Uown Thawp28
1Rebeka kowh laiklow ta hanow Isak dow Jakawb kowi hawah now peah prasi khai, now aia kowi dow peah ana khai. Isak tek pe mih, “Kanan prenchak masiuüa kowi amia iawng mih kowi paw hangkow paw ba.2Padan-aram pren kowi kowh en pu Bethuel kim kowi phai kowkowi diah. Now nakowi kowh en u rak Laban chama kowi phai kowpaw diah.3Lowra nowngia chang mih Thurai dow pacham pe en prasi lah, aia dow chauüa kawmma pacham pe en lah. Naiawng hai en krungchakuüa hownia chenchap ahuma pacham chowng lah.4Abraham kowi Thurai peah prasi iawng aia dow en hai en kung kowi kowh uang ta uowi kown mih en krungchakuüa kowi paw pacham peah prasi lah. Prenlang maru iawng kawmat kowh en uowiah mih pren dow Abraham kowi Thurai peah mih chekhai, nami pren dow en kowh pren pacham chowng lah,” pakhai.5Isak mih naiawng tek pe hanow Jakawb kowi cham chinta khai bowt. Now Jakawb paw Padan-aram pren kowi kowh Aramean maru Bethuel chapa Laban tut-e kowkowi khai. Laban dow Jakawb hai Esau iüah u Rebeka kowh rak chekhai.6Akat khe dow Jakawb kowi peah prasi hanow Padan-aram kowi kowh masiuüa kowi nakowpaw kownkow Isak cham chinah mih Esau tawi tuk khai. Nami klen kowi Jakawb kowi Isak peah prasi khe kowh Kanan masiuüa kowi amia iawng mih kowi paw hangkow paw ba pami ana pek paw Esau tawi tuk khai.7Now a-u a-pa laiklow iawng Padan-aram kowi Jakawb kowkowi mih Esau tawi khi khai.8Aia dow Kanan prenchak Hit masiuüa kowi a-pa Isak sak-ih dowi pami tuk khai bowt.9Naiawng rakowi u-pa nasak-ihla kownkow Esau mih masi uowi pre ma khowk chepaw Abraham chapa Ismael kim kowi kowkowiah now Ismael chama Mahalat kowi kowplan paw khai. Mahalat dow Nebaiawt tuamow chekhai.10A-pa Isak ki peah prasi kung kowi Jakawb mih Ber-Seba hownia lawt hanow a-pu Laban uowi rah Haran marow prakowi tarü khai bowt.11Now sat kowi khe aia dow tiama rawng kowi cham krum uowi rah arah khai. Aia dow nakowi iak khai. Aia dow nami re-e kowh huaklu uowi lowk mih kowi nüa lu now müi khai.12Now Jakawb mih khi mang khai. Aia dow mang lak kowi krawng hownia mukuang kowi tachang mih dawng khi lowk. Nami dawng kowi Thurai kowh kramamu-uüa pün dowm lawmlawm mih aia khi khai.13CHAKRAMANG dow nami dawng chem kowi iowng now tek mih, “Ang chowbowt CHAKRAMANG. Ang dow en pu Abraham hai en pa Isak kowh Thurai chekhai. Kawmat kowh en müiah mih pren dow en hai en krungchak maru-uüa kowi ang napeah kown.14En krungchak maru-uüa kowi mih lusa kowi kowh sema iawng ang nachangah kown. Amatni dow satlawt satkup hai tawngphak mrawkphak kowi nacham tauet kown. Lusa kowi kowh chenchap maten mih en hai en krungchakuüa hownia naka prasi kown.15Sünta, ang natawi uowila en reng kown. En cham kowi rah towng kowi ang nakrawi lawng en kown; mami pren kowi mih ang nauang kutplan pawla en iawk kown. Ang khamta en mih ang chang en dowi mowr dow ang powtta en dowi tham,” pakhai.16Now Jakawb dow awr rü müi hanow tek mih, “Mami re-e CHAKRAMANG uowi lowmow! Ang hing tuk dowi smü dow!” pakhai.17Nami laiklow tatuak now Jakawb dow kram khai. Aia dow tek mih, “Mami arah dow kramra hai ringkawra uowi lai kowbow! Mami dow Thurai kim klen kowi tawngpaw nadowi lowmow; mukuang kimplawt dow mami re-e chowbowt lowmow,” pakhai.18Jakawb mih auai rau murpa awr rü khai, now aia nüala lu mih huaklu dow chowkah khai. Nami hua luk kowi dow klai pe sau hanow CHAKRAMANG vüi chimsaiah khai.19Aia dow nami arah kowi Bethel pahai chap pe ming khai. (Bethel pami dow “Thurai kim” pami chekhai). Auown khe dow nami marow ming Luz chekhai.20Now takham se Jakawb tek mih, “Thurai che mami ang cham kowi rah kowi lawng ang khai, pe ang chakkham hai pe ang khupdip tawngklai khai,21now apa kim kowi klangiungma ang uang ia plan khai iawk hanow mami CHAKRAMANG kowi ang kowh Thurai padow ang nakhamah kown.22Nami klen kowi ang chowkah mih huaklu paw Thurai chupra nachowng ngengche kown. Aw Thurai, en pe ang mih srui hownia hamüt bak kowi pabak ang naplan pe en ngengche kown,” pakhai.
The Seed Company