Uown Lawt7
1Nami khin khe CHAKRAMANG tek pe Mosi mih, “Sünta diah, Faraw tut-e mih thurai iawng ang nachang en kown. Now en taimow Arawn dow en kowh risi iawng natek lai kown.2Ang pe en mih ana maten en taimow Arawn kowi en naphuang pe kown. Aia dow Aigupta pren hownia Israeluüa kowi nalawtah kownkow Faraw kowi natek pe kown.3Aigupta pren kowi amatra hai awdara lup ahuma lup ang tüng pe chepaw Faraw mih nachün enchi laiklow kown nadowi. Tawngplawng kowchow panow aia kowh saktuak dow akhawtma ang changta pe kown chekhai. Aigupta prenchakuüa luk kowi mih ang napar pe rut hanow lainowmma ang naripah kown, now ang maru-uüa kowi dow nami pren hownia ang nauang lawtla kown.5Ang kowh kür hown Aigupta pren hownia Israeluüa kowi ang uang lawtla mih khin khe dow Aigupta maru-uüa mih ang chowtaih CHAKRAMANG pami natuk büah bowt kown,” pakhai.6Now Mosi hai Arawn iüah dow CHAKRAMANG kowh ana pek iawng chang khai bowt.7Faraw hown taklang mih khin khe Mosi dow 80 ning khowk chekhai, now Arawn dow 83 ning khowk chekhai.8Mosi hai Arawn iüah kowi CHAKRAMANG plan tek pe mih,9“Awdara lup natüng kownkow Faraw tek enchi mih khin khe Arawn kowi en tek pe kown mih, ‘Faraw pur kowi en kowh raitua iu kuak diah,’ pape diah. Nahanow nami raitua dow nachowng rua kown,” pakhai.10Now Mosi hai Arawn iüah dow CHAKRAMANG tek pe iawng Faraw tut-e kowchang khai bowt. Nakowi dow Arawn mih Faraw hai aia kowh maru iukuüa pur kowi aia kowh raitua kuakah khai. Now nami raitua dow awr chowng rua khai.11Nami khi hanow Faraw dow maiaklese sarauüa hai amatni kowi kowh khowng miuüa kowi nakrawi haw kownkow krawi chin maru khai. Now amatni kowh maiaklese kür hown nami lup dow tawi chang büah khai.12Amatni paw amatni kowh raitua maten krawng kowi kuakah büah khai, now naiawngün raitua paw awr chowng rua khai. Tawkchedow Arawn kowh raitua mih amatni kowh raitua maten kowi iawnta pe bowk khai.13Nachenganchepaw Faraw kowh saktuak dow akhawtma uowi reng chekhai. Aia dow Mosi hai Arawn iüah kowh laiklow sünta pe dowi. Nami dow amatchi kowi kowh CHAKRAMANG tek pe iawng uang phaw mih chekhai.14Nami khin khe CHAKRAMANG tek pe Mosi mih, “Faraw kowh saktuak dow akhawtma uowi reng chekhai. Naiawng rakowi aia dow maru-uüa kowi lawtah dowi.15Tharau rau-e khe Nail aw kowi Faraw nakowkowi kown. Nakhowk khe aia hown natakrum kownkow aw pang kowi en kowhawt iowng diah. Now chowng rua mih en kowh raitua paw pawla diah.16Faraw kowi en tek pe kown mih, ‘Hebraiuüa kowh CHAKRAMANG Thurai mih mami laiklow uang tek en kownkow uang chin ang mih chekhai. Aia tek mih: Süngrüp süngkangma kowi ang maru-uüa nauang chup ang kownkow en nalawtah kown mih uang tek en khowk chowdiah. Tawkchedow kawmat mowr kowi ang laiklow en sünta ang dowi.17Naiawng rakowi mami amatra en khi hanow ang dow CHAKRAMANG pami en natuk kown,’ napape kown. Now Faraw kowi en plan tek pe kown mih, ‘Mü diah, mami ang kowh raitua hown kawmat mih Nail aw tui kowi ang bawp kown. Nahanow mami aw tui dow nachowng vi kown.18Now aw kowi kowh dam maten nakowng bowk kown. Mami aw kowi kowh dam su nam dow nakrawi tauet kown. Naiawng rakowi Aigupta maru-uüa mih nakham aw tui kown mih nasui büah kown,’ pape diah,” pakhai.19Nami kung kowi CHAKRAMANG tek pe Mosi mih, “Arawn mih aia kowh raitua pawla now Aigupta pren kowi kowh aw, awchawng, kanh hai cham tatum hüah mih tui maten prakowi aia kowh raitua nakrawi rawk kownkow tek pe diah. Nahanow naiawngün tui mih nachowng vi bowk kown towbowt. Now Aigupta paprenma kowi vi nakrawi uowi kown; tui nungra maten kowi kowh tui ün khowm padow nachowng vi bowk kown towbowt,” pakhai.20Now Mosi hai Arawn iüah dow CHAKRAMANG ana pek iawng chang iüah khai bowt. Arawn mih Faraw hai aia kowh maru iukuüa pur kowi aia kowh raitua hown Nail aw tui kowi iu bawpah khai. Now nami Nail aw tui maten dow uang chowng vi khai.21Nami aw kowi kowh dam dow kowng bowk hanow asu nam mih lainowmma krawi tauet khai. Naiawng rakowi Aiguptauüa mih nami tui nowngia kham büah dowi bowt. Aigupta paprenma kowi dow vi kangowh chekhai.22Nachenganchepaw Aigupta pren kowi kowh maiaklese sarauüa paw amatni kowh maiaklese kür hown nami lup tawi nowng chang khai. Naiawng rakowi Faraw kowh saktuak dow akhawtma uowi reng chekhai. Aia dow Mosi hai Arawn iüah kowh laiklow sünta pe dowi. Nami dow CHAKRAMANG tekta iawng uang phaw mih chekhai.23Faraw dow aia kim kowi powtta pe khai. Aia dow Mosi hai Arawn iüah kowh laiklow prakowi hing pe pe ching dowi chekhai.24Aigupta maru-uüa dow ka kham aw tui dowi bowt rakowi aw pang kowi cham krawi uat tuikuam büah khai.25Nail aw tui luk kowi CHAKRAMANG bawpah mih hownia naiawng uowi mih dow ranit ni mowr chekhai.
The Seed Company