Uown Thawp38
Juda hai Tamar
1Nami khin khe Juda dow atainau-uüa hownia cham powt hanow Adulam kua kowi kowuowi khai. Aia dow nakowi kowh Hira pami maru lowk ia hown tawi taiua uowi khai.2Nakowi uowi mih khin khe Juda dow Kanan chenchap Sua pape mih kowh chama kowi naukhita khai, now nami masiuüa hown aia dow tachawng khai.3Nami masiuüa dow kum nau hanow pen chapa lowk ia khai. Achapa ming dow Er pahai a-pa Juda rük pe khai.4Nami kung kowi paw amasi dow plan kum nau hanow pen chapa lowk ia khai iawk, now achapa ming dow Awnan pahai a-u rük pe khai.5Nami kung kowi paw amasi mih kutplan kum nau hanow plan pen chapa lowk ia khai, now achapa ming dow Sela pahai a-u rük pe khai. Sela dow Chezib marow kowi uowi büah mih khin khe kowh dia mih chekhai.6Nami kung kowi dow Juda mih achapa lang ta mih Er kowi Tamar pami masiuüa hown pe tachawngah khai.7Nachenganchepaw Er dow CHAKRAMANG mik kowi lainowmma nga khai. Naiawng rakowi aia kowi dow CHAKRAMANG kowngta khai.8Nami khin khe Juda tek pe Awnan mih, “En taimow ta mai mih kowi ta chawng diah. En dow anaumow chedow en luk kowi kowh kurdik uowi iawng en taimow kowi ta prek pe chu chah diah ,” pape khai.9Nachenganchepaw Awnan dow aia hown kowh kaah mih chah aia krungchak nadowk pe kown nadowi pami tuk rakowi ka chah kown nau dowi chekhai. Naiawng rakowi ataimow masi hown taphua taiua towng aia kowh khampha uanh tui mih prang kowi pe towkah khai.10Naiawng Awnan chang mih CHAKRAMANG dow naukhi dowi chekhai. Naiawng rakowi Awnan kowi paw CHAKRAMANG kowngta khai.11Now Sela paw ataimowuüa iawng dow nakowng kown chekhai padow Juda tatuak khai bowt. Naiawng rakowi aiaumow Tamar kowi tek pe mih, “Ang chapa Sela iuk dowi mowr dow en pa kim kowi mamaimow iawng kowuowi diah towbowt,” pape khai. Naiawng rakowi Tamar mih Juda laiklow iawng a-pa kim kowi kowuowi khai bowt.12Nami kung kowi akrama khe dow Sua kowh chama Juda kowh masi mih kowng khai bowt. Now Juda dow amasi prüa rau uowi dowi bowt mih khin khe Adulam kuachak aia auiua Hira hown Timna marow kowi kowkowi khai. Aia dow aia kowh ruapur pawi kep miuüa kowh lup nakowmü kownkow nakowi kowkowi mih chekhai.13Nami dowi rawn khe Tamar kowi maru lowk ia kowtek pe mih, “Sünta, en tarang cham kep ruapur pawi kownkow Timna marow prakowi tarü thüm khowk,” pape khai.14Now Tamar dow aia kowh mamaimow tawnguat klüpta hanow tawnguat klangiungma mih hown tatawng khai bowt. Now aia dow mumla lumowr hanow Enaim marow tapplawt re-e kowhawtchowm phülü khai. Naiawng Tamar chang mih dow Sela iuk khowk chepaw Sela hown atarang pe tachawngah dowi reng rakowi chekhai. Enaim dow Timna pra kowh mangla mih tiama kowi chekhai.15Tamar mumta lumowr khai rakowi Juda dow khita hanow Tamar kowi nüla chawkkrawma khai.16Aia dow aiamat iaumow kowi mapaw tuk mat dowi chekhai. Naiawng rakowi tiama ria kowi Tamar tut-e Juda kowkowiah now tek pe mih, “Uang, achi taphua taiua lah,” pakhai.Tamar tek pe mih, “Taphua taiuala en mih sung tawng chow en pe ang kown?” pape khai.17Juda tek pe mih, “Ang kowh rua hawmh hownia ang uang krawi sa en rua chah lowk kown towbowt,” pakhai.
Tamar tek pe mih, “Nami en uang krawi sa ang dowi mowr en ta towla ang uanh ne kown takla,” pape khai.18Juda tek pe mih, “Tawng uanh chow ang ta towla en kown?” pakhai.
Tamar tek pe mih, “En kowh raitua hai en matia kowh mur aleng hailawm towla ang diah,” pape khai. Naiawngün uanh mih Tamar kowi ap pe hanow amatchi dow taphua taiua khai. Naiawng rakowi Tamar dow kum nau khai bowt.19Tamar dow kim kowi kowplan mang hanow aia khupla mih khupdip tawngklai hai lu mum müa kowklüpta khai, now aia kowh mamaimow tawnguat mih kutplan khup khai iawk.20Akung kowi Tamar tut-e kowh ta towla mih uanh nakowklan kownkow Juda mih aia auiua kowi krawi peah rua chah lowk hanow kowchinah khai. Nachenganchepaw Juda kowh auiua mih Tamar kowi kowkrum dowi chekhai.21Nami khin khe nakowi kowh uowi miuüa kowi Juda kowh auiua lüntaah mih, “Enaim tiama ria kowi kowh chowm reng mih chawkkrawma tawng kowi chow?” pakhai.
Nakowi kowh maru-uüa tek pe mih, “Makowi dow tawng iawng mih chawkkrawma paw uowi dowi kowbow!” pape khai.22Naiawng rakowi nami maru mih uang plan hanow Juda kowi tek pe mih, “Masiuüa kowi ang kowkrum dowi. Nami klen kowi nakowi kowh maru-uüa tek tawng iawng mih chawkkrawma paw nakowi uowi dowi pe,” pape khai.23Now Juda tek mih, “Naiawng now ang ta towla mih uanh aia tut pacham uowi ngowngla towbowt. Naiawng nadowi now maru naprawng naren achi kown chekhai. Nami klen kowi en kowkrum dowi kowh smü dow rua chah mih ang krawi sa pe khowk chekhai,” pakhai.24Sum la kung kowi dow chang iang kowh aiaumow pawm khai pe pami satang Juda tawi ta khai bowt. Nami tata hanow Juda tek mih, “Nami masiuüa kowi uang lawtla hanow maih kowi nawmah diah,” pakhai.25Now aia kowi uang lawtla mih khin khe Tamar mih atarang tut-e kowchin maru lowk ia khai. Tamar krawi tek pe mih, “Sakrauma hown maiawngün uanh mih müah kaneu diah. Mami raitua hai aleng hailawm mih mur mia kowh chow? Ang kum nau mih dow maiawngün uanh iah hown chekhai,” pakhai.26Juda dow naiawngün uanh tuk matta hanow tek mih, “Aia dow ang lak-e lang iung but chekhai. Tawngplawng kowchow panow ang chapa Sela hown ang pe tachawngah dowi rakowi naiawng aia chang mih chekhai,” pakhai. Nami kung hownia now Tamar hown katpaw aia taphua taiua dowi bowt chekhai.27Kimuowi mu rau uang phaw mih khin khe Tamar kowh chah phir chekhai pami tuk büah khai bowt.28Aia uowi kim khe lowk ia mih kowh dow rut uai rik chawn khai. Nakhowk khe lasin iang aringma mih hown nami rut kowi pen sara sük pe hanow tek mih, “Mami dow uang rik dia mih chekhai,” pakhai.29Nachenganchepaw nami nau plan kupta rut hanow ataimow mih uang chawn plawi khai. Nakhowk khe pen sara tek mih, “En naumow kowi etla now tawng iawng chow en uang tuk chawn khai?” pakhai. Naiawng rakowi aming dow Perez pahai rük pe khai. (Perez pami dow “Etla now uang chawn mih” pami chekhai).30Nami kung kowi dow rut kowi lasin iang aringma mih sükchow anaumow uang ta chawn khai. Now aming dow Zera pahai rük pe khai.
The Seed Company