Ezra3
1Ranit la kung kowi dow Israeluüa maten mih amatni chowlowkkow kua hai marow kowi ia uowi büah khai bowt. Nakhowk khe amatni dow Jerusalem marow kowi takua talawm büah bowk khai.2Nami khin khe amatni dow tikah mih uanap chang müa Israeluüa kowh Thurai vüi plan thawp phuchuara lowk khai. Nami phuchuara dow Mosi kowi Thurai peah mih rirow bowih kowi arui uowi iawng plan thawpah büah khai. Nami phuchuara thawp miuüa dow Jozadak kowh chapa Jesua hown aia kowh auiua uamowuüa hai Sealtiel kowh chapa Zerubabel hown aia kowh auiuauüa chekhai.3Amatni dow hawt iawng uowi mih aria aret kowi kowh akeng chenchapuüa kowi kram chepaw phuchuara nam prim luk kowi nami phuchuara mih plan thawp büah khai. Now nami phuchuara kowi dow rau-e hai iak pra kowh phuchua khin khe CHAKRAMANG vüi tikah mih uanap pawi chang büah khai bowt.4Nami kung kowi dow rirow bowih kowi arui uowi iawng chang Te Pawi büah khai, now ni towng kowh vüi khowm bowkta mowr chi tawncher hown tikah mih uanap pawi chang büah khai.5Nami hownia bowt now ni towng kowh tikah mih uanap, Lacher Pawi kowi kowh tikah mih uanap, CHAKRAMANG vüi khowmta bowkta mih pawi kowi kowh tikah mih uanap hai kowmatia sak nau hown kowh uang pawla mih uanap pawi chang büah khai.6Naiawng hai amatni dow ranit la kowi kowh lacher pani hownia CHAKRAMANG vüi tikah mih uanap pawi chang büah khai. Tawkche nami khin khe paw CHAKRAMANG chup kim vüi kimchüng khowm padow phükah dowi tak chekhai.7Amatni dow Persia pren mang Kuras alow pek iawng Lebanawn hownia Jawpa mowr sata iawng uang pawla sidar singh mih Sur hai Sidawnuüa kowi dow chakkham, grep tui hai kanrawn sau peah khai. Now kim chang sarauüa hai singh hown kowh uanh thawp sarauüa kowi dow peah tangka büah khai.8Now amatni dow Babulawn pren hownia uang plan kowh Jerusalem kowi uang uowi mih laitali la khe Thurai chup kim chang tarowng büah khai. Nakhowk khe kowh chang lup miuüa dow Sealtiel kowh chapa Zerubabel, Jozadak kowh chapa Jesua hai amatni kowh tainau-uüa chekhai. Amatni kowh tainau-uüa dow uamowuüa, Leviuüa hai cham takhangra hownia Jerusalem kowi uang plan mih maten chekhai. Now pirmi ning hownia nami luk kowi kowh Leviuüa kowi dow Thurai chup kim lup chang miuüa kowi mingkhet mih kurdik peah khai.9Thurai chup kim lup chang miuüa kowi mingkhet miuüa dow Jesua hai achapauüa, atainau-uüa, Hodavia krungchak Kadmiel hai achapauüa, Hanadad chapauüa hai amatni kowh tainau-uüa chekhai. Amatni dow Levi chenchap kangowh chekhai.10Now kim chang sarauüa CHAKRAMANG kim vüi phük kimchüng mih khin khe uamowuüa hai Leviuüa pungmadawng kowi kowh Asaf chapauüa dow chowlowkkow iowngra kowi iowng büah khai. Nakhowk khe Israel mang David kowh ana pek iawng CHAKRAMANG kowi nakiowrila kownkow uamowuüa dow amatni kowh amülüng mih tawnguat khupla now dowkla baw khai, now Asaf chapauüa dow dowkla klingchow khai.11Now amatni dow CHAKRAMANG kowi rowsi hai tek awmrawm lai se maiawng tek meng büah khai.“CHAKRAMANG dow aiungma,Israeluüa luk kowi aia kowh achur uowi dowi mih sakraura dow anikma chekhai,” pakhai.CHAKRAMANG kowh kim vüi phükta kimchüng khowk rakowi nakhowk khe maru kawmuüa dow atünma how se CHAKRAMANG kowi rowsiah khai.12Nachenganchepaw naiawng awmrawm rakowi howla sawm khe alai kowh Thurai chup kim khi mih uamow lawngtanguüa, Leviuüa hai krungchak aluchowuüa dow Thurai chup kim kimchüng phükta mih khita hanow atün atünma kar khai.13Nakhowk khe amatni kowh how klow hai kar klow dow tawng mih chow how klow hai tawng mih chow kar klow pami tuktaah dowi chekhai. Nami klow dow alakma hownia khowm padow ia ta khai.
The Seed Company