Ezekiel25
1Nami kung kowi CHAKRAMANG laiklow dow ang tut-e uang ting khai. CHAKRAMANG tek ang mih,2“Aw maru chapa, Amawn pren prakowi dangah now pur prakowi amatni luk kowi kowh phih nauang ting kown mih laiklow tek pe dit.3Ang CHAKRAMANG Thurai, ang kowh mami laiklow nasünta kownkow tek pe diah, ‘Ang kowh kim tasür talawk mih hai Israel pren piak mih hai Juda maru-uüa kowi nachangla nar kownkow maru pawla mih khi hanow lainowmma enni awmrawm khai.4Naiawng rakowi enni uowi rah satlawt pra kowh maru-uüa rut kowi ang naap enni kown. Amatni dow enni pren kowi nauang thawp tangbung hanow enni lak kowi natawi uowi büah kown. Now amatni dow enni kowh uih-ak nacha kown, enni kowh iawn tui paw nakham kown.5Rabba marow kowi dow ut tawkra ang changah kown, now Amawn pren kowi dow ruapur hawmh naira ang nachangah kown. Nami khin khe dow ang chowtaih CHAKRAMANG pami enni natuk bowt kown.6Israel pren piak mih enni khi hanow prowk se prowk se phek rut now enni plai khai. Israel kowi dow enni sak-hiaah lai kowh enni kowh sak dow lainowmma piaw khai.7Naiawng rakowi ang matia kür hown ang narip enni kown, now cham rupah mih uanh iawng akeng chenchapuüa rut kowi ang naap enni kown. Akeng pren hai akeng chenchapuüa pungmadawng hownia ang napiak enni hanow ang namata enni kown. Nahanow ang chowtaih CHAKRAMANG pami enni natuk bowt kown,’ pape diah,” pakhai.8Akung kowi CHAKRAMANG tek mih, “Moabuüa hai Seiruüa tek mih, ‘Mü madiah, Juda maru-uüa paw akeng chenchapuüa maten hown tawngpaw lang taklowi dowi,’ pakhai.9Naiawng rakowi Moab pren kowi kowh rihi chawng mih marow ün dow ang napiakta pe kown; amatni kowh marow akhawtma mih Beth-Jesimawth, Baal-Meawn hai Kiriathaimün dow ang napiakta pe kown.10Chenchapuüa pungmadawng kowi Amawnuüa lawnguan maru pacham tamata lah, now Moab paw pacham ka ripra lah pakowh Amawnuüa hailawm Moab kowi paw satlawt pra kowh prenchakuüa rut kowi ang naap-ah kown. Nami khin khe dow ang chowtaih CHAKRAMANG Thurai pami natuk büah bowt kown,” pakhai.12Akung kowi CHAKRAMANG tek mih, “Edawmuüa mih Juda maru-uüa luk kowi paw lu klai khai. Naiawng amatni sat klai mih dow lainowmma chang ngak mih chekhai.13Naiawng rakowi ang CHAKRAMANG Thurai, ang tek khowk. Edawmuüa kowi mih ang napar pe rut hanow ang naripah kown, now nakowi kowh maru maten hai tawncher dow ang nakowngta bowk kown. Amatni kowh pren dow apiaknama ang natowah kown, now Teman hownia Dedan mowr tasen hown maru nakowng kown.14Edawmuüa luk kowi nasat klai kownkow ang maru Israeluüa kowi ang natawngah kown. Mapaw ang sak-ih dowi mih hai ang kowh kunmarau iawng hown Israeluüa dow Edawmuüa kowi nachangah kown. Nami khin khe dow ang CHAKRAMANG sat pe klai mih chekhai pami natuk büah bowt kown,” pakhai.15Akung kowi CHAKRAMANG tek mih, “Filistinuüa dow chowng ransu mih Juda maru-uüa luk kowi sat klai mih akrama khowk chekhai; amatni dow sak-hiaah lai kowh Juda maru-uüa luk kowi arawn amatma sat klai khai.16Naiawng rakowi ang CHAKRAMANG tek khowk, Filistinuüa kowi ang matia kür hown ang naripah kown; Kerethiuüa kowi ang nakowngta kown, now sata pang kowi uowi mih akeng miuüa kowi ang piakta kown.17Amatni luk kowi lainowmma ang nasat klai kownkow ang kowh kunmaraura hown amatni kowi ang naripah kown. Now ang chowtaih CHAKRAMANG pami natuk büah bowt kown,” pakhai.
The Seed Company