Uown Thawp1
1Auown khe Thurai mih mukuang hai lusa thawpah khai.2Nami khin khe dow lusa mih akhaw aklaima; apowm paw uowi dowi tak chekhai, now tui abüpma mih luk kowi aiiu kangowh chekhai. Thurai Lümla dow nami tui luk kowi krawi len reng chekhai.3Thurai tek mih, “Panowi lah,” pakhai. Now anowi dow uang uowi khai bowt.4Nami anowi dow aia mü hanow aia tut-e aiungma chekhai. Thurai dow nowi hai iiu kowi lang kraah khai.5Thurai mih nowi kowi dow ni pahai chap pe ming khai, now iiu kowi dow uar pahai chap pe ming khai. Now ni paw kowi khai, uar paw kowi khai bowt; nami dow pani mih chekhai.6Thurai tek mih, “Tui takra kowi akuangma pauowi lah, now tui mih dow pre bak pacham phaw lah,” pakhai.7Naiawng hown Thurai mih akuangma mih thawp pe hanow aluk pra kowh uowi kown mih tui hai adak pra kowh uowi kown mih tui kowi lang kraah khai. Naiawng rakowi pabak mih tui dow akuangma mih luk kowi uowi khai, now pabak mih tui dow akuangma mih dak kowi uowi khai.8Thurai dow akuangma aia thawpah mih kowi mukuang pahai chap pe ming khai. Naiawng hai ni paw kowi khai, uar paw kowi khai iawk; nami dow pre ni mih chekhai.9Nami kung kowi Thurai tek mih, “Kuang dak kowi kowh tui uowi mih maten arasang pacham uowi lah, now süng akangma mih pauang tatüng lah,” pakhai. Now nami powm iawng dow uang uowi khai bowt.10Thurai mih nami süng akangma mih kowi krawng pahai chap pe ming khai, now arasang uowi mih tui kowi dow sata pahai chap pe ming khai. Nami dow aia mü hanow aia tut-e aiungma chekhai.11Nami kung kowi Thurai tek mih, “Krawng hownia pramna chap maten paawr ru lah; cha ün, uih mih chap ün chowlowkkow liu uowi mih chap maten pauang uowi lah,” pakhai. Now nami powm iawng dow uang uowi khai.12Krawng hownia dow cha ün, pramna ün, uih mih chap ün chowlowkkow liu uowi mih chap maten uang uowi khai bowt. Naiawngün dow aia mü hanow aia tut-e aiungma chekhai.13Naiawng hai ni paw kowi khai, uar paw kowi khai iawk; nami dow sum ni mih chekhai.14Nami kung kowi Thurai tek mih, “Anowi uowi mih chap maten kuang kowi pauang tatüng lah; naiawngün dow ni hai uar kowi pacham kraah lah. Nami dow pawi khin mat müa ün, ni hai ning klowk müa ün pacham chowng lah.15Naiawngün dow kuang hownia lusa krawng luk kowi pauang iu nowi lah,” pakhai. Now naiawng dow uang phaw khai bowt.16Thurai mih anowi kraingma mih pre buk thawpah khai. Nami pre buk kowi lang nowi rowt mih dow ni-e nachang alow kownkow, now anowi lang e rowtchow mih dow uar-e nachang alow kownkow aia thawpah mih chekhai. Nami klen kowi krek ün paw aia thawpla khai.17Naiawngün dow lusa krawng luk kowi nauang iiu nowila kownkow kuang kowi aia towah khai.18Naiawngün dow ni-e hai uar-e nachang alow kownkow hai anowi hai aiiu kowi nakrala kownkow kuang kowi aia towah mih chekhai. Naiawngün dow aia mü hanow aia tut-e aiungma chekhai.19Naiawng hai ni paw kowi khai, uar paw kowi khai iawk; nami dow tali ni mih chekhai.20Nami kung kowi Thurai tek mih, “Tui dawng kowi asak uowi mih chap ahuma pacham uowi lah, now kuang dawng kowi dow uakling uaber achap akawmma pacham iow lah,” pakhai.21Naiawng hai Thurai mih sata kowi asak uowi mih chap aiukma mih ün thawpah khai. Now tui dawng kowi kowh tahawm lawmlawm se krawi mang iualua mih chap paw achap ahuma aia thawpla khai. Nami klen kowi uakling uaber paw achap ahuma aia thawpah khai. Naiawngün dow chowlowkkow chap naprungla kown mih kür uowi bowk chekhai. Naiawngün dow aia mü hanow aia tut-e aiungma chekhai.22Now Thurai mih naiawngünuüa kowi maiawng peah prasi khai, “Naprung nasela kown mih kür uowi powm iawng dow chowlowkkow chap mih prung büah se büa diah; sata tui dawng kowi atekma uowi büa diah. Krawng luk kowi kowh uakling uaber hawmh paw chowlowkkow chap iawng paprung pase lah,” pakhai.23Naiawng hai ni paw kowi khai, uar paw kowi khai iawk; nami dow tanga ni mih chekhai.24Nami kung kowi Thurai tek mih, “Krawng hownia tawncher ün, kaurawng uaramchak ün, kam hai sowr mih ün pacham uang phaw lah,” pakhai. Now nami powm iawng dow uang phaw khai bowt.25Thurai mih kaurawng uaramchak ün, tawncher ün, kam hai sowr mih ün achap kawm thawpah khai. Naiawngün dow chowlowkkow chap naprungla kown mih kür uowi bowk chekhai. Naiawngün dow aia mü hanow aia tut-e aiungma chekhai.26Nami kung kowi Thurai tek mih, “A-i iawng, a-i hown tatu iawng kawmat dow i thawp maru diah sik. Amatni dow sata kowi kowh dam luk kowi ün, kuang kowi kowh uakling uaber luk kowi ün, tawncher luk kowi ün, asadua maten hai lusa kowi kowh uowi mih matiow luk kowi pacham chang alow lah,” pakhai.27Thurai dow aia powm iawng thawp maru khai bowt. Aia dow aiamat powm iawng maru kowi thawpah khai; aia dow kachakuüa hai masiuüa kowi thawpah khai.28Now Thurai mih amatchi kowi dow peah prasi khai. Thurai tek pe mih, “Enchi mih prungla sela mih kür hown atekma uowi iüah hanow lusa kowi ahuma uang prung uang se iüa diah. Lusa dow enni matia low iawng towah büa diah. Nami klen kowi sata kowi kowh dam luk kowi ün, kuang kowi kowh uakling uaber luk kowi ün, now krawng luk kowi kowh asak uowi mih chap maten luk kowi chang low büa diah,” pakhai.29Nami kung kowi Thurai tek mih, “Sünta, lusa krawng luk kowi kowh pramna hai uih-ak kowi chowlowkkow aliu uowi mih maten ang peta enni khowk; naiawngün dow enni kowh chakkham naown kown.30Nachenganchepaw lusa kowi kowh asak uowi mih maten, asadua ün, uakling uaber ün, kam hai sowr mih nachangla chakkham kownkow pramna dow ang peta khowk,” pakhai. Now nami powm iawng uang own khai bowt.31Thurai mih aia uanh thawp maten müah khai; naiawngün dow lainowmma aia tut-e iung khai. Naiawng hai ni paw kowi khai, uar paw kowi khai iawk; nami dow taruk ni mih chekhai.
The Seed Company