Uown Thawp6
1Naiawng hai lusa kowi maru akawmma uang prung khai; nami pungmadawng kowi masiuüa paw ahuma tawi uowi khai.2Nami khin khe Thurai chapauüa mih lusa kowi kowh masiuüa hawmh kowi klangiungma khi-ah khai. Naiawng rakowi amatni naukhi-ah mih kowi pawah büah hanow changla masi büah khai.3Nami khita hanow CHAKRAMANG tek mih, “Ang lümla mih maru tut-e chowngchowng saksakma nauowi kown nadowi bowt. Tawngplawng kowchow panow maru dow nakowng ngengche kown. Kawmat hownia dow 120 ning mowr towbowt nasing büah kown,” pakhai.4Lusa kowi kowh masiuüa hown Thurai chapauüa taphua taiua kowh kaah mih chauüa dow achük alai kowh aming anang iukma mih bawliuüa chekhai. Nami maru-uüa kowi dow Nephilimuüa pape khai; amatni dow nami khin khe hai nami kung kowi paw lusa kowi uowi reng chekhai.5Now lusa kowi maru-uüa kowh angak dow lainowmma hu mih CHAKRAMANG khi khai; maru-uüa kowh saktuak hai kamrütra dow atungma angak prakowi kangowh chekhai.6Nami khita hanow CHAKRAMANG dow lainowmma sak piak khai; lusa kowi aia thawpla maru mih rakowi aia sak kowi dow lainowmma rau khai.7Naiawng rakowi CHAKRAMANG tek mih, “Ang thawpah mih maru kowi lusa hownia asaima ang namata kown. Nami klen kowi tawncher hai kaurawng uaramchak ün, kam hai sowr mih ün, kuang kowi kowh uakling uaber ün ang namata bowk kown. Naiawngün ang thawp rakowi chekhai ang sak kowi rau mih,” pakhai.8Nachenganchepaw Noa luk kowi dow CHAKRAMANG mih sak-ih reng chekhai.9Mami dow Noa chownglawng laiklow chekhai. Noa kowh chapa sum ia dow Sem, Ham hai Jafet chekhai. Noa dow maru iungma. Aia chowng kowi kowh maru maten kowi achi anawmma mih dow aia lowkchow taih. Aia dow Thurai hown taklawp taiua reng.11Nachenganchepaw akeng miuüa dow Thurai mik mük kowi piak bowk khowk; palusama kowi dow angak kangowh atekma chekhai.12Lusa kowi uang iu mü hanow lusa dow lainowmma ngah mih Thurai uang iu khi khai. Tawngplawng kowchow panow lusa kowi kowh maru chowm krang uowi krang dow lainowmma ngah khai.13Nami khi hanow Thurai tek pe Noa mih, “Lusa kowi kowh asak uowi mih maten ang napiakta kownkow ang kamrütta khowk. Maru rakowi lusa mih nowng chang powng changra hown tek khai bowt. Naiawng rakowi maru hown lusa kowi kowh uowi mih maten kowi ang napiakta bowk kown.14Naiawng rakowi en matia vüi painglang singh hown thawp chawnlawng lowk diah. Nami chawnlawng kowi atowk ahuma thawpah diah. Now chawnlawng ping kowi dow alak hownia hai uat hownia mih than hown miaah bowk diah.15Chawnlawng dow maiawng en nathawpah kown: Areng klang 300 muk, adowng phia 50 muk, now akro 30 muk en nathawpah kown.16Now chawnlawng luk hownia adak pra amuk mowr mih tapat lut tawngpawk en natow pe kown; en napingah kown nadowi. Now aplawt dow areng hownia en nathawpah kown. Now aluk krowng, adawng krowng hai adak krowng en nathawp pe kown.17Sünta, mukuang dak kowi hü sak kowh sing mih chap maten ang napiakta kownkow lusa kowi ang nauang pawla pe tuikling mangma kown. Lusa kowi kowh asak uowi mih maten dow nami tuikling mangma hown nakowng bowk kown.18“Nachenganchepaw en hown dow ang natatow sangbowk laitawm kown. En hai en masi, en chapauüa hai en iaumowuüa, enni bowkbowk dow chawnlawng kowi napün kown.19En hown natawi singla kownkow asak uowi mih chap maten ala ama, aku aklang achum achumchow chi chawnlawng lak kowi en natangla kown.20Tawncher chap maten, uakling chap maten hai kam hai sowr mih chap maten achum achumchow en nape singla kownkow en tut-e nauang kown.21Naiawngünuüa hai enni nachangla chakkham kownkow chaah mih chap maten krawi pawah hanow krümah diah,” pape khai.22Now Noa dow nami powm iawng chang khai. Thurai peah ana mih iawng lup maten aia mih chang khai bowt.
The Seed Company