia rut hown hawt pawah hanow nami uatur kowi dow chawnlawng lak kowi kupla khai.10Nami kung kowi kutplan chawngah ranit ni hanow Noa mih nami uatur kowi chawnlawng hownia plan lawtah khai iawk.11Nami ni sat kowi prakowi nami uatur dow Noa tut-e uang plan powt khai iawk; nami leng dow klekla thowi mih kanrawn ramthawn anawrchawk hown uang pawla lowk. Nami khita hanow krawng luk kowi tui kang khai bowt pami dow Noa hawt tuk khai.12Aia dow plan chawngah ranit ni iawk now nami uatur kowi kutplan lawtah khai iawk, now nami leng dow nami uatur mih aia tut-e uang plan powt dowi bowt chekhai.13Noa kowh ning dow 601 ning uang tachi khai bowt. Nami ning kowi kowh ni uown kowi dow krawng luk kowi mih tui uowi dowi bowt chekhai. Nami khin khe dow chawnlawng kowi kowh aluk mih Noa uowah hanow tang mü khai, now aluk phü bawn uown kang mih aia khi khai.14Nami ning pre la kowi kowh pirmi lairanit ni khe dow bawn mih akang khawngma uang own khai bowt.15Nami khin khe Noa kowi Thurai tek pe mih,16“En hai en masi, en chapauüa hai en iaumowuüa hailawm chawnlawng hownia uang lawt büah towbowt.17Asadua hai uakling uaber hai kam hai sowr mih ün, asak uowi mih chap maten kowi uang lawtla towbowt. Amatni dow lusa kowi pacham prung pacham se büah lah, now lusa kowi atekma pacham uowi büah lah,” pape khai.18Naiawng rakowi Noa dow amasi hai achapauüa hai aiaumowuüa hailawm chawnlawng hownia uang lawt khai bowt.19Now asadua hai uakling uaber hai kam hai sowr mih ün, asak uowi mih chap maten paw kowmatia chap hown ahawm ahawmchow uang tawi lawt khai.20Nami kung kowi dow Noa mih CHAKRAMANG vüi thawp phuchuara lowk khai. Now asadua hai uakling uaber chap maten hownia chimsaima mih pawah lowk chi khai, now phuchuara luk kowi tikah now tikah mih uanap dow CHAKRAMANG tut-e ap-ah khai.21Nami uanap nam ta hanow CHAKRAMANG dow awmrawm rakowi sakdawng hownia tek mih, “Maru rakowi lusa kowi kowh uowi mih maten kowi ang napeah piati kown nadowi bowt. Maru kowh saktuak dow asowmchow hownia angak prakowi kangowh chepaw asak uowi mih chap maten kowi kawmat kowh ang piakah mih iawng dow katpaw ang napiakah kown nadowi bowt.22Mami lusa uowi mowr dow akhin towng nasawt liu hanow nakua luprak bowt kown. Arua hai aden, chungrau hai satma, ni hai uar atungma nauowi reng bowt kown,” pakhai.
The Seed Company